Ebangedi ya Luka

24 Eupša letšatšing la pele la beke, ba ile ba ya lebitleng e sa le ka masa ba swere makhura a go nkga bose ao ba bego ba a lokišeleditše.+ 2 Le ge go le bjalo, ba ile ba hwetša leswika leo le bego le tswaletše mojako wa lebitla le tlošitšwe.+ 3 Ke moka ge ba tsena ka moo lebitleng, ba ile ba hwetša setopo sa Morena Jesu se se gona.+ 4 Ge ba sa dutše ba makaditšwe ke seo, go ile gwa tla banna ba babedi ba apere diaparo tša go phadima gomme ba ema kgauswi le bona. 5 Ka mokgwa woo basadi bao ba bego ba tšhogile ka gona, ba be ba lebeletše fase ebile ba sa nyake le go lebelela banna bao. Ka gona banna bao ba re go bona: “Ke ka baka la eng le nyaka yo a phelago go bao ba hlokofetšego?”+ 6 Motho yo le mo nyakago ga a gona mo, o tsošitšwe bahung. Na le sa gopola gore o ile a reng go lena ge a be a le Galelia? 7 O ile a re Morwa wa motho o tla rekišetšwa badiradibe gomme a kokotelwa koteng ke moka ka letšatši la boraro a tsoga bahung.”+ 8 Ba napa ba gopola seo a se boletšego,+ 9 gomme ba tloga lebitleng ba boela morago, ba botša baapostola ba Jesu ba 11 le batho ba bangwe ka moka.+ 10 Basadi bao ba bego ba botša baapostola ba Jesu ditaba tšeo e be e le Maria Magdalena, Johana le Maria mmago Jakobo, le basadi ba bangwe ka moka bao ba bego ba na le bona. 11 Eupša dilo tšeo basadi bao ba bego ba di bolela di be di bonagala eka ke ditšiebadimo go bona, ebile ba be ba sa ba tshepe.

12 Eupša Petro o ile a emelela, a kitimela lebitleng. Ge a fihla moo, a hlodimela ka gare ga lona. O ile a hwetša go šetše mašela a linene feela. Ka gona a tloga a tšama a ipotšiša gore go ka ba go diregile eng.

13 Bjale barutiwa ba babedi ba ile ba tloga ba ya motsaneng woo o bitšwago Emause ka lona letšatši leo. Motse woo o be o le bokgole bja dikhilomithara tše e ka bago tše 11* go tloga Jerusalema. 14 Ebile ba be ba boledišana ka dilo ka moka tšeo di bego di diragetše.

15 Bjale ge ba be ba dutše ba boledišana ka dilo tše, Jesu o ile a tla kgauswi le bona gomme a thoma go sepela le bona, 16 eupša ba be ba sa kgone go bona gore ke yena.+ 17 A re go bona: “Gabotsebotse le swere efe e kgolo?” Ke moka ba ema gomme ba bonagala ba nyamile. 18 Morutiwa yo mongwe yo a bitšwago Kleopa a re go yena: “Go tlile bjang gore o se ke wa tseba seo se sa tšwago go direga Jerusalema mola o dula gona? Goba kganthe ga o dule mo?”* 19 A re go bona: “Le ra dilo dife?” Ba re: “Re ra dilo tšeo di diragaletšego Jesu wa Monatsaretha.+ O ile a bontšha gore ke yena moporofeta ebile o be a dira dilo tšeo di makatšago pele ga Modimo le batho ka moka. Le gona, dilo tšeo a bego a di bolela di be di le maatla.+ 20 Baperisita ba rena ba bagolo le babuši ba bangwe ba ile ba mo iša go bao ba swanetšego go mo ahlolela lehu+ gomme ba mo kokotela koteng. 21 Eupša re be re nagana gore monna yo ke yena yo a tlago go phološa Isiraele.+ Ka ntle le dilo tše ka moka, le ke letšatši la boraro dilo tše di diregile. 22 Le gona, re ile ra makatšwa ke dilo tšeo basadi ba bangwe bao le bona e bego e le barutiwa ba ilego ba di bolela, ka gobane ba be ba ile lebitleng e sa le mesong+ 23 gomme ba se hwetše setopo sa Jesu. Ge ba boa ba re botša gore ba bone le barongwa bao ba ilego ba ba botša gore Jesu o a phela. 24 Ke moka ba bangwe ba batho bao ba bego ba na le rena ba ile ba ya lebitleng,+ ba hwetša dilo di le ka mokgwa woo basadi bao ba bego ba boletše ka gona ebile ga se ba hwetša setopo sa Jesu.”

25 Ka gona Jesu a re go bona: “Lena ba dihlogo tše thata, ke ka baka la eng le diega go dumela dilo ka moka tše baporofeta ba di boletšego? 26 Kriste o be a swanetše go tlaišega ka tsela+ ye e le gore a tle a hlomphiwe.”+ 27 O ile a ba hlalosetša dilo ka moka tšeo di bolelago ka yena ka Mangwalong. O ile a thoma ka tšeo di ngwadilwego ke Moshe le tšeo di ngwadilwego ke baporofeta ka moka.+

28 Ge ba le kgauswi le go fihla motsaneng woo ba bego ba eya go wona, o ile a itira eka o tšwela pele ka leeto. 29 Eupša ba ile ba mo kgopela gore a se ke a fetela pele, ba re: “Dula le rena ka gobane letšatši le šetše le diketše ebile leswiswi le kgauswi le go swara.” Ge ba realo, a ya ntlong ya bona a dula le bona. 30 Ge a be a dutše tafoleng le bona, o ile a tšea senkgwa a rapela, a se ngwathaganya ke moka a ba fa sona.+ 31 Ka morago ga moo, mahlo a bona a ile a bulega gomme ba lemoga gore ke yena, eupša o ile a nyamalala pele ga bona.+ 32 Ba boledišana ba re: “Ke ka baka leo a ilego a tloga a re kgoma dipelo ge a be a bolela le rena ge re be re le tseleng, le ge a be a re hlalosetša Mangwalo.” 33 Ba napa ba emelela ka yona nako yeo gomme ba boela Jerusalema. Ge ba fihla moo ba ile ba hwetša baapostola ba 11 ba na le barutiwa ba bangwe. 34 Baapostola le barutiwa bao ba ile ba re: “Ka nnete Morena o tsošitšwe bahung ebile Simone o mmone!”+ 35 Ke moka ba anega dilo tšeo di diragetšego ge ba be ba le tseleng, ba ba ba anega le gore ba ile ba mo tseba ge ba bona a ngwathaganya senkgwa.+

36 Ge ba sa dutše ba bolela ka dilo tše, Jesu o ile a tla a ema gare ga bona a re: “Anke le be le khutšo.”+ 37 Eupša ka ge ba be ba gakanegile ebile ba tšhogile, ba ile ba nagana gore ba bona sebopiwa sa moya. 38 A ba botšiša a re: “Ke ka baka la eng le tšhogile, gona ke ka baka la eng le belaela? 39 Lebelelang diatla tša ka le maoto a ka, le bone gore ka nnete ke nna. Nkgwatheng le bone, ka gobane ge nkabe ke le sebopiwa sa moya ke be ke tla ba ke se na nama le marapo ebile le be le ka se kgone go nkgwatha.” 40 Ge a realo, a ba bontšha diatla tša gagwe le maoto a gagwe. 41 Eupša ka ge ba be ba thabile kudu ebile ba sa maketše, ba ile ba se mo tshepe. Ke moka a ba botšiša a re: “Na le na le dijo?” 42 Ka gona, ba mo fa hlapi yeo e bešitšwego, 43 ke moka a e tšea a e ja ba mo lebeletše.

44 Ka morago a re go bona: “Ge ke be ke na le lena, ke ile ka le botša ka re+ dilo ka moka tšeo di ngwadilwego ka nna Molaong wa Moshe, tšeo di ngwadilwego ke baporofeta le tšeo di ngwadilwego ka dipsalmeng, di swanetše go direga.”+ 45 Ke moka a ba thuša go kwešiša ka mo go feletšego seo Mangwalo a se bolelago,+ 46 gomme a re go bona: “Mangwalo a re Kriste o tla tlaišega a ba a tsoga bahung ka letšatši la boraro.+ 47 Le gona batho lefaseng ka moka go thoma Jerusalema,+ ba tla botšwa molaetša+ go dirišwa leina la Jesu, wa gore ba itsholele dibe tša bona+ e le gore ba tle ba lebalelwe. 48 Lena le tla nea bohlatse ka dilo tše.+ 49 Tsebang gore ke tla le romela seo Tate a le tshepišitšego sona. Eupša le dule Jerusalema go fihlela le amogela maatla ao a tšwago legodimong.”+

50 Ke moka a sepela le bona go fihlela Bethania gomme ge ba fihla moo, a emišetša diatla godimo a ba rapelela. 51 Ge a dutše a ba rapelela, o ile a tlošwa go bona gomme a rotošetšwa legodimong.+ 52 Ke moka ba mo khunamela gomme ba boela Jerusalema ba thabile kudu.+ 53 Le gona, ba be ba dula ba le ka tempeleng letšatši le letšatši ba tumiša Modimo.+