Ebangedi ya Mareka

6 Ke moka a tloga moo a ya tikologong ya gabo,+ barutiwa ba gagwe ba mo šala morago. 2 Ge e be e le Sabatha, o ile a thoma go ruta sinagogeng, gomme batho ba bantši bao ba ilego ba mo kwa ba ile ba makala ba re: “Motho yo o ithutile dilo tše kae,+ gona ke ka baka la eng a filwe bohlale bjo ebile a kgona le go dira mehlolo e megolo ka diatla tša gagwe?+ 3 Na yena yo ga se mmetli+ morwa wa Maria+ le butia Jakobo,+ Josefa, Judase le Simone?+ Na dikgaetšedi tša gagwe ga di na le rena gona mo?” Ka gona ba kgopišega ka baka la seo a se boletšego. 4 Eupša Jesu a re go bona: “Batho ba dula ba tšeela moporofeta godimo, eupša batho ba tikologong ya gabo le ba leloko la gabo ga ba mo tšeele godimo.”+ 5 Ka gona, o ile a fodiša batho ba sego kae bao ba bego ba babja ka go ba bea diatla eupša ga se a ka a dira mehlolo e mengwe moo. 6 O ile a makatšwa ke go bona kamoo ba bego ba hloka tumelo ka gona. A sepela go dikologa metsana ya moo tikologong yeo a tšama a ruta.+

7 A bitša baapostola ba gagwe ba 12, a thoma go ba roma ka babedi ka babedi+ a ba fa le maatla a go laola meoya e mebe.+ 8 A ba laela gore ba tšee lepara feela ge ba tšea leeto leo eupša ba se tšee senkgwa, mokotla wa dijo le tšhelete,*+ 9 a ba laela le gore ba apare seaparo se setee* le dieta* tša bona. 10 Go oketša moo, a re go bona: “Ntlong e nngwe le e nngwe yeo ba le amogelago go yona, le dule moo go fihlela le tloga lefelong leo.+ 11 Lefelo le ge e le lefe leo ba sa le amogelego goba ba sa le theetšego, ge le etšwa le hlohlore lerole leo le lego maotong a lena gore ba tsebe gore Modimo o ile a ba lemoša.”+ 12 Ka gona, ba ya ba botša batho gore ba swanetše go itshola.+ 13 Ba raka matemona a mantši,+ ba tlotša batho ba bantši bao ba bego ba babja ka makhura ke moka ba ba fodiša.

14 Bjale Kgoši Heroda o ile a kwa ka seo, ka gobane leina la Jesu le ile la tuma gomme batho ba be ba re: “Johane Mokolobetši o tsošitšwe bahung, gomme ke ka baka leo a kgonago go dira mehlolo.”+ 15 Eupša ba bangwe ba be ba re: “Ke Eliya.” Ba bangwe bona ba be ba re: “Ke moporofeta go no swana le baporofeta ba bangwe ba kgale.”+ 16 Eupša ge Heroda a ekwa seo a re: “Johane yo ke mo kgaotšego hlogo, o tsošitšwe bahung.” 17 Heroda o be a nyetše Herodiase mosadi wa butiagwe e lego Filipi. Heroda o be a romile batho gore ba sware Johane, ba mo tleme ba be ba mo lahlele kgolegong ka gobane se ke seo se bego se nyakwa ke Herodiase.+ 18 Ka gobane Johane o ile a botša Heroda gantši gore: “Ga go dumelelwe ke molao gore o tšee mosadi wa butiago.”+ 19 Ka gona, Herodiase o be a mo swere ka pelo gomme a nyaka go mmolaya, eupša a sa kgone. 20 Heroda o be a boifa Johane, ka ge a be a tseba gore ke monna yo a lokilego le yo mokgethwa,+ ebile o be a mo šireletša. Heroda o be a thabela go kwa dilo tšeo Johane a bego a di bolela, moo e lego gore ge a be a mo theeditše o be a sa tsebe gore a dire eng ka yena.

21 Eupša letšatši le le loketšego le ile la fihla ge Heroda a be a dirile monyanya ka letšatši la gagwe la matswalo.+ O be a o diretše batho ba gagwe ba maemo a godimo, balaodi ba mašole le banna bao ba hlomphegago kudu ba Galelia.+ 22 Ke moka morwedi wa Herodiase a tsena a bina gomme a kgahliša Heroda le bao ba bego ba dutše le yena tafoleng. Ke moka kgoši ya bolela le mosetsana yoo ya re: “Nkgopele selo le ge e le sefe seo o se nyakago, gomme ke tla go fa sona.” 23 E ile ya ba ya mo enela ya re: “Nkgopele selo se sengwe le se sengwe ke tla go fa sona, le ge e ka ba seripa sa mmušo wa ka.” 24 Ke moka ngwanenyana yoo a ya go mmagwe a re: “Ke kgopele eng?” Yena a re: “Kgopela hlogo ya Johane Mokolobetši.” 25 Kapelapela a ya go kgoši a e kgopela, a re: “Ke nyaka gore o mphe hlogo ya Johane Mokolobetši e le ka sebjaneng se segolo gona bjalebjale.”+ 26 Le ge kgoši e ile ya kwa bohloko kudu ka baka la seo, e ile ya amogela kgopelo ya ngwanenyana yoo, ka baka la dikeno tšeo e bego e di dirile le ka baka la baeng ba yona.* 27 Ka yona nako yeo, kgoši ya roma moleti wa yona gore a tliše hlogo ya Johane. Ka gona, moleti yoo a tloga gomme a ya a kgaola Johane hlogo ka kgolegong, 28 ke moka a tliša hlogo ya Johane ka sebjana se segolo. O ile a e fa mosetsana yola, gomme mosetsana a e fa mmagwe. 29 Ge barutiwa ba Johane ba ekwa ka seo, ba ile ba tla ba tšea setopo sa gagwe ba se boloka lebitleng.

30 Ge baapostola ba boela morago go Jesu, ba ile ba mmotša dilo ka moka tšeo ba di dirilego le go di ruta.+ 31 Ke moka yena a re go bona: “A re yeng lefelong leo le lego ka thokwana gomme le khutšenyana.”+ Ka gobane go be go na le ba bantši bao ba tlago le bao ba tlogago, ebile barutiwa ba be ba se na le nako ya go iketla gaešita le go ja. 32 Ka gona, ba tloga ka sekepe ba ya lefelong leo le lego ka thokwana gore ba be kgole le batho.+ 33 Eupša batho ba ba bona ge ba tloga gomme ba bantši ba kwa gore ba a tloga, ke moka ba kitimela moo ka maoto ba etšwa metseng ka moka, gomme ba ba fihlela pele. 34 Bjale ge Jesu a etšwa ka sekepeng, o ile a bona lešaba le legolo gomme a le šokela+ ka gobane le be le le bjalo ka dinku tšeo di se nago modiši.+ Ke moka a thoma go le ruta dilo tše dintši.+

35 Bjale ge e eba mantšiboa, barutiwa ba gagwe ba ile ba tla go yena ba re: “Lefelo le le kgole le mo go dulago batho, le nako e šetše e ile.+ 36 Ba botše gore ba sepele ba ye magaeng le metsaneng e le gore ba yo ithekela dijo.”+ 37 A re go bona: “Lena ba feng sa go ja.” Ke moka ba re go yena: “Na re swanetše go tloga re yo reka dinkgwa tšeo di lekanago ditšhelete tše 200 tša tšhipi* e le gore batho ba ba tle ba je?”+ 38 A re go bona: “Le na le dinkgwa tše kae? Eyang le yo bona!” Ge ba se na go bona gore ba na le dinkgwa tše kae, ba re: “Ke tše hlano, le dihlapi tše pedi.”+ 39 A laela batho ka moka gore ba dule ka dihlopha bjanyeng bjo botala.+ 40 Ba dula fase ka dihlopha tša ba 100 le tša ba 50. 41 Bjale a tšea dinkgwa tše hlano le dihlapi tše pedi a lebelela legodimong gomme a rapela.+ Ke moka, a ngwathaganya dinkgwa tšeo a thoma go di nea barutiwa ba gagwe gore ba di fe batho, a ba a dira se se swanago le ka dihlapi tšela tše pedi. 42 Ka gona, batho ka moka ba ja ba khora. 43 Ke moka barutiwa ba tšea mebanki e 12 yeo e tletšego ka marathana a dinkgwa, go sa balwe a dihlapi.+ 44 Dinkgwa tšeo di jelwe ke banna ba 5 000.

45 Ka ntle le go senya nako, o ile a botša barutiwa ba gagwe gore ba namele sekepe ba mo ete pele, ba ye ka lehlakoreng le lengwe la lebopo kgauswi le Betsaida, mola yena a laela lešaba gore le sepele.+ 46 Eupša ge a se na go laelana le lona, o ile a ya thabeng a yo rapela.+ 47 Ge e šetše e le mantšiboa, sekepe se be se le gare ga lewatle, eupša yena o be a le noši nageng.+ 48 Ge a bona barutiwa ba gagwe ba thatafalelwa ke go sepetša sekepe ka ge go be go tšutla moya o montši, o ile a tla go bona e sa le ka masa* a sepela godimo ga meetse, eupša go be go bonagala okare o tlile go feta moo ba bego ba le gona. 49 Ge ba mmona a sepela godimo ga meetse, ba goeletša ba re: “Na re bona pono?” 50 Ka gobane ka moka ga bona ba ile ba mmona gomme ba tšhoga. Eupša Jesu a napa a bolela le bona a re: “Le se ke la boifa! Ke nna, le se ke la tšhoga.”+ 51 Ke moka a namela sekepe seo ba bego ba le ka gare ga sona, gomme phefo ya se sa tšutla. Ge barutiwa ba gagwe ba bona se, ba ile ba makala kudu, 52 ka gobane ba be ba se ba kwešiša seo se bolelwago ke mohlolo woo a o dirilego ka dinkgwa, gomme menagano ya* bona e be e sa dutše e thatafalelwa ke go kwešiša.

53 Ge ba fihla ka mošola wa lewatle, ba tsena Genetsareta ke moka ba emiša sekepe ka tshetledi* kgauswi le lebopo.+ 54 Eupša ge a se na go tšwa ka sekepeng, batho ba ile ba mo tseba. 55 Ba ile ba kitima le tikologo yeo ka moka ba botša batho bao ba dulago moo, ba thoma go tla ba rwele batho bao ba babjago ka malao ba ba iša moo ba bego ba kwele gore o gona. 56 Kae le kae moo a bego a tsena metseng goba metsaneng goba magaeng, batho ba be ba tliša balwetši ba bona mebarakeng gomme ba mo kgopela gore ba kgwathe morumo wa seaparo sa gagwe sa ka ntle.+ Ka gona batho ka moka bao ba bego ba mo kgwatha ba be ba fola.