Psalme

103 Anke ke rete Jehofa,

Anke ke rete leina la gagwe le lekgethwa ka pelo ya ka ka moka.

 2 Anke ke rete Jehofa,

Okare nka dula ke gopola dilo ka moka tšeo a ntiretšego tšona.+

 3 O ntebalela dibe tša ka ka moka,+

Gomme o nthuša mathateng a ka ka moka.+

 4 O mphološa lehung,*+

O mpontšha lerato la gagwe le le botegago le kgaugelo.+

 5 O mpha dilo tše dibotse+ bophelo bja ka ka moka,

E le gore ke dule ke le yo moswa le go ba le maatla go swana le ntšhu.+

 6 Jehofa o swara bao ba gateletšwego ka go loka+

Ebile o ba thuša gore ba swarwe ka toka.+

 7 O tsebišitše Moshe ditsela tša gagwe,+

A tsebiša Baisiraele mediro ya gagwe.+

 8 Jehofa o na le kgaugelo ebile o na le lešoko,+

Ga a galefe ka pela ebile o na le lerato le legolo.*+

 9 A ka se dule a nyakana le diphošo tša rena,+

Le gona a ka se dule a re galefetše go ya go ile.+

10 Ga se a re swara go ya ka dibe tša rena,+

Ebile ga se a re otla go ya ka melato ya rena.+

11 Ka gobane lerato la gagwe le le botegago leo a le bontšhago bao ba mmoifago

Ke le legolo kudu go swana le ge magodimo a le kgole le lefase.+

12 Go swana le ge bohlabela bo le kgole le bodikela,

Le dibe tša rena o di lahletše kgole le rena.+

13 Go etša ge tate a kwela bana ba gagwe bohloko,

Le Jehofa o kwela bao ba mmoifago bohloko.+

14 Ka gobane o tseba gabotse kamoo re bopegilego ka gona,+

Ga a lebale gore re lerole.+

15 Motho o phela bophelo bjo bokopana go swana le bjang bjo botala,+

O swana le matšoba a naga.+

16 Ge moya o foka, letšoba leo le a hwa,

Gwa ba bjalo ka ge eka ga sa nka la ba gona.

17 Eupša Jehofa o bontšha

Bao ba mmoifago lerato la gagwe le le botegago go ya go ile,+

Gomme a bontšha ditlogolo tša bona gore o lokile.+

18 Ditlogolo tšeo di bolokago kgwerano ya gagwe+

Le tšeo di latelago ditaelo tša gagwe.

19 Setulo sa Jehofa sa bogoši se tla dula se le gona magodimong,+

Ebile o buša selo se sengwe le se sengwe.+

20 Retang Jehofa lena barongwa ba gagwe ka moka+ bao ba nago le maatla a magolo,

Lena bao le theetšago lentšu la gagwe+ le go latela melao ya gagwe.

21 Retang Jehofa lena barongwa ba gagwe ka moka,+

Bao ba mo hlankelago le go dira thato ya gagwe.+

22 Retang Jehofa lena dibopiwa tša gagwe ka moka,

Tšeo di lego mafelong ka moka ao a a bušago.