Ebangedi ya Johane
1 Mathomong Lentšu+ o be a le gona, Lentšu o be a na le Modimo,+ gomme Lentšu e be e le modimo.+ 2 O be a na le Modimo go tloga mathomong. 3 Modimo o mo dirišitše go dira dilo ka moka+ ebile ga go na selo le se setee seo se lego gona seo Modimo a se dirilego a sa diriše yena.
4 Bophelo bo bile gona ka yena gomme bophelo bjoo e bile seetša sa batho.+ 5 Le gona seetša se bonega leswiswing+ eupša leswiswi ga se la kgona go fenya seetša.
6 Go ile gwa tla monna yo a bego a romilwe ke Modimo. Leina la gagwe e be e le Johane.+ 7 Monna yoo o tlile e le hlatse gore a nee bohlatse ka seetša+ e le gore batho ba mehuta ka moka ba dumele ka baka la seo a se bolelago. 8 Monna yoo e be e se yena seetša+ seo, eupša o be a tlile go tlo hlatsela seetša seo.
9 Eupša seetša sa nnete seo se bonegelago mehuta ka moka ya batho se be se le kgauswi le go tla lefaseng.+ 10 Lentšu o be a le lefaseng+ ebile lefase le bile gona go dirišwa yena,+ eupša lefase le be le sa mo tsebe. 11 O tlile ga gabo, eupša batho ba gabo ga se ba ka ba mo amogela. 12 Le ge go le bjalo, batho ka moka bao ba ilego ba mo amogela le go bontšha gore ba dumela go yena,+ o ba file tshwanelo ya go ba bana ba Modimo.+ 13 Le gona ba tswetšwe ke Modimo eupša ga se ba tswalwa ke batho* goba ga se ba tswalwa ka baka la go rata ga batswadi* goba ka baka la go rata ga motho, eupša ba tswetšwe ke Modimo.+
14 Ka gona, Lentšu o bile nama,+ a tla a dula le rena. Le gona re bone bogolo bja gagwe e lego bogolo bjoo bo swanelago morwa yo a tswetšwego a nnoši wa tatagwe.+ O be a bolela nnete ebile Modimo o be a dula a mo amogela. 15 (Johane o ile a nea bohlatse ka yena. O ile a goeletša a re: “Yo ke yena ke boletšego ka yena ka re, ‘yo a tlago ka morago ga ka, ke yo mogolo go mpheta ka gobane o bile gona pele ga ge nka ba gona.’”)+ 16 Ka ge botho bja gagwe bjo bogolo bo tletše wa go falala, ga a kgaotše go re bontšha bjona. 17 Modimo o file batho Molao a diriša Moshe.+ Eupša botho bjo bogolo+ le nnete o re bontšhitše tšona a diriša Jesu Kriste.+ 18 Ga go na motho yo a kilego a bona Modimo ka nako le ge e le efe.+ Eupša modimo yo a tswetšwego a nnoši+ yo a lego ka lehlakoreng* la Tate+ ke yena yo a mo hlalositšego.+
19 Bajuda ba ile ba roma baperisita le Balefi go tšwa Jerusalema gore ba botšiše Johane gore ke yena mang.+ 20 Ka gona, Johane o ile a ba araba kapelapela a re: “Ga se nna Kriste.” 21 Ke moka ba mmotšiša ba re: “Bjale ke wena mang? Na ke wena Eliya?”+ A ba araba a re: “Aowa, ga ke yena.” Ba mmotšiša gape ba re: “Na o moporofeta?”+ A ba araba a re: “Aowa!” 22 Ka gona ba mmotšiša gape ba re: “Ke wena mang? Re arabe e le gore re kgone go yo botša bao ba re romilego. Bjale o re ke wena mang?” 23 A re: “Ke nna motho yo a goeletšago a le lešokeng a re: ‘Lekalekanyang tsela ya Jehofa’*+ go ya ka seo moporofeta Jesaya a se boletšego.”+ 24 Batho bao ba bego ba botšiša ba be ba romilwe ke Bafarasei. 25 Ka gona, ba mmotšiša ba re: “Bjale ke ka baka la eng o kolobetša ge e ba o se Kriste goba Eliya goba o se moporofeta yo go boletšwego gore o tla tla?” 26 Johane a ba araba a re: “Nna ke kolobetša batho ka meetse. Eupša gare ga lena go eme motho yo le sa mo tsebego, 27 yo a tlago ka morago ga ka ebile ga ke swanelege go tlemolla lerala la seeta* sa gagwe.”+ 28 Dilo tše di diragetše Bethania ka bohlabela bja Noka ya Jorodane, moo Johane a bego a kolobetša batho gona.+
29 Letšatšing le le latelago, o ile a bona Jesu a etla go yena gomme a re: “Bonang Kwana+ ya Modimo yeo e tlošago sebe+ sa lefase!+ 30 Yo ke yena ke boletšego ka yena ka re, ‘Yo a tlago ka morago ga ka ke yo mogolo go mpheta ka gobane o bile gona pele ga ge nka ba gona.’+ 31 Le nna ke be ke sa mo tsebe, eupša lebaka leo le dirilego gore ke kolobetše batho ka meetse e be e le go thuša Isiraele gore e mo tsebe.”+ 32 Johane a buša a nea bohlatse, a re: “Ke bone moya o mokgethwa o theoga go tšwa legodimong o le bjalo ka leeba gomme wa dula godimo ga gagwe.+ 33 Le nna ke be ke sa mo tsebe, eupša Modimo yo a nthomilego gore ke kolobetše batho ka meetse o itše go nna: ‘Yoo o bonago moya o mokgethwa o theoga gomme wa dula godimo ga gagwe,+ ke yena yoo a kolobetšago batho ka moya o mokgethwa.’+ 34 Nna ke bone seo ebile ke neile bohlatse bja gore yo ke yena Morwa wa Modimo.”+
35 Bjale letšatšing le le latelago, Johane o be a eme le barutiwa ba gagwe ba babedi, 36 ke moka ya re ge a bona Jesu a sepela a re: “Bonang Kwana+ ya Modimo ke yela!” 37 Ge barutiwa bao ba babedi ba Johane ba ekwa a bolela seo, ba ile ba latela Jesu. 38 Ke moka Jesu a retologa gomme ge a ba bona ba mo latela, a re go bona: “Le nyaka eng?” Bona ba re go yena: “Rabi (yeo e bolelago gore Morutiši), o dula kae?” 39 A re go bona: “Etlang gomme le tla bona.” Ka gona ba ya gomme ba bona mo a bego a dula gona, ke moka ba dula le yena letšatšing leo. E be e le mo e ka bago ka iri ya bone thapama.* 40 Andrea+ morwarrago Simone Petro e be e le yo mongwe wa barutiwa ba babedi bao ba kwelego seo Johane a se boletšego gomme ba latela Jesu. 41 Ka morago ga moo, Andrea o ile a ya go nyaka morwarragwe, e lego Simone. Ge a mo hweditše o ile a re go yena: “Re hweditše Mesia”+ (lentšu Mesia le ra gore “Kriste”). 42 Ke moka a mo iša go Jesu. Ge Jesu a mo lebelela a re go yena: “Wena o Simone+ morwa wa Johane. O tla bitšwa Kefase” (leina Kefase le ra gore “Petro”).+
43 Letšatšing le le latelago Jesu o be a nyaka go ya Galilea. Ke moka o ile a hwetša Filipi+ gomme a re go yena: “Eba morutiwa wa ka.” 44 Filipi o be a etšwa Betsaida, e lego motse woo Andrea le Petro ba bego ba etšwa go wona. 45 Ka morago ga moo, Filipi a ya go nyaka Nathaniele.+ Ke moka ge a mo hweditše a re go yena: “Re hweditše yoo go ngwadilwego ka yena Molaong wa Moshe le yoo Baporofeta ba ngwadilego ka yena, e lego Jesu morwa wa Josefa+ yo a tšwago Natsaretha.” 46 Eupša Nathaniele a re go yena: “Na go na le selo se sebotse se se ka tšwago Natsaretha?” Filipi a re go yena: “Etla o bone.” 47 Ke moka Jesu a bona Nathaniele a etla go yena gomme a bolela ka yena a re: “Bonang Moisiraele yoo a se nago boikaketši.”+ 48 Nathaniele a re go yena: “O tseba bjang gore ke nna motho wa mohuta mang?” Jesu a mo araba a re: “Ke go bone pele Filipi a ka go bitša ge o be o le ka fase ga mogo.” 49 Nathaniele a araba a re: “Rabi, ruri o Morwa wa Modimo, o Kgoši ya Isiraele.”+ 50 Jesu a mo araba a re: “Na o dumela go nna ka gobane ke go boditše gore ke go bone o le ka fase ga mogo? Bjale o tla bona dilo tše di makatšago kudu go feta tše.” 51 Ke moka a oketša ka gore: “Ka nnete ke le botša gore le tla bona legodimo le bulegile gomme barongwa ba Modimo ba rotogela legodimong ebile ba theogela go Morwa wa motho.”+