Ebangedi ya Johane

8 12 Ke moka Jesu a bolela le bona gape a re: “Ke swana le seetša seo se bonegelago batho.*+ Mang le mang yo a ntatelago a ka se sepele leswiswing eupša o tla ba le seetša+ seo se išago bophelong.” 13 Ke moka Bafarasei ba re go yena: “Wena o botša batho ka wena, seo o se bolelago ga se nnete.” 14 Jesu a ba araba a re: “Le ge ke botša batho ka nna seo ke ba botšago sona ke nnete ka gobane nna ke tseba mo ke tšwago le mo ke yago.+ Eupša lena ga le tsebe mo ke tšwago le mo ke yago. 15 Lena le ahlola ka tsela yeo batho ba ahlolago ka yona+ eupša nna ga ke ahlole motho le gatee. 16 Le ge go le bjalo, ge e ba ke ahlola, kahlolo ya ka ke ya nnete, ka gobane ga ke noši eupša Tate yo a nthomilego o na le nna.+ 17 Le gona Molaong wa lena go ngwadilwe gore: ‘Bohlatse bja batho ba babedi ke bja nnete.’+ 18 Ke a itlhatsela, Tate yo a nthomilego le yena o a ntlhatsela.”+ 19 Ke moka Bafarasei bao ba re go yena: “Tatago o kae?” Jesu a re: “Ga le ntsebe le Tate ga le mo tsebe.+ Ge nkabe le be le ntseba gona le Tate le be le tla mo tseba.”+ 20 Dilo tše o di boletše a le lefelong leo go bewago mapokisi a moneelo+ ge a be a ruta ka tempeleng. Eupša ga go na motho yo a ilego a mo swara ka gobane nako ya gagwe e be e sešo ya fihla.+

21 A bolela le bona gape a re: “Ke a tloga gomme le tla nnyaka, eupša le tla hwa le sa rwele sebe sa lena.+ Moo ke yago gona le ka se kgone go tla.”+ 22 Ke moka Bajuda ba re: “Ke ka baka la eng a re, ‘Mo ke yago gona le ka se kgone go tla?’ Kgane o nyaka go ipolaya?” 23 Ke moka a re go bona: “Le tšwa lefaseng, nna ke tšwa legodimong.+ Le tšwa mo lefaseng le eupša nna ga ke tšwe go lona. 24 Ke ka baka leo ke le boditšego gore le tla hwa le sa rwele dibe tša lena. Ka gobane ge e ba le sa dumele gore ke nna yo a bego a tlo tla, le tla hwa le rwele dibe tša lena.” 25 Ke moka ba re go yena: “O mang?” Jesu a re go bona: “Ke sa itshwenyetšang ka go bolela le lena? 26 Ke na le dilo tše dintši tšeo nka di bolelago ka lena, ebile ke na le mabaka a mantši a go ahlola. Ge e le gabotse yo a nthomilego o bolela nnete, gomme dilo tšeo ke di kwelego go yena ke di botša batho.”+ 27 Ga se ba kwešiša gore o be a bolela ka Tatagwe wa legodimong. 28 Ke moka Jesu a re: “Ge le šetše le fegile Morwa wa motho,+ ke gona le tla tsebago gore ke nna mang+ le gore dilo tšeo ke di dirago ga ke ithomele tšona+ eupša ke bolela dilo tšeo Tate a nthutilego tšona. 29 Le gona yo a nthomilego o na le nna, ga se a ntlogela ke nnoši, ka gobane ka mehla ke dira dilo tšeo di mo kgahlago.”+ 30 Ge a dutše a bolela dilo tše, batho ba bantši ba ile ba dumela go yena.

31 Jesu a tšwela pele a bolela le Bajuda bao ba bego ba dumetše go yena a re: “Ge e ba le tšwela pele le ekwa seo ke se bolelago, gona le barutiwa ba ka e le ka nnete, 32 ebile le tla tseba nnete+ gomme nnete e tla le lokolla.”+ 33 Ba re go Jesu: “Rena re bana ba Aborahama. Ga se ra ka ra ba bahlanka ba motho. Bjale ke ka baka la eng o re: ‘Nnete e tla le lokolla’?” 34 Jesu a re: “Ruri ke a le botša, motho yo mongwe le yo mongwe yo a dirago sebe ke lekgoba la sebe.+ 35 Go oketša moo, lekgoba ga le dule ntlong ya mong wa lona go ya go ile eupša morwa wa mong yo, ke yena a dulago ntlong yeo go ya go ile. 36 Ka gona ge e ba Morwa a le lokolla, gona le tla lokologa ka nnete. 37 Ke a tseba gore le bana ba Aborahama, eupša le nyaka go mpolaya ka gobane ga le amogele seo ke se bolelago. 38 Ke bolela dilo tšeo ke di bonego ge ke be ke sa na le Tate+ eupša lena le dira dilo tšeo le di kwelego go tatago lena.” 39 Ba mo araba ba re: “Tatago rena ke Aborahama.” Jesu a re go bona: “Ge e ba le be le le bana ba Aborahama,+ gona le be le tla dira mediro ya Aborahama. 40 Eupša le nyaka go mpolaya nna motho yo ke le boditšego nnete yeo ke e kwelego go Modimo.+ Aborahama o be a ka se tsoge a dirile selo sa go swana le se. 41 Le dira mediro ya tatago lena.” Ba re go yena: “Ga se ra belegwa ka bootswa.* Re na le Tate o tee, e lego Modimo.”

42 Jesu a re go bona: “Ge nkabe le be le etšwa go Tate le be le tla nthata+ ka gobane ke tlile mo ke etšwa go Modimo. Ga se ka no itirela phetho ya go tla mo, eupša Modimo ke yena a nthomilego.+ 43 Ga le amogele seo ke se rutago, ke ka baka leo le sa kwešišego seo ke se bolelago. 44 Le tšwa go tatago lena Diabolo gomme le nyaka go dira dilo tšeo tatago lena a di kganyogago.+ Yena yoo e bile mmolai wa batho go tloga mathomong*+ ebile ga se a ka a tšwela pele a phela ka go dumelelana le nnete ka gobane ga a na nnete. Ge a bolela maaka o bolela go ya ka seo a lego sona, ka gobane o na le maaka ebile ke tatago batho bao ba bolelago maaka.+ 45 Go fapana le yena, nna ke le botša nnete eupša ga le ntshepe. 46 Mo gare ga lena ke mang yo a ka mpeago molato a re: ‘O modiradibe’? Gona ge e ba ke bolela nnete ke ka baka la eng le sa ntumele? 47 Yo a tšwago go Modimo, o theetša dilo tšeo Modimo a di bolelago.+ Lena ga le theetše ka gobane ga le tšwe go Modimo.”+

48 Bajuda ge ba mo araba ba re: “Na re bolela maaka ge re re o Mosamaria+ ebile o na le letemona?”+ 49 Jesu a re: “Ga ke na letemona, eupša ke hlompha Tate gomme lena le a nnyatša. 50 Ga ke inyakele theto+ eupša Modimo ke yena a nyakago gore ke retwe ebile ke yena Moahlodi. 51 Ke le botša nnete ge ke re motho yo a ka phelago ka go dumelelana le seo ke se bolelago a ka se tsoge a hlokofetše.”+ 52 Bajuda ba re: “Bjale gona re a bona gore o na le letemona. Aborahama o hlokofetše, baporofeta le bona ba hlokofetše, eupša wena o re: ‘Motho yo a ka phelago ka go dumelelana le seo ke se bolelago a ka se tsoge a hlokofetše.’ 53 Gape wena ga o fete tatago rena Aborahama yo a hlokofetšego. Baporofeta le bona ba hlokofetše. Wena o eng?” 54 Jesu a re go bona: “Ge e ba ke itheta gona theto ya ka ga se selo. Tate ke yena a nthetago,+ yena yo le rego ke Modimo wa lena. 55 Le ge go le bjalo, lena ga sešo le mo tseba+ eupša nna ke a mo tseba.+ Le gona ge nkabe ke itše ga ke mo tsebe ke be ke tla be ke bolela maaka go swana le lena. Eupša ke a mo tseba ebile ke dira seo a se bolelago. 56 Aborahama tatago lena o be a fela pelo ya go bona letšatši leo ke tlago go tla ka lona. Le gona o ile a le bona ka leihlo la kgopolo, gomme a thaba.”+ 57 Ke moka Bajuda ba re go yena: “Ga sešo o eba le mengwaga e 50, bjale go tla bjang gore o re o bone Aborahama?” 58 Jesu a re go bona: “Ruri ke a le botša ke re, pele ga ge Aborahama a ka ba gona, nna ke be ke šetše ke le gona.”+ 59 Ke moka ba topa maswika gore ba mo foše ka ona, eupša Jesu a khuta gomme a tšwa ka tempeleng.