Ebangedi ya Mateo
10 Ka gona, a bitša barutiwa ba gagwe ba 12 gomme a ba nea maatla e le gore ba kgone go raka meoya e mebe+ le go fodiša mohuta o mongwe le o mongwe wa bolwetši.
2 Maina a baapostola ba 12 ke a:+ Wa mathomo ke Simone yo a bitšwago Petro+ le ngwanabo e lego Andrea,+ Jakobo morwa wa Tsebedeo le ngwanabo e lego Johane,+ 3 Filipi le Baratholomeo,+ Thomase+ le Mateo+ yo a bego a patediša batho motšhelo, Jakobo morwa wa Alifeose le Thadeo, 4 Simone wa Mokananaya* le Judase Isikariote, yoo ka morago a ilego a rekiša Jesu.+
5 Jesu o ile a roma barutiwa ba 12 gomme a ba fa ditaelo a re:+ “Le se ke la ya bathong ba ditšhaba tše dingwe, le gona le se ke la ya motseng wa Basamaria,+ 6 go e na le moo, eyang le yo nyaka batho ba setšhaba sa Isiraele bao ba swanago le dinku tšeo di timetšego.+ 7 Ge le dutše le sepela, le bolele le re: ‘Mmušo wa magodimo o batametše.’+ 8 Fodišang balwetši,+ le tsoše bahu, le fodiše batho bao ba nago le bolwetši bja lephera, le be le rake le matemona. Le amogetše feela, ka gona le lena le neeng feela. 9 Le se ke la tšea gauta goba silifera goba koporo la e tsenya mapanteng a lena a go swara tšhelete,+ 10 goba la tšea mokotla wa dijo ge le tšea leeto, goba diaparo tše pedi goba dieta* goba lepara,+ ka gobane motho yo a šomago o swanelwa ke go fiwa dijo.+
11 “Ge le tsena motseng goba motsaneng le ge e le ofe le nyakeng yo a swanelegago go kwa molaetša wa lena gomme le dule moo go fihlela le tloga.+ 12 Ge le tsena ka ntlong le dumediše batho ba ka ntlong yeo. 13 Ge e ba ba le amogela, gona anke ba be le khutšo yeo le ba kganyogelago yona,+ eupša ge e ba ba sa le amogele, gona anke khutšo yeo e boele go lena. 14 Kae le kae moo ba sa le amogelego goba ba sa theetšego molaetša wa lena, ge le etšwa ntlong yeo goba motseng woo le thinthe lerole leo le lego maotong a lena.+ 15 Ruri ke le botša gore seo se tlago go diragalela motse woo Letšatšing la Kahlolo, e tla ba se segolo go feta seo se ilego sa diragalela naga ya Sodoma le Gomora.+
16 “Ke le roma le le bjalo ka dinku tšeo di yago gare ga diphiri. Ka gona, ebang šedi bjalo ka dinoga, le gona le beng bao ba se nago molato bjalo ka maeba.+ 17 Le itlhokomeleng ka gobane batho ba tla le iša dikgorong tša tsheko+ gomme ba le betha+ disinagogeng tša bona.+ 18 Ba tla le iša go babuši le dikgoši+ ka baka la ka. Ge le le moo le tla kgona go botša bona le ditšhaba tše dingwe ka nna.+ 19 Eupša ge ba le iša moo le se ke la tshwenyega ka gore le tlo bolela bjang goba la reng, ka gobane le tlo thušwa go bolela seo le swanetšego go se bolela ka yona nako yeo.+ 20 Ka gobane go tla ba go sa bolele lena, eupša le tla ba le bolela le thušwa ke moya o mokgethwa wo o tšwago go Tatago lena.+ 21 Le gona, motho o tla dira gore ngwanabo a bolawe, gomme tate a dira gore ngwana wa gagwe a bolawe. Ke moka bana ba hlanogela batswadi ba bona, ba ba ba dira gore ba bolawe.+ 22 Batho ka moka ba tla le hloya ka baka la leina la ka,+ eupša yo a kgotlelelago go fihla mafelelong o tla phološwa.+ 23 Ge ba le tlaiša motseng o mongwe, le tšhabele go o mongwe,+ ka gobane ruri ke re go lena, Morwa wa motho o tla fihla pele le ka fetša mošomo wa go bolela ditaba tše dibotse metseng le metsaneng ya Isiraele.
24 “Morutwana ga a fete morutiši wa gagwe, le mohlanka ga a fete mong wa gagwe.+ 25 Morutwana o tla swarwa go swana le morutiši wa gagwe* gomme mohlanka a swarwa bjalo ka mong wa gagwe.+ Ge e ba batho ba re mong wa ntlo ke Beletsebubu,*+ gona ba ka se palelwe ke go bitša ba ntlo ya gagwe ka mo go swanago. 26 Ka gona, le se ke la ba boifa, ka gobane ga go na selo seo se khupeditšwego seo se ka se kego sa khupollwa ebile ga go na sephiri seo se ka se kego sa tsebja.+ 27 Dilo tšeo ke le botšago tšona ke le leswiswing, le di bolele mosegare wa sekgalela, gomme tšeo ke le sebelago tšona, le di bolele le le godimo ga dintlo.+ 28 Le gona le se ke la boifa batho bao ba bolayago mmele eupša ba sa kgone go bolaya moya.+ Go e na le moo le boife yo a kgonago go fediša mmele le moya kua Gehenna.*+ 29 Na dithaga* tše pedi ga di rekišwe ka tšhelete ya tšhipi ya theko e nyenyane?* Eupša, ga go le e tee ya tšona yeo e ka welago fase Tatago lena a sa tsebe.+ 30 Gaešita le meriri yeo e lego dihlogong tša lena, o a tseba gore ke e mekae. 31 Ka gona le se ke la boifa, le tloga le le bohlokwa go feta dithaga tše dintši.+
32 “Ka gona, motho yo mongwe le yo mongwe yo a ipolelago pele ga batho gore ke yena morutiwa wa ka,+ le nna ke tla mmolela pele ga Tate yo a lego magodimong gore ke morutiwa wa ka.+ 33 Eupša motho le ge e le ofe yo a rego ga a ntsebe pele ga batho, le nna ke tla re ga ke mo tsebe pele ga Tate yo a lego magodimong.+ 34 Le se ke la nagana gore ke tlišitše khutšo lefaseng. Ga se ka tliša khutšo, go e na le moo ke tlišitše sabola.+ 35 Ka gobane ke tletše go dira gore motho le tatagwe ba arogane, morwedi le mmagwe ba arogane, le ngwetši le mmatswalagwe ba arogane.+ 36 Ruri ke le botša gore manaba a motho e tla ba batho ba lapeng la gabo. 37 Motho le ge e le ofe yo a ratago tatagwe kudu goba a ratago mmagwe kudu go feta nna, ga a swanelwe ke go ba morutiwa wa ka. Le gona, motho yo a ratago morwa wa gagwe kudu goba a ratago morwedi wa gagwe kudu go feta nna, ga a swanelwe ke go ba morutiwa wa ka.+ 38 Motho le ge e le ofe yo a sa nyakego go rwala kota ya gagwe ya tlhokofatšo* gomme a ntatela, ga a swanelwe ke go ba morutiwa wa ka.+ 39 Motho le ge e le ofe yo a lekago go phološa bophelo bja gagwe o tla bo loba, eupša motho le ge e le ofe yo a lobago bophelo bja gagwe ka baka la ka o tla bo hwetša gape.+
40 “Motho le ge e le ofe yo a le amogelago, o amogela le nna gomme motho le ge e le ofe yo a nkamogelago o amogela le yo a nthomilego.+ 41 Modimo o šegofatša moporofeta le moloki.+ Ka gona, motho yoo a ba amogelago ka ge e le bahlanka ba Modimo o tlo hwetša moputso woo le bona ba o hwetšago. 42 Le gona, motho le ge e le ofe yo a fago yo mongwe wa ba banyenyane ba meetse a go tonya gore a nwe ka gobane motho yoo e le morutiwa wa ka, ruri ke le botša gore o tla hwetša moputso wa gagwe.”+