Mmoledi

9 Ke ile ka naganišiša ka se gomme ka phetha ka gore bao ba lokilego le ba bohlale gotee le mediro ya bona, ba ka seatleng sa Modimo wa nnete.+ Batho ga ba tsebe gore bao ba bego ba phela pele ga bona ba be ba ratana bjang goba ba hloyane bjang. 2 Bohle ba welwa ke tše di swanago,+ moloki le yo mobe,+ yo a dirago tše di lokilego, yo a dirago tše di hlwekilego le yo a dirago tšeo di sa hlwekago, yo a dirago dihlabelo gotee le yo a sa di dirego. Moloki o swana le modiradibe, yo a dirago keno o swana le yo a tšhabago go dira keno. 3 Se ke selo se se kwešago bohloko seo se diregago mo lefaseng:* Dipelo tša batho di tletše dilo tše mpe ka ge ka moka ba welwa ke dilo tše di swanago,+ gomme ba tletše bošilo dipelong tša bona nakong ya ge ba sa phela, gomme ka morago ba a hlokofala.

4 Go na le kholofelo ka motho yo a phelago ka gobane mpša yeo e phelago e phala tau yeo e hwilego.+ 5 Bao ba phelago ba a tseba gore ba tlo hlokofala,+ eupša bahu ga ba tsebe selo le gatee,+ le gona bahu ba ka se newe selo* ka gobane ba lebetšwe.+ 6 Lerato la bona, lehloyo la bona le lehufa la bona di fedile gomme ba ka se sa tšea karolo dilong tšeo di dirwago mo lefaseng.+

7 Eya o je dijo tša gago o thabile, o nwe beine ya gago o thabile,+ ka gobane Modimo wa nnete o kgahlwa ke mediro ya gago.+ 8 Anke diaparo tša gago di dule e le tše ditšhweu,* gomme o dule o tšhela hlogo ya gago ka makhura.+ 9 Ge o sa dutše o phela bophelo bjo bokopana bjoo Modimo a go filego bjona mo lefaseng, thabela bophelo le mosadi wa gago+ yo o mo ratago bophelong bja gago bja lefeela ka gobane wo ke moputso wa gago woo o o šometšego ka thata mo lefaseng.+ 10 Selo se sengwe le se sengwe seo o kgonago go se dira, se dire ka maatla a gago ka moka o sa phela, ka gobane kua Lebitleng*+ moo o yago gona o ka se kgone go šoma, go loga maano, go ithuta goba go kwešiša selo le ge e le sefe.

11 Ka buša ka bona selo se sengwe mo lefaseng, gore yo a nago le lebelo ga a dule a thopa sefoka, yo a nago le maatla ga a dule a fenya ntwa,+ yo bohlale ga a dule a na le dijo, yo bohlale kudu ga a dule a na le mahumo,+ yo a nago le tsebo ga a dule a atlega,+ ka gobane ditiragalo tšeo di sa letelwago tšeo di tlago ka nako yeo e sa letelwago di ba wela ka moka. 12 Le gona motho ga a tsebe gore o tla hwa neng.+ Go etša ge dihlapi di tanywa ka nnete le dinonyana di tanywa ka moreo, batho le bona ba welwa ke masetlapelo ba sa letela tše e kego ba tanywa ke molaba.

13 Selo se sengwe seo ke se lemogilego le seo se nkgahlilego kudu ka bohlale mo lefaseng ke se: 14 Go be go na le motse o monyenyane, o se na banna ba bantši. Wa hlaselwa ke kgoši e maatla, gomme ya o dikanetša le go aga leboto le legolo go o dikologa. 15 Motseng woo go ile gwa hwetšwa monna wa modiidi, eupša e le yo bohlale gomme o ile a phološa motse woo ka bohlale bja gagwe. Eupša ga go na yo a ilego a gopola monna yoo wa modiidi.+ 16 Nna ka ipotša gore: “Bohlale bo phala maatla,+ eupša bohlale bja modiidi bo a nyatšwa gomme le ge a bolela batho ga ba mo theetše.”+

17 Go kaone gore o theetše mantšu a boleta ao a bolelwago ke motho yo bohlale, go e na le go theetša lešata la motho yo a bušago gare ga ditlaela.

18 Bohlale bo phala dibetša tša ntwa, eupša modiradibe o tee a ka senya dilo tše dintši tše dibotse.+