Ebangedi ya Johane
14 “Le se ke la tshwenyega.+ Bontšhang tumelo go Modimo+ le be le e bontšhe le go nna. 2 Ntlong ya Tate go na le madulo a mantši. Ge nkabe go be go se bjalo, nkabe ke se ka le botša taba ye. Eupša ke a tloga ke ya go le lokišeletša lefelo leo le yago go dula go lona.+ 3 Le gona, ge e ba ke tloga ke eya go le lokišeletša lefelo, gona ke tla boa ka le tšea ka le iša moo ke lego gona* gore moo ke lego gona le lena le be gona.+ 4 Ebile le tseba moo ke yago.”
5 Thomase+ a re go yena: “Morena, ga re tsebe moo o yago. Bjale tsela re tla e tseba bjang?”
6 Jesu a re go yena: “Ke nna tsela,+ nnete+ le bophelo.+ Ga go yo a ka tlago go Tate ge e se ka nna.+ 7 Ge nkabe le ntsebile gabotse, nkabe le tsebile le Tate. Go tloga gona bjale le tlo mo tseba, ge e le gabotse le mmone.”+
8 Filipi a re: “Morena, re bontšhe Tatago ke moka re tla kgotsofala.”
9 Jesu a re: “Wena Filipi, le ge ke bile le lena ka nako e telele gakaakaa, o ra gore ga sešo o ntseba? Yo a bonego nna o bone le Tate.+ Bjale go tla bjang gore o re: ‘Re bontšhe Tatago’? 10 Na ga o dumele gore ke na le Tate le gore Tate o na le nna?+ Dilo tšeo ke di bolelago ga se dikgopolo tša ka,+ eupša Tate yo a nago le nna o diriša nna go dira dilo tše ka moka. 11 Ntshepe ge ke re ke na le Tate le gore Tate o na le nna. Ge e ba o sa dumele seo ke se bolelago, gona dumela ka baka la dilo tšeo ke di dirago.+ 12 Ruri ke re go lena yo a dumelago go nna, le yena o tla dira dilo tšeo ke di dirago ebile o tla dira dilo tšeo di fetago tšeo nna ke di dirago+ ka gobane ke ya go Tate.+ 13 Le gona, selo le ge e le sefe seo le se kgopelago le diriša leina la ka ke tla se dira, e le gore Morwa a tagafatše Tate.+ 14 Ge le ka kgopela selo le ge e le sefe ka leina la ka, ke tla se dira.
15 “Ge e ba le nthata, le tla kwa ditaelo tša ka.+ 16 Le gona ke tla kgopela Tate gore a le fe mothuši* yo mongwe gore a be le lena go ya go ile.+ 17 Mothuši yoo ke moya o mokgethwa woo o utollago nnete+ woo batho ba bangwe ba ka se o hwetšego ka gobane ga ba o tsebe ebile ga ba o bone.+ Eupša lena le a o tseba ka gobane o na le lena ebile o dula o na le lena. 18 Nka se le tlogele le nnoši.* Ke tla boa go lena.+ 19 E se kgale, batho ba bangwe ba ka se sa mpona eupša lena le tlo mpona+ ka gobane ke tla tšwela pele ke phela gomme le lena le tlo phela. 20 Letšatšing leo le tla tseba gore ke boteeng le Tate le gore le lena le boteeng le nna ebile le nna ke boteeng le lena.+ 21 Motho yo a nthatago ke yo a amogelago melao ya ka a ba a ekwa. Le gona yo a nthatago, Tate o tla mo rata. Le nna ke tla mo rata ka ba ka dira gore a ntsebe gabotse.”
22 Judase+ (e sego Judase Isikariote) o ile a re go yena: “Morena, ke eng seo se dirago gore o nyake gore rena re go tsebe gabotse eupša batho ba bangwe ba se ke ba go tseba gabotse?”
23 Jesu ge a mo araba a re: “Ge e ba motho a nthata, o tla kwa seo ke se bolelago+ gomme Tate o tla mo rata ebile nna le Tate re tla dula le motho yoo.+ 24 Yo a sa nthatego ga a kwe seo ke se bolelago. Dilo tšeo le di kwago ga di tšwe kgopolong ya ka eupša di tšwa go Tate yo a nthomilego.+
25 “Ke le boditše dilo tše ke sa na le lena. 26 Eupša mothuši, e lego moya o mokgethwa wo Tate a tlago go o roma a diriša leina la ka o tla le ruta dilo ka moka wa ba wa le gopotša dilo ka moka tšeo ke le rutilego tšona.+ 27 Ke tla tšwela pele ke le nea khutšo yeo le e thabelago le nna gona bjale.+ Khutšo yeo ke le fago yona e fapana le yeo batho ba le fago yona. Le se ke la belaela goba la tšhoga. 28 Le kwele gore ke rile go lena, ke a tloga gomme ke tla boa go lena. Ge nkabe le nthata le be le tla thabela gore ke ya go Tate, ka gobane Tate ke yo mogolo go nna.+ 29 Ke le boditše taba ye pele e direga, e le gore le e dumele ge e direga.+ 30 Nka se sa hlwa ke bolela dilo tše dintši le lena ka gobane mmuši wa lefase le+ o a tla ebile a ka se ntire selo.+ 31 Eupša ke dira dilo tšeo Tate a ntaetšego gore ke di dire e le gore batho ba tsebe gore ke rata Tate.+ Emelelang. A re tlogeng mo.