Ebangedi ya Luka

1  Batho ba bantši ba lekile go kgoboketša pego ya dilo ka moka tšeo le rena re di dumelago.+ 2 Ba bangwe le bona bao ba bonego ditiragalo tše ka mahlo+ ebile ba bolela molaetša wa Modimo, ba ile ba re botša dilo tše.+ 3 Ka gona, wena Theofilo yo a hlomphegago kudu, ke ile ka nyakišiša ka dilo tše ka moka ke moka ka phetha ka gore ke go ngwalele tšona ka tatelano.+ 4 Ke dirile bjalo e le gore o kgodišege gore dilo tšeo o di rutilwego* ke nnete.+

5 Mehleng ya Heroda*+ kgoši ya Judea, go be go na le moperisita yo a bitšwago Sakaria, yoo e bego e le yo mongwe wa sehlopha sa baperisita seo se bitšwago Abija.+ Mosadi wa gagwe o be a etšwa lelokong la Arone gomme leina la gagwe e be e le Elisabetha. 6 Bobedi bja bona ba be ba lokile pele ga Modimo ebile ba be ba ekwa melao ka moka ya Jehofa* ebile ba dira dilo ka moka tšeo a bego a laetše gore di dirwe. 7 Eupša ba be ba se na ngwana, ka gobane Elisabetha e be e le moopa ebile bobedi bja bona ba be ba šetše ba tšofetše.

8 Bjale ka ge Sakaria a be a hlankela e le moperisita pele ga Modimo kabelong yeo e filwego sehlopha sa baperisita seo se bitšwago Abija,+ 9 o ile a tsena ka sekgethweng sa Jehofa+ gore a fiše diorelo+ ka ge e be e le nako ya gagwe go ya ka seo baperisita ba bego ba tlwaetše go se dira. 10 Ka nako yeo, lešaba ka moka la batho le be le rapela ka ntle nakong ya ge go fišwa diorelo. 11 Morongwa wa Jehofa o ile a iponagatša go yena, a eme ka lehlakoreng le letona la aletare ya diorelo. 12 Eupša Sakaria o ile a tshwenyega kudu ka baka la seo a bego a se bona a ba a tšhoga kudu. 13 Ke moka morongwa a re go yena: “O se ke wa tšhoga Sakaria, ka gobane Modimo o kwele thapelo ya gago e tšwago pelong gomme mosadi wa gago Elisabetha o tla go belegela morwa. Ka gona o mo reele leina o re ke Johane.+ 14 Wena o tla thaba kudu ebile batho ba bantši ba tla thabela gore ngwana yoo o belegwe.+ 15 Ngwana yoo o tlo ba yo bohlokwa pele ga Jehofa.+ Eupša a se ke a nwa beine goba seno le ge e le sefe seo se tagago.+ O tlo ba le moya o mokgethwa go tloga a sa le ka popelong ya mmagwe+ 16 a ba a thuša Baisiraele ba bantši gore ba boele ba hlankele Jehofa Modimo wa bona gape.+ 17 Le gona o tla eta Modimo pele a na le moya o mokgethwa le maatla tšeo di swanago le tša Eliya+ gore a fetoše dipelo tša botate gore di boele di swane le tša bana,+ le go thuša bao ba sa kwego gore ba dire dilo ka bohlale le go dira se se lokilego e le gore a thuše batho bao ba swanelegago gore ba hlankele Jehofa.”+

18 Sakaria a re go morongwa: “Ke tla tseba bjang gore seo o mpotšago sona ke nnete? Ke tšofetše, le mosadi wa ka le yena o tšofetše.” 19 Morongwa a mo araba a re: “Ke nna Gabariele+ ebile ke dula ke le pele ga Modimo.+ Bjale Modimo o nthomile go wena gore ke tle ke go botše ditaba tše tše dibotse. 20 Eupša bona, ka ge o sa tshepe dilo tšeo ke go boditšego tšona tšeo di tlago go phethagala ka nako yeo e beilwego, o tlo palelwa ke go bolela go fihla letšatšing leo dilo tše di tlago go direga ka lona.” 21 Ka nako yeo, batho ba be ba letetše Sakaria, eupša ba ile ba makatšwa ke go bona a tšea nako go tšwa ka lefelong le lekgethwa la* tempele. 22 Ge a etšwa ka moo, o be a sa kgone go bolela le bona, ke moka ba lemoga gore o bone pono ge a be a le ka moo. Ka ge a be a palelwa ke go bolela, o ile a leka go boledišana le bona a diriša diatla. 23 Ge matšatši a gagwe a go dira tirelo e kgethwa a fedile, o ile a boela gae.

24 Ka morago ga matšatši a itšego, mosadi wa gagwe Elisabetha o ile a ima gomme a ikuta ka dikgwedi tše hlano, a re: 25 “Jehofa o dirile gore ke ime gona bjale. O ntlhokometše e le gore ke se sa lewa ke dihlong.”+

26 Ge Elisabetha a na le dikgwedi tše tshela a imile, Modimo o ile a roma morongwa Gabariele+ motseng wa Galelia wo o bitšwago Natsaretha. 27 O ile a mo roma go kgarebe+ yeo monna yo a bitšwago Josefa wa ntlo ya Dafida a bego a e tshepišitše go e nyala. Leina la kgarebe yeo e be e le Maria.+ 28 Ge morongwa yoo a fihla go Maria, o ile a re: “Dumela, wena yo a ratilwego kudu, Jehofa o na le wena.” 29 Eupša mantšu ao a ile a mo tshwenya kudu gomme a leka go kwešiša gore tumedišo yeo e be e le ya mohuta mang. 30 Ka gona, morongwa a re go yena: “Maria, o se ke wa tšhoga ka gobane Modimo o go ratile. 31 Tseba gore o tla ima gomme wa belega morwa.+ O mo reele leina o re ke Jesu.+ 32 Yena e tla ba yo mogolo+ gomme o tla bitšwa Morwa wa Modimo wa Legodimong.+ Le gona Jehofa Modimo o tla mo fa setulo sa bogoši sa Dafida tatagwe,+ 33 ebile e tla ba Kgoši ya ditlogolo tša Jakobo go ya go ile gomme Mmušo wa gagwe o ka se fele.”+

34 Eupša Maria a re go morongwa: “Se se tla direga bjang, ka ge ke sa ka ka robala le monna?”+ 35 Ge morongwa yoo a araba Maria o ile a re go yena: “Moya o mokgethwa o tla tla go wena+ gomme maatla a Modimo wa Legodimong a tla go šireletša. Ka baka leo, yoo a tlago go belegwa o tla bitšwa yo mokgethwa,+ Morwa wa Modimo.+ 36 Le gona, tseba gore Elisabetha wa leloko la geno, yena yoo go thwego ga a kgone go ba le bana, le yena o imile morwa le ge a tšofetše, ebile ye ke kgwedi ya gagwe ya botshelela 37 ka gobane ga go na selo seo Modimo a se boletšego seo se ka se phethagalego.”+ 38 Ke moka Maria a re: “Ke nna lekgoba la Jehofa! Anke go ntiragalele ka mokgwa woo o boletšego.” Ge a realo, morongwa a tloga go yena.

39 Ka gona, matšatšing ao, Maria a phakiša a ya motseng wa Juda woo o lego tikologong ya dithaba. 40 Ge a le moo, a tsena lapeng la Sakaria gomme a dumediša Elisabetha. 41 Bjale ge Elisabetha a ekwa Maria a mo dumediša, lesea leo le lego ka popelong ya gagwe le ile la tshela, gomme Elisabetha a tlala moya o mokgethwa. 42 Ke moka a goeletša a re: “O šegofaditšwe gare ga basadi, le seenywa sa popelo ya gago se šegofaditšwe! 43 Ka gona, go tla bjang gore ke be le tokelo ye ya gore mmago Morena wa ka a tle go nna? 44 Ge ke ekwa o ntumediša, lesea leo le lego ka popelong ya ka le ile la tshela le thabile kudu. 45 Le gona go thaba mosadi yo a dumelago dilo tšeo a di kwelego ka gobane dilo tšeo Jehofa Modimo a mo tshepišitšego tšona di tlo direga.”

46 Ke moka Maria a re: “Ke* tumiša Jehofa,+ 47 le gona nka se lese go thaba kudu ka baka la seo Modimo Mophološi wa ka a ntiretšego sona,+ 48 ka gobane o bone maemo a ka a tlasana nna lekgoba la gagwe.+ Le gona go tloga gona bjale go ya pele meloko ka moka e tla bolela gore ke mosadi yo a thabilego,+ 49 ka gobane Modimo yo maatla o ntiretše dilo tše dikgolo ebile leina la gagwe ke le lekgethwa,+ 50 Le gona, molokong o mongwe le o mongwe o dula a gaugela bao ba mmoifago.+ 51 O dirile dilo tše dikgolo ka letsogo la gagwe, gomme a phatlalatša bao ba ikgogomošago.+ 52 O fološitše banna ba maatla ditulong tša bogoši+ gomme a fa batho bao ba ikokobeditšego maemo a godimo.+ 53 O khorišitše bao ba swerwego ke tlala ka dilo tše dibotse,+ bao ba bego ba humile a ba gomiša ba se ba swara selo. 54 O thušitše bahlanka ba gagwe ba Baisiraele, le gona ge a dira bjalo o be a bontšha gore o gopola tshepišo yeo a e dirilego.+ 55 O be a tshepišitše gore o tla gaugela Aborahama le ditlogolo tša gagwe*+ go ya go ile, gomme sona seo ke se a se boditšego borakgolokhukhu ba rena.” 56 Ke moka Maria a dula le Elisabetha dikgwedi tše e ka bago tše tharo, ka morago a boela ga gabo.

57 Bjale nako ya gore Elisabetha a belege e ile ya fihla, gomme a belega morwa. 58 Baagišane ba gagwe le ba leloko la gabo ba kwa gore Jehofa o mo kwetše bohloko gomme ba thaba le yena.+ 59 Ka letšatši la boseswai ba tla go bolotša lesea leo,+ gomme ba be ba tlo le reela leina la tatago lona e lego Sakaria. 60 Eupša mmago lona a re: “Aowaowaa! O tla bitšwa Johane.” 61 Ge a realo ba re go yena: “Ga go yo a bitšwago ka leina le lelokong la geno.” 62 Ke moka ba bolela le tatagwe ba diriša diatla ba mmotšiša gore o nyaka gore ngwana yoo a bitšwe mang. 63 Ka gona a kgopela letlapa gomme a ngwala gore: “Leina la gagwe ke Johane.”+ Ka moka ga bona ba makatšwa ke seo. 64 Ka yona nako yeo molomo wa gagwe wa bulega, leleme la gagwe la rarologa gomme a thoma go bolela,+ a tumiša Modimo. 65  Batho ka moka bao ba bego ba dula tikologong yeo go bego go dula Sakaria le Elisabetha ba makala kudu, gomme tikologong ya dithaba ya Judea, batho ba thoma go bolela ka dilo ka moka tšeo di diragetšego. 66 Le gona, batho ka moka bao ba kwelego ka seo, ba naganišiša ka seo ba se kwelego ba re: “Ge e le gabotse ngwana yo e tlo ba eng?” Jehofa o be a na le yena.

67 Ke moka Sakaria tatagwe a tlala moya o mokgethwa, gomme a thoma go porofeta a re: 68 “Anke Jehofa a tumišwe, yena Modimo wa Isiraele,+ ka gobane o kwetše batho ba gagwe bohloko gomme a ba phološa.+ 69 O re tsošeditše mophološi yo maatla*+ ntlong ya Dafida mohlanka wa gagwe.+ 70 Ka ge a boletše a diriša baporofeta ba gagwe ba bakgethwa go tloga kgale+ 71 gore re tla phološwa manabeng a rena le seatleng sa bohle bao ba re hloilego,+ 72 o tla re gaugela go etša ge a tshepišitše borakgolokhukhu ba rena ebile o tla gopola kgwerano ya gagwe e kgethwa,+ 73 e lego kgwerano yeo a e enetšego Aborahama rakgolokhukhu wa rena.+ 74 Ka morago ga ge Modimo a re phološitše manabeng a rena, o tla dira gore re mo hlankele re sa tšhabe selo, 75 e le gore re dule re mmotegela le go dira dilo tšeo di lokilego maphelong a rena ka moka. 76 Eupša ge e le wena ngwanaka, o tla bitšwa moporofeta wa Modimo wa legodimong, ka gobane Jehofa o tla go roma gore o mo ete pele e le gore o mo lokišetše ditsela,+ 77 o tsebiše batho ba gagwe gore o tlo ba phološa ka go ba lebalela dibe,+ 78 ka gobane Modimo wa rena o na le lešoko. Ka baka la lešoko leo, seetša sa letšatši ge le hlaba ka masa se tlo re phadimela se etšwa godimo gore se bonegele bao ba dutšego leswiswing 79 le bao ba dutšego tikologong yeo e aparetšwego ke moriti wa lehu.+ Seetša seo se tla re bontšha seo re swanetšego go se dira e le gore re be le khutšo.”

80 Ngwana yoo a gola gomme a ba maatla a thušwa ke moya wa Modimo. Le gona o ile a tšwela pele a dula leganateng go fihlela letšatšing leo a ilego a ya go batho ba Isiraele.