Baheberu

8 Bjale taba e bohlokwa yeo re e bolelago še: Re na le moperisita yo a phagamego yo bjalo,+ yena yo a dutšego ka letsogong le letona la setulo sa bogoši sa Modimo yo mogolo magodimong,+ 2 ke mohlanka yo a šomelago setšhaba lefelong le lekgethwa,+ e lego tenteng ya nnete yeo e hlomilwego ke Jehofa,* e sego batho. 3 Moperisita yo mongwe le yo mongwe yo a phagamego o kgethelwa gore a neele dimpho le dihlabelo, ka gona go be go nyakega gore Jesu le yena a neele sehlabelo.+ 4 Ge nkabe a be a le mo lefaseng, e be e ka se be moperisita,+ ka gobane go šetše go na le banna bao ba neelago dimpho go ya ka Molao. 5 Mošomo o mokgethwa woo banna ba ba o dirago, o swantšhetša+ dilo tšeo di diregago legodimong.+ Taba ye e bonagetše gabotse ge Modimo a be a laela Moshe go dira tente. O ile a re go yena: “O netefatše gore o dira dilo ka moka go ya ka polane yeo ke go bontšhitšego yona kua thabeng.”+ 6 Eupša bjale Jesu yena o hweditše mošomo o bohlokwa kudu go feta wa bona, ka gobane ke mmoelanyi*+ wa kgwerano yeo e lego kaone go feta ya kgale,+ yeo e theilwego go ditshepišo tše kaone go phala tša kgale.+

7 Ge e ba kgwerano yeo ya mathomo e be e se na phošo, gona go be go ka se nyakege ya bobedi.+ 8 O bona batho phošo, ke ka baka leo a ilego a re: “‘Tsebang gore go tla nako yeo ka yona ke tlago go dira kgwerano e mpsha le setšhaba sa Isiraele le sa Juda,’ o realo Jehofa. 9 ‘E ka se swane le kgwerano yeo ke e dirilego le borakgolokhukhu ba bona letšatšing la ge ke be ke ba swara ka seatla ke ba hlahla gore ke ba ntšhe nageng ya Egepeta,+ ka gobane ba ile ba se tshepagalele kgwerano ya ka, ka gona ke ile ka tlogela go ba hlokomela,’ o realo Jehofa.”

10 “‘Kgwerano yeo ke tlago go e dira le batho ba setšhaba sa Isiraele ka morago ga nako yeo ke ye: ‘Ke tla bea melao ya ka dikgopolong tša bona gomme ka e ngwala dipelong tša bona.+ Ke tla ba Modimo wa bona gomme bona e tla ba setšhaba sa ka,’+ o realo Jehofa.

11 “‘Motho a ka se sa ruta motho yo mongwe le ngwanabo, a re: “Tsebang Jehofa!” Ka gobane ka moka ga bona ba tla be ba ntseba, go tloga ka ba maemo a fase go fihla ka ba maemo a godimo. 12 Ka gobane ke tla ba lebalela melato ya bona, ebile nka se sa gopola dibe tša bona.’”+

13 Ge a re “kgwerano e mpsha,” o dirile gore ya mathomo e felelwe ke nako.+ Bjale ge selo e le sa kgale ebile se hlagetše, se kgauswi le go timelela.+