Mmoledi

10 Go swana le ge dintšhi tše di hwilego di bodiša makhura a modiri wa ditlolo gomme tša a nkgiša, bošilo bjo bonyenyane le bjona bo ka senya leina la motho yo a tsebjago a le bohlale ebile a hlomphega.+

2 Pelo ya motho yo bohlale e mo sepediša tseleng e nepagetšego eupša pelo ya motho wa lešilo e mo sepediša tseleng e mpe.*+ 3 Tsela yeo lešilo le dirago dilo ka yona, e bontšha gore ga le na temogo+ le gona le dira gore batho ka moka ba tsebe gore ke lešilo.+

4 Ge e ba mmuši a ka go galefela, o se ke wa tloga lefelong leo o emego go lona,+ ka gobane go theoša maswafo go ka fokotša dibe tše dikgolo.+

5 Go na le selo se sengwe se se kwešago bohloko seo ke se bonego mo lefaseng, e lego phošo yeo balaodi ba bantši ba e dirago:+ 6 Mašilo a beilwe maemong a mantši a godimo, eupša batho bao ba nago le bokgoni* ba beilwe maemong a tlase.

7 Ke bone bahlanka ba nametše dipere, eupša baetapele ba sepela ka maoto go swana le bahlanka.+

8 Yo a epago molete a ka wela ka gare ga wona,+ gomme yo a phušolago leboto leo le dirilwego ka maswika a ka longwa ke noga.

9 Yo a epago maswika, a ka mo gobatša gomme yo a phaphago dikgong, di ka mo gobatša.*

10 Ge selepe se se bogale gomme motho a sa se loutše, gona o tla diriša maatla a mantši. Eupša bohlale bo thuša motho gore a atlege.

11 Ge noga e ka loma mong wa yona pele ga ge yena a ka e gokeletša ka maselamose, gona maselamose a gagwe a ka se sa mo thuša ka selo.

12 Mantšu ao a bolelwago ke motho yo bohlale a a kgahliša,+ eupša a setlaela, a se bakela mathata.+ 13 Mantšu a mathomo ao se a bolelago ke a bošilo+ gomme mantšu a mafelelo ao se a bolelago a ka baka kotsi. 14 Eupša lešilo le dulela go bolela.+

Motho ga a tsebe seo se tlago go direga. Bjale ke mang yo a ka mmotšago seo se tlago go direga ka morago ga ge a hlokofetše?+

15 Boitapišo bja setlaela bo no se fetša maatla, ka gobane ga se tsebe le gore se ka boela bjang motseng.

16 Ruri go kweša bohloko gore naga e be le kgoši ya mošemane+ gomme baetapele ba yona ba dulele go ja e sa le mesong. 17 Eupša go a thabiša go hwetša naga yeo kgoši ya yona e lego morwa wa batho ba maemo a godimo gomme baetapele ba yona ba eja le go nwa ka nako gore ba hwetše maatla e sego gore ba tagwe.+

18 Ge motho e le sebodu sa mafelelo, tlhaka ya ntlo ya gagwe e tla wa le gona ge e ba motho a dula a phuthile matsogo, ntlo ya gagwe e tla nela.+

19 Dijo di dira gore batho ba thabe* gomme beine e dira gore bophelo bo thabiše,+ eupša tšhelete e kgona go di dira ka moka.+

20 O se ke wa roga* kgoši+ ka pelong ya gago.* Le gona o se ke wa roga mohumi o le ka kamoreng ya gago ka gobane nonyana e ka tšea seo o se bolelago goba ya bušeletša seo o se boletšego.