Bakorinthe ba Pele

8 Bjale ke le ngwalela mabapi le dijo tšeo di direlwago medingwana.+ Ka moka ga rena re a e tseba taba ye,+ eupša tsebo e dira gore motho a be le boikgogomošo mola lerato lona le dira gore a age ba bangwe.+ 2 Ge e ba motho a nagana gore o na le dikarabo tša dipotšišo ka moka mabapi le taba ye, ga ahlwa a kwešiša taba ye ka tsela yeo a swanetšego go e kwešiša ka yona. 3 Eupša ge e ba motho a rata Modimo, gona Modimo o tseba motho yoo.

4 A re boleleng ka taba ya go ja dijo tšeo di diretšwego medingwana. Re a tseba gore medingwana ga se selo+ le gore go na le Modimo o tee feela.+ 5 Legodimong le lefaseng go na le medimo yeo e sego ya nnete+ ebile batho ba na le medimo e mentši le marena a mantši. 6 Rena re na le Modimo o tee,+ e lego Tatago rena+ yo a lego legodimong. Ke yena a bopilego dilo ka moka,+ le rena re bopilwe ke yena ebile re na le Morena o tee e lego Jesu Kriste. Modimo o mo dirišitše go dira dilo ka moka+ go akaretša le rena.

7 Ga se batho ka moka bao ba kwešišago taba ye,+ ka gobane ba bangwe ba be ba rapela medingwana. Ge ba be ba eja dijo tšeo di diretšwego medingwana yeo,+ ba be ba nagana gore ba rapela medingwana yeo. Ka gona matswalo a bona a a ba tshwenya ka gobane ba a fokola.+ 8 Dijo di ka se dire gore re be le segwera se sebotse le Modimo.+ Ge re sa je re ka se lahlegelwe ke selo, le ge re eja re ka se holege ka selo.+ 9 Le hlokomele gore dilo tšeo le di kgethago ga di šitiše bao ba nago le tumelo e fokolago.+ 10 Ge e ba wena o tsebago gore medingwana ga e na mohola, o eja dijo tempeleng ya medingwana yeo, na seo se ka se dire gore motho yo a nago le tumelo e fokolago a je dijo tšeo di diretšwego medingwana? 11 Le ge o tseba gore go ja dijo tšeo ga se phošo, o senya tumelo e fokolago ya ngwaneno. Gopola gore le yena Kriste o mo hwetše.+ 12 Ge o senyetša banabeno ka tsela ye le go gobatša matswalo a bona ao a fokolago,+ o tla be o direla Kriste sebe. 13 Ke ka baka leo nka se sa jago nama ge eba dilo tšeo ke di jago di dira gore tumelo ya ngwanešo e fokole. Ga ke nyake go dira selo le ge e le sefe seo se ka dirago gore tumelo ya ngwanešo e fokole.+