Tito

3 Tšwela pele o ba gopotša gore ba kwe mebušo le balaodi,+ ba itokišeletše go dira mošomo o mongwe le o mongwe o mobotse, 2 ba se ke ba bolela motho gampe, ba se ke ba rata dingangišano, ebile e se ke ya ba dinganga,+ eupša ka mehla ba bontšhe batho ka moka botho.+ 3 Ka gobane le rena re kile ra hloka tlhaologanyo, re sa kwe, re arošwa, re le makgoba a dikganyogo le menate ya mehutahuta, re dira dilo tše mpe, re jelana mona, re dira dilo tša go šišimiša ebile re hloyane.

4 Eupša Modimo, yena Mophološi wa rena,+ o bontšhitše batho botho bja gagwe le gore o a ba rata. 5 (O re phološitše ka baka la ge a na le kgaugelo,+ e sego ka baka la dilo le ge e le dife tše di lokilego tšeo re di dirilego.)+ O re phološitše ge a be a re hlwekiša, e lego seo se dirilego gore re phele,+ le ka go re mpshafatša ka moya wa gagwe o mokgethwa.+ 6 O dirišitše Jesu Kriste, yena Mophološi wa rena,+ go re nea moya o mokgethwa ka bontši, 7 e le gore ka botho bja gagwe bjo bogolo go tle go bolelwe gore re lokile,+ gomme re be bajabohwa+ bao ba nago le kholofelo ya go phela go ya go ile.+

8 Dilo tše di boletšwego ke nnete, gomme ke nyaka gore o dule o di gatelela ka mehla, e le gore bao ba dumetšego go Modimo ba dule ba tshwenyegile ka go dira mešomo e mebotse. Dilo tše ke tše dibotse ebile di hola batho.

9 Wena o se ke wa ngangišana le batho ka dilo tša bošilo le go hlwa o nyakišiša meloko, le go ngangišana ka Molao wa Moshe ka gobane dilo tše ka moka ga di na mohola ebile ke tša lefeela.+ 10 Ge e le motho yo a kgothaletšago gore go be le dihlotswana,+ o sepelele kgole le yena+ ka morago ga gore o mo kgale* gatee goba gabedi,+ 11 ka ge o tseba gore motho yo bjalo o arogile tseleng ya nnete, o dira sebe ebile o a ikahlola.

12 Ge ke roma Aretemase goba Tigiko+ go wena, o dire sohle se o ka se kgonago gore o tle o nketele Nikopoli, ka gobane ke feditše le pelo gore ke fetše marega ke le moo. 13 O dire sohle se o ka se kgonago gore o thuše Tsenase yo a tsebago Molao wa Moshe gabotse le Apollo gore ba hwetše dilo ka moka tšeo ba tlago go di hloka ge ba le leetong la bona.+ 14 Eupša anke batho ba gabo rena le bona ba tšwele pele ba ithuta go dira dilo tše dibotse e le gore ba tle ba thuše ge go nyakega thušo kapejana,+ le gore ba dule ba dira mediro e mebotse.*+

15 Batho ka moka bao ba nago le nna ba a go dumediša. Ntumedišetše badumedigotee le rena bao ba re ratago.

Anke ka moka ga lena Modimo a le bontšhe botho bja gagwe bjo bogolo.