Baroma
16 Ke le tsebiša kgaetšedi ya rena Foibe, yo a hlankelago phuthegong ya Kenkerea.+ 2 Ke kgopela gore le mo amogele ka tsela yeo le amogelago Bakriste* ba bangwe. Mo thušeng ka dilo ka moka tšeo a di hlokago+ ka gobane le yena o ile a thuša batho ba bantši go akaretša le nna.
3 Ntumedišetšeng Perisika* le Akhwila+ bao re šomelago Kriste Jesu gotee le bona. 4 Ba ile ba bea maphelo a bona kotsing gore ba mphološe.+ Nna le diphuthego tša batho ba ditšhaba ka moka re a ba leboga. 5 Le dumedišeng phuthego yeo e kopanelago ntlong ya bona.+ Le dumedišeng le Epaineto yo ke mo ratago, yena yo e bilego yo mongwe wa batho ba mathomo bao e ilego ya ba balatedi ba Kriste kua Asia. 6 Dumedišang Maria yo a ilego a šoma ka thata gore a le thuše. 7 Le dumedišeng batho ba gešo+ e lego Andronika le Juniase bao ke bego ke golegilwe le bona. Banna ba ba tsebja ke baapostola ebile ke kgale e le balatedi ba Kriste go mpheta.
8 Le dumedišeng Ampiliatuse yo ke mo ratago. Le yena ke morutiwa wa Morena. 9 Dumedišang Urubano yo a hlankelago Kriste gotee le rena le mogwera wa ka Stagi. 10 Dumedišang Apelle yo Kriste a mo amogelago. Le dumedišeng le batho ka moka bao ba dulago ntlong ya Aristobulose. 11 Dumedišang Herodione yo ke tswalanago le yena. Le dumedišeng le batho ka moka bao ba dulago ntlong ya Narakiso bao e lego barutiwa ba Morena. 12 Dumedišang Teraefina le Teraefosa, e lego basadi bao ba šomago ka thata go hlankela Morena. Le dumedišeng le Peresi yo re mo ratago kudu ka gobane o šometše Morena ka thata. 13 Dumedišang Rufose yo a kgethilwego ke Morena, le dumedišeng le mmagwe yo le nna ke mo tšeago bjalo ka mma. 14 Dumedišang Asinkrito, Flegone, Heremese, Patroba, Heremase le banababo rena ka moka bao ba nago le bona. 15 Dumedišang Filologo le Julia, Nereo le moratho wa gagwe,* le Olimpase le batho ka moka bao ba hlankelago Morena bao ba nago le bona. 16 Dumedišanang ka go khisana lerameng.* Diphuthego ka moka tša Kriste di a le dumediša.
17 Bjale banabešo, ke le kgothaletša gore le hlokomele bao ba bakago dikarogano ka phuthegong le bao ba timetšago ba bangwe ka go ba ruta dilo tšeo di fapanego le tšeo ba ilego ba ithuta tšona. Ralokelang kgole le batho bao.+ 18 Ka gobane batho bao ga ba hlankele Morena wa rena Kriste, eupša ba dira dilo tšeo di kgotsofatšago bona. Ba timetša batho ba bangwe ka go bolela le bona ka tsela e boreletšana le ka go ba reta ka tsela e feteletšego. 19 Ke thabišwa ke gore batho ka moka ba kgona go bona gore le a botega. Ke nyaka gore le be bohlale, le dire dilo tšeo di lokilego ebile le se ke la ba le molato goba go dira selo le ge e le sefe se sebe.+ 20 E se kgale Modimo yo a neago khutšo o tlo le nea maatla a go pšhatlaganya Sathane+ ka dinao tša lena. Eka Morena wa rena Jesu Kriste a ka le bontšha botho kudu.
21 Timotheo yo ke šomago le yena o a le dumediša. Lukio, Jasone le Sosipatere bao ke tswalanago le bona, le bona ba a le dumediša.+
22 Nna Theshiase, yo a ngwadilego lengwalo le a laelwa ke Paulo, ke le dumediša ka leina la Morena.
23 Gayo+ yo a nkamogetšego, yoo phuthego e kopanelago ntlong ya gagwe le yena o a le dumediša. Erasito yo a hlokomelago dilo tše bohlokwa tša motse le Kwarato morwarragwe ba a le dumediša. 24* ——
25 Modimo o tlo le matlafatša ka ditaba tše dibotse tšeo ke di bolelago ka Jesu Kriste. Ditaba tše tše dibotse di sepedišana le sephiri se sekgethwa+ seo Modimo a ilego a se utolla seo se bego se utilwe ka nako e telele. 26 Modimo o utolletše batho ba ditšhaba ka moka ditaba tše dibotse a diriša baporofeta. Modimo wa rena yo a dulago a le gona o ile a laela gore ditaba tše tše dibotse di tsebišwe batho ba ditšhaba ka moka e le gore ba mo dumele le go mo theetša. 27 Modimo ke yena a nnoši yo a lego bohlale+ ebile o swanelwa ke go tumišwa go ya go ile ka baka la dilo tšeo Jesu Kriste a di dirilego. Amene.