Baroma
13 Motho yo mongwe le yo mongwe a a hlomphe babuši,+ ka gobane Modimo ke yena a ba dumelelago gore ba buše.+ Ke yena a ba filego maatla* a gore ba buše.+ 2 Bjale ge e ba re sa kwe babuši bao ebile re lwantšhana le bona, re tla be re elwa le Modimo. Bao ba sa hlomphego bao ba bušago, ba tlo otlwa. 3 Batho bao ba dirago dilo tše dibotse ga ba tšhabe babuši, eupša batho bao ba dirago dilo tše mpe ba a ba tšhaba.+ Ge o sa nyake go tšhaba babuši, tšwela pele o dira dilo tše dibotse+ gomme ba tla go swara gabotse. 4 Ba šomela Modimo e le gore ba hole wena. Eupša o swanetše go tšhoga ge e ba o dira dilo tše mpe ka gobane ba filwe maatla a go otla batho bao ba dirago dilo tše mpe. Ke bahlanka ba Modimo ebile ba otla batho bao ba dirago dilo tše mpe.
5 Le na le mabaka a kwagalago a gore le hlomphe babuši, e sego feela ka gobane le tšhaba gore ba tlo le otla eupša ka gobane le nyaka go ba le matswalo a mabotse.+ 6 Mabaka a ke ona a dirago gore le patele makgetho. Ka gobane Modimo o diriša babuši bao gore ba dule ba dira dilo tšeo di holago batho. 7 Efang batho ka moka dilo tšeo le swanetšego go ba fa tšona. Bao ba swanetšego go hwetša lekgetho, ba neeng mehuta ka moka ya lekgetho.+ Bao ba nyakago le ba kwa, ba kweng.+ Bao ba nyakago le ba hlompha, ba hlompheng.+
8 Le se ke la kolotiša dilo tšeo le ka se kgonego go di patela eupša sekoloto setee feela seo le swanetšego go ba le sona, ke go rata batho.+ Ka gobane motho yo a ratago batho ba bangwe o dira seo molao o se bolelago.+ 9 Ka gobane molao wo o rego: “O se ke wa hlotlola,*+ o se ke wa bolaya,+ o se ke wa utswa,+ o se ke wa duma go tšea dilo tša batho ba bangwe,”+ le taelo e nngwe le e nngwe yeo e lego gona, di akareditšwe ka lefoko le letee leo le rego: “O rate moagišane wa gago ka mokgwa wo o ithatago ka wona.”+ 10 Motho yo a ratago moagišane wa gagwe ga a mo sware gampe.+ Ka gona, ge motho a rata moagišane wa gagwe, o tla be a ekwa seo molao o se bolelago.+
11 Tšwelang pele le dira dilo tše, ka gobane nako ya gore le tsoge borokong e fihlile.+ Nako ya gore re phološwe e kgauswi kudu go feta nakong ya ge re be re thoma go ba Bakriste. 12 Bošego ke bja matlagosa, letšatši le batametše. Ka gona, a re tlogeleng go dira dilo tša go sepedišana le leswiswi+ gomme re šomiše dibetša tša seetša.+ 13 A re itshwareng gabotse+ bjalo ka ge batho ba itshwara gabotse mosegare. Re se ke ra ya menyanyeng ya go se laolege, ra tagwa, ra itshwara gampe ka tša thobalano, ra itshwara gampe re sa jewe ke dihlong*+ ebile re se ke ra ba le ditshele goba ra jela batho ba bangwe mona.+ 14 Eupša ekišang Morena Jesu Kriste.+ Le gona le se ke la nagana e sa le pele gore le tlo kgotsofatša bjang dikganyogo tša lena tše mpe.+