Bakorinthe ba Pele
16 Ge le kgobokeletša bakgethwa tšhelete,+ le latele ditaelo tšeo ke di neilego diphuthego tša Galatia. 2 Letšatšing la mathomo la beke e nngwe le e nngwe, yo mongwe le yo mongwe a beele ka thoko tšhelete kamoo a kgonago, e le gore le se ke la kgoboketša tšhelete ge ke fihla. 3 Ge ke fihla moo ke tla roma banna bao le ngwadilego ka bona mangwalong a lena+ gore ba a tshepega, gore ba iše mpho ya lena Jerusalema. 4 Eupša ge e ba go swanetše gore le nna ke ye Jerusalema, ke tla ya le bona.
5 Eupša ke tlo tla go lena ge ke etšwa Matsedonia, ka gore ke tlo feta gona.+ 6 Mohlomongwe nka dula le lena ka nakwana, ka fetša marega ke na le lena, ka morago ga moo le tla mphelegetša mo ke yago gona. 7 Ge e ba Jehofa* a dumela, ke tlo fetša nako ke na le lena,+ ka gobane ga ke nyake go no le bona ke feta. 8 Eupša gona bjale ke tlo dula mo Efeso+ go fihla ka Monyanya wa Pentekoste, 9 ka gobane ke bulegetšwe ke mojako o mogolo wa gore ke dire modiro wa Morena,+ feela go na le baganetši ba bantši.
10 Ge Timotheo+ a fihla le mo amogeleng gabotse, le be le šomišaneng le yena e le gore a se ke a tshwenyega ka selo ge a na le lena, ka gore go no swana le nna, o dira modiro wa Jehofa.+ 11 A go se be le motho yo a mo nyatšago. Le mo felegetše gore a fihle go nna a šireletšegile, ka gobane nna le banabešo ba bangwe re mo letetše.
12 Ke kgothaleditše ngwanabo rena Apollo+ gore a tle go lena le banababo rena ba bangwe. O be a se a ikemišetša go tla go lena gona bjale, eupša o tlo tla ge a hweditše nako.
13 Dulang le phakgame,+ le eme le tiile tumelong,+ ebang le sebete+ gomme le be le maatla.+ 14 Dilo ka moka tšeo le di dirago, di direng ka lerato.+
15 Banabešo, le a tseba gore batho ka moka bao ba dulago ntlong ya Stefanase ke bona ba mathomo ba go ba balatedi ba Kriste kua Akaya, ebile ba ikemišeditše go hlankela bakgethwa. 16 Ke le kgothaletša gore le šomišane gabotse le batho ba mohuta wo, le batho ka moka bao ba šomago ka thata, gotee le bao ba šomago le bona.+ 17 Eupša ke thabela gore Stefanase,+ Foshunato le Akhaiko ba gona mo, ka gobane ba nthušitše kudu ge le be le se gona. 18 Banna ba mohuta wo le swanetše go ba tšeela godimo, ka gobane ba re kgothaditše kudu.
19 Banababo rena ba diphuthegong tša Asia ba a le dumediša. Akhwila le Perisika* gotee le phuthego yeo e kopanelago ntlong ya bona+ le bona ba le dumediša go tšwa pelong, lena barutiwa ba Morena. 20 Banabešo ka moka ba a le dumediša. Dumedišanang ka go khisana lerameng.*
21 Nna Paulo ke le ngwaletše tumedišo ye ka seatla sa ka.
22 Ge e ba motho a sa rate Morena, a a rogakwe. Morena wa rena, re kgopela gore o tle. 23 Eka Morena Jesu a ka le bontšha botho bja gagwe bjo bogolo. 24 Ke le rata ka moka ka gobane le le boteeng le Kriste Jesu.