Ebangedi ya Mateo

12 Ka nako yeo Jesu o ile a feta ka gare ga mašemo a korong ka Sabatha. Barutiwa ba gagwe ba ile ba swarwa ke tlala ke moka ba thoma go kga korong yeo ba ja.+ 2 Ge Bafarasei ba bona se, ba re go yena: “Bona! Barutiwa ba gago ba dira selo seo molao o sa dumelego gore se dirwe ka Sabatha.”+ 3 Yena a re go bona: “Na ga se la ka la bala ka seo Dafida a ilego a se dira ge yena le banna bao ba bego ba na le yena ba be ba swerwe ke tlala?+ 4 O ile a tsena ka ntlong ya Modimo gomme a tšea dinkgwa tšeo di neetšwego Modimo+ ke moka yena le banna bao ba bego ba na le yena ba di ja. Go ya ka molao, ba be ba sa dumelelwa go ja dinkgwa tšeo ka gobane e be e le baperisita feela bao ba bego ba dumeletšwe go di ja.+ 5 Goba, na ga se la ka la bala Molaong gore ka Disabatha, baperisita tempeleng ba swara Sabatha e se e kgethwa gomme ba dula ba se na molato?+ 6 Eupša ke le botša gore motho yoo a lego bohlokwa go feta tempele o gona mo.+ 7 Bjale ge e ba le be le kwešišitše seo se bolelwago ke mantšu ao a rego: ‘Ke nyaka kgaugelo+ e sego sehlabelo,’+ le ka be le se la bona molato bao ba se nago molato. 8 Ke bolela se ka gobane Morwa wa motho ke yena Morena wa Sabatha.”+

9 Ka morago ga ge a tlogile lefelong leo a ya ka sinagogeng ya bona. 10 Ke moka gwa tla monna yo a bego a omeletše seatla.*+ Ka gona ba botšiša Jesu ba re: “Na go fodiša motho ka Sabatha go dumeletšwe ke molao?” Ba ile ba mmotšiša seo e le gore ba hwetše seo ba ka mo latofatšago ka sona.+ 11 Jesu a re go bona: “Ge o ka re o na le nku e tee gomme nku yeo ya wela ka moleteng ka Sabatha, ke mang mo gare ga lena a ka se kego a e swara a e ntšha?+ 12 Ruri motho o bohlokwa kudu go feta nku. Ka gona, go dira selo se sebotse ka Sabatha go dumeletšwe ke Molao.” 13 Ke moka a re go monna yoo: “Otlolla seatla sa gago.” A se otlolla, gomme sa fola. 14 Eupša Bafarasei ba tšwela ka ntle gomme ba mo logela maanomabe a gore ba mmolaye. 15 Ge Jesu a tsebile ka seo, o ile a tloga moo. Batho ba bantši ba ile ba mo latela+ gomme a fodiša batho ka moka bao ba bego ba babja, 16 eupša a ba botša tsebe-go-kwa gore ba se ke ba botša batho ka yena,+ 17 e le gore go tle go phethagale seo Modimo a se boletšego a diriša moporofeta Jesaya, yo a itšego:

18 “Bonang! Yo ke mohlanka wa ka+ yo ke mo kgethilego, yo ke mo ratago le yo ke mo amogetšego!+ Ke tla mo nea moya wa ka.+ O tla hlalosetša ditšhaba seo toka e lego sona. 19 A ka se ngangišane le motho,+ a ka se goeletše ebile ga go na motho yo a tlago go kwa lentšu la gagwe diterateng tše dikgolo. 20 A ka se robe lehlaka leo le kobegilego ebile a ka se time thapo ya lebone yeo e šetšego e le kgauswi le go tima,+ go fihlela a tliša toka. 21 Ka kgonthe leina la gagwe le tla dira gore ditšhaba di be le kholofelo.”+

22 Ke moka ba mo tlišetša monna yo a bego a na le letemona, a foufetše ebile a sa kgone go bolela gomme Jesu a mo fodiša. Ka morago monna yoo o ile a kgona go bolela a ba a bona. 23 Bjale mašaba ka moka a šala a maketše gomme a re: “Na yo ga se yena Morwa wa Dafida?” 24 Ge Bafarasei ba kwele ka se, ba ile ba re: “Motho yo o raka matemona ka maatla a mmuši wa matemona e lego Beletsebubu.”*+ 25 Ka ge a be a tseba seo ba se naganago, o ile a re go bona: “Mmušo o mongwe le o mongwe woo o ikaroganyago o a wa, le motse o mongwe le o mongwe goba lapa leo le ikaroganyago le ka se eme. 26 Ka tsela e swanago, ge e ba Sathane a raka Sathane, gona o ikarogantše. Bjale mmušo wa gagwe o tla ema bjang? 27 Le gona, ge e ba ke raka matemona ka maatla a Beletsebubu, barwa ba lena bona ba a raka ka maatla a mang? Ke ka baka leo barwa ba lena ba tlago go le ahlola. 28 Eupša ge e ba ke raka matemona ka moya wa Modimo, gona Mmušo wa Modimo o fihlile go lena le sa lemoge.+ 29 Goba ke mang yo a ka tsenago ka ntlong ya monna yo maatla gomme a tšea thoto ya gagwe a se a thoma pele ka go mo tlema? Ge a tlemile monna yoo, ke gona a ka kgonago go tšea thoto ya ka ntlong ya gagwe. 30 Yo a sego ka lehlakoreng la ka o lwa le nna gomme yo a sa kgoboketšego le nna o a gašanya.+

31 “Ka baka leo ke re go lena, batho ba tla lebalelwa mohuta o mongwe le o mongwe wa sebe, le ge ba ka rogaka dilo tše kgethwa ba tla lebalelwa, eupša yo a rogakago moya o mokgethwa a ka se lebalelwe.+ 32 Ka mohlala, mang le mang yo a bolelago gampe ka Morwa wa motho, o tla lebalelwa,+ eupša mang le mang yo a bolelago gampe ka moya o mokgethwa, ruri a ka se lebalelwe mo nakong ye* goba nakong e tlago.+

33 “Ge e ba le hlokomela mohlare, o tlo enywa dienywa tše dibotse, eupša ge e ba le sa o hlokomele, dienywa tša wona di ka se be bose. Dienywa di bontšha ge e ba mohlare o phetše gabotse goba go se bjalo.+ 34 Lena bana ba marabe,+ le ka kgona bjang go bolela dilo tše dibotse mola le le ba babe? Molomo o bolela seo se tšwago pelong.+ 35 Motho yo a lokilego o bolela dilo tše di lokilego ka gobane pelong ya gagwe go na le dilo tše di lokilego, mola motho yo mobe a bolela dilo tše mpe ka gobane pelong ya gagwe go tletše dilo tše mpe.+ 36 Ke le botša gore Letšatšing la Kahlolo, batho ba tla ikarabela+ ka dilo ka moka tša go hloka mohola tšeo ba di bolelago, 37 ka gobane ge e ba dilo tšeo o di bolelago di lokile, gona Modimo o tla re o lokile, eupša ge e ba o bolela dilo tše mpe, gona Modimo o tla go ahlola.”

38 Ke moka ba bangwe ba ditsebi tša molao le Bafarasei ge ba mo araba ba re: “Morutiši, re direle mohlolo wo o bontšhago gore o romilwe ke Modimo.”+ 39 A ba araba a re: “Moloko o mobe le wo o sa kwego* Modimo, o dula o nyaka go bona mohlolo, eupša ga go na mohlolo wo le tlago go o bona ge e se mohlolo wo o diragaletšego moporofeta Jona.+ 40 Go no swana le ge Jona a be a le ka mpeng ya hlapi e kgolo ka matšatši a mararo le mašego a mararo,+ Morwa wa motho le yena o tla ba lebitleng matšatši a mararo le mašego a mararo.+ 41  Batho ba Ninife ba tla tsošwa le moloko wo Letšatšing la Kahlolo, gomme ba bolela gampe ka wona ka gobane bona ba ile ba itshola ka baka la seo Jona a se boletšego,+ eupša motho yo bohlokwa go feta Jona o mo.+ 42 Kgošigadi ya borwa e tla tsošwa le moloko wo Letšatšing la Kahlolo, gomme e tla bolela gampe ka wona ka gobane e ile ya tla e etšwa nageng ya kgole e le gore e tle e kwe bohlale bja Solomone.+ Eupša ke re go lena, motho yo bohlokwa go feta Solomone o gona mo.+

43 “Ge moya o mobe o etšwa mothong, o feta mafelong ao a se nago meetse o nyaka lefelo leo o ka khutšago go lona, eupša ge e ba o sa le hwetše,+ 44 o re: ‘Ke tla boela morago ntlong ya ka ye ke tšwilego go yona,’ eupša ge o fihla wa hwetša e se na motho, e hlwekile ebile e kgabišitšwe. 45 Ke moka wa ya wa tšea meoya e mengwe e šupago e mebe go feta wona, ge e se na go tsena ka gare ya dula moo. Ke moka maemo a mafelelo a motho yoo e ba a mabe go feta a peleng.+ Go tlo ba bjalo le ka moloko wo o mobe.”

46 Ge a sa dutše a bolela le mašaba, mmagwe le banababo+ ba be ba eme ka ntle ba nyaka go bolela le yena.+ 47 Ka gona motho yo mongwe a re go yena: “Mmago le banabeno ba eme ka ntle, ba nyaka go bolela le wena.” 48 A botšiša motho yoo a bego a bolela le yena a re: “Mma ke mang, gomme banabešo ke bomang?” 49 A otlollela letsogo la gagwe go barutiwa ba gagwe, a re: “Mma le banabešo šeba!+ 50 Mang le mang yo a dirago seo Tate yo a lego legodimong a se ratago, ke yena e lego ngwanešo le kgaetšedi ya ka le mma.”+