Kutollo Yeo e Utolletšwego Johane

4 Ka morago ga dilo tše ka lebelela gomme ka bona lebati leo le bulegilego legodimong. Le gona lentšu la mathomo leo ke ilego ka le kwa leo le bego le bolela le nna le be le kwagala go swana le phalafala, le re: “Rotogela mono gomme ke tla go bontšha dilo tšeo di swanetšego go direga.” 2 Ka morago, moya wa Modimo o ile wa theogela go nna kapelapela ke moka ka bona setulo sa bogoši se le moo se swanetšego go ba gona legodimong ebile ka bona motho a dutše godimo ga sona.+ 3 Yo a dutšego go sona o be a phadima go swana le leswika leo le bitšwago jasepere+ le leswika le bohlokwa le lekhwibidu. Le gona go dikologa setulo seo sa bogoši go be go na le molalatladi woo o bego o swana le leswika leo le bitšwago emeralede.+

4 Go be go na le ditulo tše dingwe tša bogoši tše 24 go dikologa setulo seo sa bogoši, gomme ditulong tšeo ka bona go dutše bagolo ba 24+ bao ba bego ba apere diaparo tše ditšhweu gomme ba rwele mefapahlogo ya gauta dihlogong tša bona. 5 Setulong seo sa bogoši go be go etšwa magadima,+ mantšu le medumo ya magadima.+ Le gona go be go na le mabone a šupago a mollo ao a bego a tuka pele ga setulo seo sa bogoši. Mabone ao a swantšhetša meoya e šupago ya Modimo.+ 6  Pele ga setulo seo sa bogoši go be go na le selo seo se bego se le bjalo ka lewatle leo le swanago le galase+ ebile se swana le leswika leo le bitšwago legakabje.

Magareng ga setulo sa bogoši le go dikologa setulo seo, go be go na le dibopiwa tše nne tše di phelago+ tšeo di bego di tletše mahlo ka pele le ka morago. 7 Sebopiwa se se phelago sa mathomo se be se swana le tau.+ Sa bobedi se be se swana le powana,+ sa boraro+ se be se na le sefahlego seo se swanago le sa motho gomme sa bone+ se be se swana le ntšhu e fofago.+ 8 Ge e le dibopiwa tše di phelago tše nne, se sengwe le se sengwe sa tšona se be se na le maphego a tshelelago ebile di be di tletše mahlo gohle le ka fase ga maphego.+ Le gona di be di duletše go goeletša bošego le mosegare di re: “Wena Jehofa*+ Modimo, wena o lego Ramatlaohle, yo a bego a le gona, yo a lego gona le yo a tlago, o yo mokgethwakgethwa.”*+

9 Nako le nako ge dibopiwa tše di phelago di tagafatša Modimo yo a lego setulong sa bogoši, di mo hlompha le go mo leboga, e lego yena yo a phelago go ya go ile,+ 10 bagolo ba 24+ ba be ba khunama pele ga Modimo yo a dutšego setulong sa bogoši ebile ba rapela yena yoo a phelago go ya go ile gomme ba lahlela mefapahlogo ya bona pele ga setulo seo sa bogoši ba re: 11 “Wena Jehofa Modimo wa rena, o swanelwa ke go amogela letago,+ tlhompho+ le maatla+ ka gobane o bopile dilo ka moka+ le gona di bile gona ka baka la ge o ratile.”