Ebangedi ya Johane

12 Jesu o ile a fihla Bethania matšatši a tshela pele go ka ketekwa monyanya wa Paseka, gona moo ke moo Latsaro+ yo Jesu a mo tsošitšego bahung a bego a dula gona. 2 Ka gona ba mo direla dijo tša mantšiboa. Mareta o be a ba fa tšona,+ eupša Latsaro o be a dutše le Jesu tafoleng. 3 Ka gona Maria a tšea lepotlelo* la makhura ao a nkgago bose ao a dirilwego ka nareda ya nnete ebile a tura kudu. Ke moka Maria a a tšhela maotong a Jesu gomme a a phumola ka meriri ya gagwe. Ntlo ka moka ya tlala ka monkgo o mobose wa makhura ao.+ 4 Eupša Judase Isikariote,+ yo e bego e le yo mongwe wa barutiwa ba Jesu ebile a le kgauswi le go tlo rekiša Jesu, o ile a re: 5 “Ke ka baka la eng makhura ao a nkgago bose a se a rekišwa ka ditenariase* tše 300 gomme tšhelete yeo ya newa badiidi?” 6 Ga se a bolela seo ka ge a be a tshwenyegile ka badiidi eupša o se boletše ka ge e be e le lehodu. Ke yena a bego a swara lepokisi la tšhelete ebile o be a fela a utswa tšhelete yeo. 7 Ke moka Jesu a re: “Mo tlogeleng gore a dire seo gona bjale e le gore a ntokišeletše letšatši leo ke tlago go bolokwa ka lona.+ 8 Le dula le na le badiidi ka mehla,+ eupša nna le ka se dule le na le nna.”+

9 Ka nako yeo lešaba le legolo la Bajuda la kwa gore o be a le moo, ke moka la tla go tlo bona Jesu le Latsaro yo a mo tsošitšego bahung.+ 10 Baperisita ba bagolo ba loga maano a go bolaya le Latsaro, 11 ka gobane Bajuda ba bantši ba be ba eya moo go yo bona yena ebile ba thoma go ba le tumelo go Jesu.+

12 Ka letšatši le le latelago, lešaba le legolo leo le bego le tlile monyanyeng le ile la kwa gore Jesu o be a etla Jerusalema. 13 Ka gona la tšea makala a mepalema gomme la ya go mo gahlanetša. La thoma go goeletša la re: “Re rapela gore o mo šireletše! Go šegofaditšwe Kgoši ya Isiraele+ yeo e tlago ka leina la Jehofa!”*+ 14 Ge Jesu a hweditše tonkana, o ile a e namela+ bjalo ka ge go ngwadilwe gore: 15 “O se ke wa tšhoga wena morwedi wa Tsione. Kgoši ya gago e a tla, e nametše tonkana.”+ 16 Mathomong barutiwa ba gagwe ba be ba sa kwešiše dilo tše, eupša ge Jesu a filwe maemo a godimo+ ba ile ba gopola gore dilo tše di be di ngwadilwe ka yena ebile di mo diragaletše.+

17 Bjale batho bao ba bego ba na le yena ge a be a bitša Latsaro gore a tšwe ka lebitleng+ gomme a mo tsoša bahung, ba ile ba tšwela pele ba nea bohlatse ka seo se diragetšego.+ 18 Ka ge batho ba be ba kwele gore o dirile mohlolo woo, ba ile ba tla go mmona. 19 Ka gona Bafarasei ba ile ba boledišana ba re: “Le lena le a bona gore maano a rena a a pala. Bonang gona bjale, batho ka moka* ba mo šetše morago.”+

20 Gare ga batho bao ba bego ba ile go rapela monyanyeng go be go na le Bagerika. 21 Bagerika ba ba ile ba ya go Filipi+ yo a bego a etšwa Betsaida ya Galelia, ba re go yena: “Mohlomphegi, re kgopela go bona Jesu.” 22 Filipi a tla a botša Andrea. Ke moka yena le Andrea ba tla ba botša Jesu.

23 Eupša Jesu a ba araba a re: “Nako ya gore Morwa wa motho a fiwe maemo a phagamego e fihlile.+ 24 Ruri ke re go lena: Ge e ba thoro ya korong e ka se wele fase gomme ya bola, e tla dula e le thoro e tee, eupša ge e ka hwa,+ e tla enywa dienywa tše dintši. 25 Yo a ratago bophelo* bja gagwe o a bo senya, eupša yo a bo hloyago+ lefaseng le o tla bo šireletša e le gore a tle a hwetše bophelo bjo bo sa felego.+ 26 Ge e ba motho a rata go ntlhankela, a a ntšhale morago, gomme mo ke lego gona, le yo a ntlhankelago o tla ba gona.+ Ge e ba motho a ntlhankela, Tate o tla mo phagamiša. 27 Bjale ke nyamile kudu,+ ebile ga ke tsebe gore ke reng. Tate, ntšhireletše go seo se tlago go direga.+ Le ge go le bjalo ke tletše gore se ntiragalele. 28 Tate tagafatša leina la gago.” Ke moka gwa kwagala lentšu+ legodimong la re: “Ke le tagafaditše ebile ke tla le tagafatša gape.”+

29  Batho bao ba bego ba le moo ba ile ba kwa lentšu leo gomme ba re: “Ke modumo wa legadima.” Ba bangwe ba re: “Morongwa o boletše le yena.” 30 Jesu a re: “Lentšu le le kwagetše ka baka la lena e sego ka baka la ka. 31 Bjale Modimo o ahlola lefase+ le, ebile o tla lahla mmuši wa lona.+ 32 Le ge go le bjalo, nna ge ke fegilwe koteng,+ ke tla gogela batho ba mehuta ka moka go nna.” 33 O boletše seo go bontšha kamoo a bego a tlo hwa ka gona e se kgale.+ 34 Ke moka batho bao ba mo araba ba re: “Re kwele Molaong gore Kriste o tlo dula a le gona go ya go ile.+ Bjale ke ka baka la eng wena o re Morwa wa motho o swanetše go fegwa koteng?+ Ge e le gabotse Morwa yoo wa Motho ke mang?” 35 Jesu a re go bona: “Seetša se tla ba gare ga lena ka nakwana. Ka gona sepelang ge le sa dutše le na le seetša e le gore leswiswi le se ke la le swara. Yo mongwe le yo mongwe yo a sepelago leswiswing ga a tsebe mo a yago.+ 36 Ge le sa dutše le na le seetša, dumelang go sona e le gore le be bana ba seetša.”+

Ka morago ga gore Jesu a bolele dilo tše o ile a ya go ba khutela. 37 Le ge a dirile mehlolo e mentši pele ga bona, ba be ba sa dumele go yena, 38 e le gore go phethagale seo moporofeta Jesaya a se boletšego ge a be a re: “Jehofa, ke mang yo a dumetšego seo re se boletšego?+ Le gona ke mang yo Jehofa a mo utolletšego maatla a gagwe?”+ 39 Lebaka leo le ilego la dira gore ba se dumele ke gore Jesaya o ile a bolela gape a re: 40 “O foufaditše mahlo a bona gomme a thatafiša dipelo tša bona, e le gore mahlo a bona a se ke a bona le dipelo tša bona di se ke tša kwešiša. Batho ba ga ba sokologe e le gore nna ke ba fodiše.”+ 41 Jesaya o boletše dilo tše ka Kriste ka ge a bone letago la gagwe gomme a bolela ka yena.+ 42 Le babuši ba bantši ba ile ba dumela go Jesu+ eupša ba be ba ka se bontšhe gore ba dumela go yena ka gobane ba be ba tšhaba Bafarasei ka ge ba be ba tla ba raka sinagogeng,+ 43 ka gobane ba be ba rata go amogelwa ke batho go feta go amogelwa ke Modimo.*+

44 Eupša Jesu a bolela ka lentšu la godimo a re: “Yo a dumelago go nna, ga a dumele go nna feela, eupša o dumela le go yo a nthomilego.+ 45 Le gona yo a mponago o bona le yo a nthomilego.+ 46 Ke tlile lefaseng ke le seetša+ e le gore yo mongwe le yo mongwe yo a dumelago go nna a se dule leswiswing.+ 47 Le gona yo a kwago dilo tšeo ke di bolelago eupša a sa di dire, ga ke mo ahlole ka gobane ga se ka tlela go ahlola lefase, eupša ke tletše go le phološa.+ 48 Yo a se nago taba le nna ebile a sa amogele dilo tšeo ke di bolelago go na le yo a tlago go mo ahlola. Dilo tšeo ke di boletšego ke tšona di tlago go mo ahlola ka letšatši la mafelelo. 49 Ga se ka bolela dikgopolo tša ka, eupša Tate yo a nthomilego ke yena a mpoditšego* seo ke swanetšego go se bolela le go se ruta.+ 50 Le gona, ke a tseba gore dilo tšeo a mpoditšego tšona di iša bophelong bjo bo sa felego.+ Ka gona, dilo ka moka tšeo ke di bolelago ke di bolela ka mokgwa woo Tate a itšego ke di bolele ka gona.”+