Bakorinthe ba Pele

1 Nna Paulo yo a biditšwego go ba moapostola+ wa Kriste Jesu go ya kamoo Modimo a ratago ka gona le Sostene ngwanabo rena, re le ngwalela lengwalo le. 2 Re ngwalela phuthego ya Modimo yeo e lego Korinthe,+ ya batho bao ba kgethilwego gore e be ba bakgethwa, bao e lego balatedi ba Kriste Jesu.+ Le biditšwe gore le be ba bakgethwa gotee le batho ka moka bao ba bitšago leina la Morena wa rena Jesu Kriste,+ yoo e lego Morena wa rena ka moka. Ke re:

3 Eka Modimo Tatago rena le Morena Jesu Kriste ba ka le bontšha botho bjo bogolo le go dira gore le be le khutšo.

4 Ke dula ke leboga Modimo ka baka la botho bjo a le bontšhitšego bjona bjalo ka balatedi ba Kriste Jesu. 5 Le šegofaditšwe kudu ka baka la ge le le boteeng le yena. Ke ka baka leo le kgonago go kwešiša lentšu la Modimo gabotse le go le botša batho ba bangwe.+ 6 Le kgodišegile gore molaetša wa mabapi le Kriste+ ke nnete, 7 ke ka baka leo le sa hlokego selo ge le sa dutše le letetše gore Morena wa rena Jesu Kriste a utollwe.+ 8 Modimo o tla le matlafatša go fihla bofelong, e le gore ka letšatši la Morena wa rena Jesu Kriste+ go se be le motho yo a le latofatšago. 9 Modimo yo a le biditšego gore le be bagwera ba Morwa wa gagwe Jesu Kriste Morena wa rena, o a botega.+

10 Banabešo, ke le kgothatša ka leina la Morena wa rena Jesu Kriste gore ka moka ga lena ge le bolela le dumelelane, le gore go se be le dikarogano gare ga lena.+ Eupša le swanetše go bontšha gore le na le botee ka tsela yeo le naganago ka yona le yeo le bonago dilo ka yona.+ 11 Banabešo, batho ba bangwe go tšwa lapeng la Klowe ba mpoditše gore ga le kwane. 12 Ke bolela se ka gobane ba bangwe ba re: “Nna ke wa Paulo,” ba bangwe ba re: “Nna ke wa Apollo,”+ ba bangwe ba re: “Nna ke wa Kefase,”* mola ba bangwe ba re: “Nna ke wa Kriste.” 13 Na Kriste o arogane? Na Paulo ke yena a ilego a kokotelwa koteng gore le phološwe? Goba na le kolobeditšwe ka leina la Paulo? 14 Ke leboga Modimo gore ga se ka kolobetša le o tee wa lena ge e se Krispo+ le Gayo,+ 15 e le gore go se be le yo a tlago go bolela gore o kolobeditšwe ka leina la ka. 16 Ke kolobeditše le batho ka moka bao ba dulago ntlong ya Stefanase.+ Ga ke gopole go na le ba bangwe bao ke ilego ka ba kolobetša. 17 Kriste o nthomile gore ke tšame ke bolela ditaba tše dibotse,+ e sego gore ke tšame ke kolobetša batho. Ga se a nthoma gore ke bolele ditaba tše dibotse ke diriša mantšu a dirutegi, e le gore lehu la gagwe koteng ya tlhokofatšo* le se ke la dirwa leo le se nago mohola.

18  Batho bao ba tlago go fedišwa ba nyatša molaetša wa gore Kriste o bolaetšwe koteng ya tlhokofatšo,+ eupša rena bao re phološwago re bona molaetša wo o bontšha gore Modimo o na le maatla.+ 19 Ka gobane mangwalo a re: “Ke tla dira gore bohlale bja batho bao ba hlalefilego bo fele, ebile ka gana le maano a bao ba nago le tlhaologanyo.”+ 20 Motho yo bohlale o kae? O kae ramolao? O kae motho yo a ratago dingangišano lefaseng le? Na Modimo ga se a dira gore bohlale bja lefase le e be bošilo? 21  Batho ba lefase le ga ba tsebe Modimo+ ka gobane ba tshepa bohlale bja bona.+ Modimo o bone go swanetše gore a phološe bao ba dumelago molaetša woo re o bolelago, e lego molaetša woo ba bangwe ba o bonago e le wa bošilo.+ Seo se bontšha bohlale bja Modimo.

22 Bajuda ba nyaka mehlolo,+ mola Bagerika ba nyaka bohlale. 23 Eupša rena re bolela molaetša wa gore Kriste o bolaetšwe koteng. Molaetša wo o kgopiša Bajuda, gomme batho ba ditšhaba ba kwa e le wa bošilo.+ 24 Le ge go le bjalo, go Bajuda le Bagerika bao ba biditšwego, Kriste o bontšha gore Modimo o bohlale ebile o na le maatla.+ 25 Dilo tša Modimo tšeo batho ba bonago e le bošilo, di hlalefile go ba feta, gomme dilo tša Modimo tšeo batho ba bonago di se na maatla, di na le maatla go ba feta.+

26 Banabešo le a bona gore go ya ka motho, batho bao Modimo a ba kgethilego ga se ba bantši ba lego bohlale,+ ga se ba bantši ba nago le maatla, ebile ga se ba bantši ba belegetšwego ka bogošing.+ 27 Eupša Modimo o kgethile batho bao batho ba bangwe ba bonago eka ke mašilo e le gore a leše ba bohlale dihlong. O kgethile bao ba se nago maatla e le gore a leše bao ba nago le maatla dihlong.+ 28 O kgethile bao batho ba ba nyatšago le go ba tšeela fase, a kgetha le dilo tšeo batho ba di bonago e se selo, e le gore go fedišwe dilo tšeo batho ba di tšeelago godimo.+ 29 O dirile se e le gore go se be le motho yo a ikgantšhago pele ga gagwe. 30 Eupša Modimo ke yena a dirago gore re be le botee le Kriste Jesu, yo a re tlišeditšego bohlale bjo bo tšwago go yena. Modimo o dira gore re be ba ba lokilego+ le ba bakgethwa+ ka Kriste Jesu, ebile o re lokolotše a diriša sehlabelo sa Jesu,*+ 31 go swana le ge mangwalo a re: “Yo a ikgantšhago, a ikgantšhe ka Jehofa.”*+