Baroma

14 Amogelang motho yo a se nago tumelo e tiilego,+ ebile le se ke la mo ahlola ka baka la ge a sa nagane go swana le lena. 2 Motho yo a nago le tumelo e tiilego o ja dilo ka moka, eupša motho yo a se nago tumelo e tiilego o ja merogo feela. 3 Yo a jago dilo ka moka a se ke a nyatša yo a sa jego dilo ka moka, le yo a sa jego dilo ka moka a se ke a ahlola yo a jago dilo ka moka,+ ka gobane Modimo o amogetše motho yoo. 4 Wena o mang gore o ka ahlola mohlanka wa motho yo mongwe?+ Ga se mohlanka wa gago eupša ke mohlanka wa Modimo, ebile Modimo ke yena a ka dirago phetho ya gore dilo tšeo motho yo a di dirago di lokile goba ga se tša loka.+ Ka ge Jehofa* a mo thuša o tla atlega.

5 Motho yo mongwe o tšea letšatši le lengwe le le bohlokwa go feta a mangwe,+ mola motho yo mongwe yena a nagana gore matšatši ka moka a a swana.+ Bjale anke motho yo mongwe le yo mongwe a kgodišege ka mo go feletšego gore phetho yeo a e dirago e nepile. 6 Yo a bonago letšatši le lengwe le le bohlokwa go feta matšatši a mangwe o dira bjalo ka gobane a hlompha Jehofa. Le gona, yo a jago dilo ka moka, o dira bjalo ka gobane a hlompha Jehofa ebile a mo leboga+ gore o mo file dijo tšeo, le yo a sa jego dilo ka moka o hlompha Jehofa ebile o a mo leboga.+ 7 Go no bolela nnete, ga go na le o tee wa rena yo a iphelelago,+ ebile ga go na le o tee wa rena yo a ikhwelago. 8 Ge re phela re phelela Jehofa+ ebile ge re ehwa re hwela Jehofa. Ka gona ge re phela le ge re ehwa re ba Jehofa.+ 9 Kriste o ile a hwa a ba a tsošwa bahung e le gore e tle e be Morena wa bao ba phelago le bao ba hwilego.+

10 Ke ka baka la eng o ahlola ngwaneno?+ Le gona ke ka baka la eng o mo nyatša? Ka moka ga rena re tlo ahlolwa ke Modimo.+ 11 Ka gobane Mangwalo a re: “Jehofa o re, ‘Ke ikana ka nna yo a phelago,+ batho ka moka ba tla khunama pele ga ka gomme ba dira keno ya gore ba tla dula ba mpotegela.’”+ 12 Ka gona yo mongwe le yo mongwe wa rena o tla ikarabela go Modimo.+

13 Bjale a re tlogeleng go ahlolana,+ go e na le moo a re šomeng ka thata gore re se ke ra dira selo le ge e le sefe seo se ka fokodišago tumelo ya ngwanabo rena goba sa dira gore a we.+ 14 Ka ge ke le molatedi wa Morena Jesu, ke a tseba gore ga se gore dilo tšeo re di jago di šilafetše.+ Eupša ge motho a nagana gore selo se itšego se šilafetše, gona o tla be a dira phošo ge a se ja. 15 Ge e ba o eja dijo tšeo o tsebago gore di kgopiša ngwaneno, o tla be o bontšha gore ga o mo rate.+ Gopola gore Kriste o mo hwetše, ka gona o se ke wa senya tumelo ya gagwe ka dilo tšeo o di jago.+ 16 Ka gona le se ke la nea motho le ge e le ofe lebaka la go bolela gampe ka dilo tše dibotse tšeo le di dirago. 17 O ka se ke wa tsena Mmušong wa Modimo ka baka la dilo tšeo o di jago goba tšeo o di nwago,+ eupša sa bohlokwa kudu ke gore o be yo a lokilego, yo a nago le khutšo le lethabo tšeo di tlišwago ke moya o mokgethwa. 18 Ka gobane motho yo a nago le dika tše ebile a šomela Kriste, Modimo o a mo amogela ebile batho ba a mo hlompha.

19 Ka gona a re šomeng ka thata gore re dire dilo tšeo di re thušago go ba le khutšo+ le tšeo di re thušago gore re kgone go agana.+ 20 Tlogelang go senya mošomo wa Modimo ka baka la dijo feela.+ Ke nnete gore le ka ja dilo ka moka, eupša ke phošo gore le je dilo tšeo di tlago go dira gore tumelo ya batho ba bangwe e fokole.+ 21 Go kaone gore o se ke wa ja nama, goba wa nwa beine goba wa dira selo le ge e le sefe seo se ka dirago gore tumelo ya ngwaneno e fokole.+ 22 Dilo tšeo o di dumelago ge go tliwa tabeng ye, di magareng ga gago le Modimo. O tlo thaba ge e ba o sa ikwe molato ge o dira dilo tšeo o bonago di lokile. 23 Eupša ge o na le dipelaelo ka dilo tšeo o di jago, wa no tšwela pele o di ja, gona o na le molato ka gobane o tla be o se na tumelo ya gore o swanetše go ja dilo tšeo o di jago. Dilo ka moka tšeo motho a di dirago a se na tumelo ke sebe.