Ebangedi ya Johane

7 Ka morago ga dilo tše, Jesu o ile a tšwela pele a sepela le naga ya Galelia ka gobane o be a sa nyake go sepela le naga ya Judea, ka ge Bajuda ba be ba nyaka go mmolaya.+ 2 Le ge go le bjalo, Monyanya wa Bajuda wa Ditaberenakele*+ o be o le kgauswi le go ketekwa. 3 Ka gona bana ba gabo+ ba re go yena: “Tloga mo o ye Judea, e le gore barutiwa ba gago le bona ba bone dilo tšeo o di dirago. 4 Ka gobane ga go na motho yo a dirago dilo ka sephiring ge e ba a nyaka gore batho ba mo tsebe. Ge e ba o dira dilo tše, gona dira gore batho ka moka ba go bone.”* 5 Ge e le gabotse, bana ba gabo ba be ba sa dumele go yena.+ 6 Ka gona Jesu a re go bona: “Nako ya ka ga se ya tšwa e fihla,+ eupša ya lena e dula e le gona. 7  Batho ga ba na lebaka la go le hloya, eupša nna ba ntlhoile, ka gobane ke nea bohlatse bja gore dilo tšeo ba di dirago ke tše mpe.+ 8 Lena rotogelang monyanyeng. Eupša nna nka se rotogele gona bjale, ka gobane nako ya ka ga sešo e fihla.”+ 9 Ka gona, ka morago ga gore a ba botše dilo tše, o ile a šala Galelia.

10 Eupša ge bana ba gabo ba rotogetše monyanyeng, le yena o ile a rotogela gona ka sephiring. 11 Ka gona, Bajuda ba thoma go mo nyaka monyanyeng ba re: “Motho yola o kae?” 12 Mašaba a batho a be a ngunanguna. Ba bangwe ba be ba re: “Ke motho wa go loka.” Ba bangwe ba re: “Ga se a loka ebile o aroša batho.”+ 13 Go be go se na motho yo a lokologago go bolela ka yena pele ga batho ka gobane ba be ba tšhaba Bajuda.+

14 Ka morago ga matšatši a e ka bago a mane monyanya o thomile, Jesu o ile a rotogela tempeleng gomme a thoma go ruta. 15 Ka gona Bajuda ba makala, ba re: “Motho yo o tseba bjang Mangwalo,+ mola a se a ya dikolong tša bodumedi?”*+ 16 Ke moka Jesu a ba araba a re: “Dilo tšeo ke di rutago ga se tša ka, eupša ke tša yo a nthomilego.+ 17 Ge motho a rata go dira thato ya Modimo, o tla tseba ge e ba dilo tšeo ke di rutago di etšwa go Modimo+ goba e le dikgopolo tša ka. 18 Ge e ba motho a ruta dikgopolo tša gagwe o nyaka go tumišwa, eupša yo a tumišago yo a mo romilego,+ o bolela nnete ebile ga a na maaka. 19 Na Moshe ga se a le fa Molao?+ Eupša ga go le o tee wa lena yo a kwago Molao woo. Ke ka baka la eng le nyaka go mpolaya?”+ 20 Ke moka batho bao ba bego ba le moo ba re: “O na le letemona. Ke mang yo a nyakago go go bolaya?” 21 Jesu ge a araba a re: “Ke dirile mohlolo o tee gomme ka moka le a makala. 22 Ka gona, naganang ka se, Moshe o le file molao wa lebollo+ gomme le bolotša bašemane ka sabatha. Le ge go le bjalo, molao woo o be o sa tšwe go Moshe, eupša o etšwa go borakgolokhukhu ba gagwe.+ 23 Ge e ba le bolotša mošemane ka sabatha e le gore le se ke la tshela Molao wa Moshe, ke ka baka la eng le nkgalefela gakaakaa ge ke fodišitše motho ka mo go feletšego ka sabatha?+ 24 Le se ke la ahlola motho go ya ka ponagalo ya gagwe, eupša le ahlole ka tsela e lokilego.”+

25 Ke moka ba bangwe ba badudi ba Jerusalema ba thoma gore: “Na motho yo ga se yena yo ba nyakago go mmolaya?+ 26 Bjale bonang! Ke yo o bolela phatlalatša, eupša ga go na yo a mmotšago selo. Na babuši ba ka ba ba šetše ba tseba gore ka nnete ke yena Kriste? 27 Rena re tseba moo motho yo a tšwago gona.+ Eupša ge Kriste a etla, ga go na motho yo a tlago go tseba mo a tšwago gona.” 28 Ka gona, ge Jesu a be a ruta ka tempeleng o ile a bolela ka lentšu la godimo a re: “Le a ntseba ebile le tseba moo ke tšwago gona. Le gona, ga se ka no itirela phetho ya go tla mo,+ eupša yo a nthomilego o gona e le ka nnete ebile ga le mo tsebe.+ 29 Nna ke a mo tseba+ ka gobane ke tšwa go yena gomme yena o nthomile.” 30 Ka gona ba thoma go nyaka dibaka tša go mo swara,+ eupša ga go na yoo a ilego a mo kgwatha ka gobane nako ya gagwe e be e sešo ya fihla.+ 31 Le ge go le bjalo, gare ga batho bao ba bego ba le moo, ba bantši ba bona ba ile ba dumela go yena+ gomme ba re: “Na ge Kriste a fihla o tla dira mehlolo e mentši go feta yeo motho yo a e dirilego?”

32 Ge Bafarasei ba ekwa dilo tšeo batho ba bego ba sebaseba ka tšona mabapi le Jesu, bona le baperisita ba bagolo ba ile ba romela baleti ba tempele gore ba mo sware. 33 Ke moka, Jesu a re: “Ke tla ba le lena nakonyana pele ga ge ke eya go yo a nthomilego.+ 34 Le tla nnyaka eupša le ka se nkhwetše ebile moo ke yago gona le ka se kgone go tla.”+ 35 Ka gona Bajuda ba boledišana ba re: “Motho yo o ikemišeditše go ya kae moo e lego gore re ka se kgone go mo hwetša? Na o ikemišeditše go ya go Bajuda bao ba dulago le Bagerika gomme a rute Bagerika? 36 O ra goreng ge a re: ‘Le tla nnyaka eupša le ka se nkhwetše, ebile moo ke yago gona le ka se kgone go tla’?”

37 Letšatšing la mafelelo, e lego letšatši le bohlokwa la monyanya,+ Jesu o ile a emelela gomme a bolela ka lentšu la godimo a re: “Ge e ba go na le motho yo a swerwego ke lenyora, a a tle go nna gomme nna ke tla mo fa meetse a go nwa.+ 38 Mang le mang yo a dumelago go nna, Mangwalo a bolela ka yena a re: ‘Meetse ao a fago bophelo a tla elela a etšwa go yena.’”+ 39 Le ge go le bjalo, Jesu o be a bolela ka moya o mokgethwa woo batho bao ba dumelago go yena ba bego ba le kgauswi le go o amogela. Ba be ba sešo ba amogela moya woo+ ka gobane Jesu o be a se a tšwa a eya legodimong.+ 40 Ba bangwe lešabeng bao ba kwelego dilo tšeo a di boletšego, ba thoma gore: “Ruri motho yo ke moporofeta.”+ 41 Ba bangwe ba be ba re: “Motho yo ke Kriste.”+ Eupša ba bangwe ba re: “Kriste a ka se tšwe Galelia.+ 42 Na lengwalo ga se la re Kriste o tla tšwa peung ya Dafida+ le Betlelehema,+ e lego motsana woo Dafida a bego a etšwa go wona?”+ 43 Ka gona lešaba la se sa kwana ka baka la gagwe. 44 Le ge go le bjalo, ba bangwe ba bao ba bego ba le lešabeng leo ba be ba nyaka go mo swara, eupša ga go na yo a ilego a mo kgwatha.

45 Ka gona baleti bao ba tempele ba boela go baperisita ba bagolo le Bafarasei, ke moka Bafarasei ba re go bona: “Ke ka baka la eng le se la tla le yena?” 46 Baleti bao ba tempele ba re: “Ga go na motho yoo a kilego a bolela ka mokgwa wo.”+ 47 Ke moka Bafarasei ba re: “Na le lena o le arošitše? 48 Na go na le yo mongwe wa babuši goba wa Bafarasei yoo a dumelago go yena?+ 49 Modimo ga a kgahlwe ke batho bao ba sa tsebego Molao.” 50 Nikodemo yo a bego a kile a tla go yena, yoo e bego e le yo mongwe wa bona, a re go bona: 51 “Go ya ka Molao wa rena, ge e ba re nyaka go ahlola motho re swanetše go thoma pele ka go mo kwa gore o reng, e le gore re tsebe gore o dirile eng, na ga go bjalo?”+ 52 Ge ba mo araba ba re: “Kgane le wena o tšwa Galelia? Nyakišiša ka Mangwalong o bone gore ga go moporofeta yoo a tlago go tšwa Galelia.”*