Hesekiele

9 Ke moka a nkgoeletša ka lentšu la go hlaboša, a re: “Bitša bao ba tlago go otla motse wo, gomme yo mongwe le yo mongwe a tle a swere sebetša sa gagwe sa go tlo o fediša.”

2 Ke ile ka bona banna ba tshelelago ba etšwa ka thoko ya keiti ya ka godimo+ yeo e lebeletšego ka leboa, gomme yo mongwe le yo mongwe a swere sebetša sa go bolaya ka seatleng. Go be go na le monna yo mongwe gape mo gare ga bona yo a bego a apere lešela la linene, mo lethekeng o be a beile selo sa go swara enke sa bangwaledi, ke moka ba tsena ba ema kgauswi le aletare ya koporo.+

3 Ke moka letago la Modimo wa Isiraele+ la tloga mo le bego le le gona ka godimo ga bakerubi la ya mojakong wa tempele,+ gomme Modimo a goeletša monna yo a bego a apere lešela la linene, yoo lethekeng a bego a beile selo sa go swara enke sa bangwaledi. 4 Jehofa a re go yena: “Sepela motse wa Jerusalema ka moka, o swaye diphatla tša batho bao ba kwago bohloko le bao ba nyamišwago+ ke dilo ka moka tše di šišimišago tšeo di dirwago mo motseng.”+

5 A bolela le batho bale ba bangwe ke theeditše a re: “Mo šaleng morago le yeng motseng ka moka gomme le bolaye batho ba moo. Le se ke la ba le kwelobohloko,* ebile le se ke la ba le lešoko le gatee.+ 6 Le bolaye mokgalabje, lesogana, kgarebe, ngwana yo monyenyane le mosadi.+ Eupša le se ke la batamela motho le ge e le ofe yo a nago le leswao.+ Le thome ka sekgethweng sa ka.”+ Ka gona ba thoma ka banna ba bagolo bao ba bego ba le pele ga tempele.+ 7 Ke moka a re go bona: “Šilafatšang tempele ye, le tlatše malapa a yona ka ditopo tša bao ba bolailwego ka sehlogo.+ Sepelang!” Ba napa ba sepela ba yo bolaya batho ba mo motseng.

8 Ge ba dutše ba bolaya batho bao, ba ile ba tlogela nna feela. Ke ile ka khunama ka inamiša sefahlego ka goeletša ka re: “Joo, Mmuši Morena Jehofa! Na ge o ntšhetša bogale bja gago godimo ga Jerusalema o tlo fediša Baisiraele ba ka moka bao ba šetšego?”+

9 A re go nna: “Molato wa batho ba Isiraele le ba Juda ke o mogolo kudu,+ naga e tletše madi a batho bao ba bolailwego,+ motse wona o tletše ka batho bao ba se nago toka,+ ka gobane ba re: ‘Jehofa o tlogetše naga ye, ebile Jehofa ga a bone.’+ 10 Eupša ge e le nna nka se ba kwele bohloko, ebile nka se ba šokele.+ Ke tla ba otla go ya ka dilo tšeo ba di dirilego.”

11 Ke moka ka bona monna yo a aperego lešela la linene, yo a bego a beile selo sa go swara enke lethekeng, a re: “Ke dirile kamoo o ntaetšego ka gona.”