Baroma

3 Ka gona mohola wa go ba Mojuda goba wa go bolla ke ofe? 2 Go na le mehola e mentši. Wa mathomo ke gore Bajuda ba ile ba fiwa melaetša e mekgethwa ya Modimo.+ 3 Bjale re tla reng ge e ba ba bangwe ba bona ba se na tumelo? Na taba ya gore ga ba na tumelo e ra gore Modimo ga a tshepege? 4 Aowa! Le ge batho ka moka ba ka bolela maaka,+ Modimo yena o bolela nnete,+ feela bjalo ka ge Mangwalo a re: “Seo o se bolelago se tla bontšha gore o na le toka gomme ge ba go latofatša o tla ba bontšha gore ga o na molato.”+ 5 Go thwe dilo tšeo di sa lokago tšeo re di dirago di bontšha gore Modimo o lokile, eupša se se dira gore re ipotšiše gore: Na Modimo o dira phošo ge a re galefela? (Ke bolela kamoo batho ba bangwe ba bolelago ka gona.) 6 O tla be a sa dire phošo, go sego bjalo o tla ahlola lefase bjang?+

7 Bjale ge e ba maaka ao ke a bolelago a dira gore batho ba tsebe nnete ka Modimo le gore ba mo rete, gona ke ka baka la eng ke ahlolwa ke le modiradibe? 8 Ke ka baka la eng re sa re: “A re direng dilo tše mpe e le gore go tle go be le dilo tše dibotse”? Ka gobane batho ba bangwe ba re latofatša ka gore rena re realo. Batho bao ba tla ahlolwa ka toka.+

9 Bjale, na rena Bajuda re kaone go feta batho ba bangwe? Aowa! Ka gobane re šetše re boletše gore Bajuda le Bagerika ka moka ba na le sebe,+ 10 go etša ge Mangwalo a re: “Ga go na motho yo a lokilego, le o tee ga a gona,+ 11 ga go na le yo a nago le temogo, ebile ga go na le yo a nyakago Modimo. 12  Batho ka moka ba tlogetše go dira seo se lokilego, ga ba na mohola. Ga go le o tee wa bona yo a bontšhago ba bangwe botho.”+ 13 “Melomo ya bona e swana le lebitla leo le ahlamego, ba bolela maaka ka maleme a bona.”+ “Ebile dilo tšeo ba di bolelago di kotsi go swana le mpholo wa noga.”+ 14 “Melomong ya bona go tletše maroga le mantšu a go hlaba.”+ 15 “Ba kitimela go tšholla madi.”+ 16 “Ba a senyetšana ebile ba kwešana bohloko. 17 Ga ba kgone go dira khutšo le batho ba bangwe.”+ 18 “Ga ba boife Modimo.”+

19 Re a tseba gore dilo ka moka tšeo di lego Molaong di šoma go bao ba phelago ka Molao, e le gore ba se ke ba ba le mabaka ao ba ka širelago ka ona le go bontšha gore batho ka moka ba na le molato pele ga Modimo ebile ba swanelwa ke go otlwa.+ 20 Ka baka leo, ga go na motho yo Modimo a tlago gore o lokile feela ka gobane a latela Molao.+ Ka gobane Molao o re thuša go bona gore ka moka ga rena re badiradibe.+

21 Eupša Modimo o bontšhitše gore motho a ka ba yo a lokilego+ pele ga gagwe le ge a sa latele Molao. Taba ye e boletšwe Molaong le dipukung tša baporofeta.+ 22  Batho ka moka bao ba nago le tumelo ba ka kgona go ba bao ba lokilego pele ga Modimo ge e ba ba dumela go Jesu Kriste, ka gobane Modimo ga a kgetholle.+ 23  Batho ka moka ba dirile sebe gomme ga ba kgone go bontšha letago la Modimo.+ 24 Modimo o ba bona ba lokile ka baka la ge Kriste Jesu+ a ba lokolotše sebeng ntle le go patela.+ Modimo o dirile se ka ge a na le botho.+ 25 O re neile Jesu gore e be sebego+ sa gore bao ba nago le tumelo mading a gagwe ba lebalelwe dibe.+ O dirile se go re bontšha gore o lokile, o bontšha gore ga a fele pelo ka go lebalela batho dibe tšeo ba di dirilego nakong e fetilego. 26 Le gona o re bontšhitše gore o lokile+ ka go bolela gore motho yo a dumelago go Jesu o lokile.+

27 Bjale na go na le lebaka la gore re ikgantšhe? Aowa. Na re swanetše go ikgantšha ka baka la ge re latela molao?+ Aowa, ka gobane molao wo o rego re swanetše go ba le tumelo o bontšha gore ga se ra swanela go ikgantšha. 28 Re a tseba gore motho yo a lokilego ke yo a nago le tumelo e sego yo a lekago go latela molao.+ 29 Goba na Modimo ke Modimo wa Bajuda feela?+ Na ga se Modimo wa batho ba ditšhaba ka moka?+ Ee, ke Modimo wa batho ba ditšhaba ka moka.+ 30 Ka ge go na le Modimo o tee feela,+ o tla bolela gore batho bao ba bolotšego+ le bao ba sa bollago ba lokile+ ka ge ba na le tumelo. 31 Bjale na re nyatša* molao ka baka la ge re na le tumelo? Aowa! Go e na le moo, re thekga molao.+