Ebangedi ya Luka

19 Jesu o ile a tsena Jeriko, a feta moo. 2 Bjale gona moo go be go na le monna yo a bitšwago Sakeo. E be e le yo mogolo go batho ba go patediša motšhelo ebile o be a humile. 3 O be a tloga a nyaka go bona Jesu, eupša ka ge e be e le yo mokopana, o be a sa kgone go mmona ka ge batho ba be ba mo šira. 4 Ka gona o ile a kitimela pele, a namela mohlare wa mosikamore e le gore a kgone go mmona, ka gobane o be a le kgauswi le go feta moo. 5 Bjale ge Jesu a fihla lefelong leo, a lebelela godimo gomme a re go yena: “Sakeo, fologa moo ka pela ka gobane lehono ke a go etela.” 6 Ke moka Sakeo a fologa ka pela a thabile gomme a mo amogela lapeng la gagwe. 7 Ge batho ba bona seo, ka moka ga bona ba ngunanguna ba re: “O etetše ntlong ya monna wa modiradibe.”+ 8 Eupša Sakeo a ema a re go Jesu: “Morena ke fa badiidi seripa sa dilo tšeo ke nago le tšona ebile selo se sengwe le se sengwe seo ke se tšeetšego batho ka boradia ke ba bušetša sona, ka ba ka se oketša ka makga a mane.”+ 9 Ge a realo, Jesu a re go yena: “Lehono Modimo o phološitše monna yo le ba lapa la gagwe ka gore le yena ke morwa wa Aborahama. 10 Ka gobane Morwa wa motho o tletše go tsoma batho bao ba timetšego le go ba phološa.”+

11 Eitše ge barutiwa ba Jesu ba theeditše dilo tše, a ba botša papišo e nngwe. O ba boditše yona ka ge a be a le kgauswi le Jerusalema gomme bona ba be ba nagana gore Mmušo wa Modimo o tla tšwelela ka yona nako yeo.+ 12 Ka gona a re: “Monna yo mongwe yo a tšwago ka bogošing o ile a ya kgole+ gore a yo hwetša maemo a go ba kgoši, ke moka ge a a hweditše a boa. 13 O ile a bitša bahlanka ba gagwe ba lesome, a ba nea ditšhelete* tše lesome gomme a re go bona, ‘Šalang le dira kgwebo ka tšona go fihla ke boa.’+ 14 Eupša batho bao ba dulago le yena nageng yeo ba romela baromiwa gore ba mo šale morago moo a bego a eya gona, gomme ba fihle ba re: ‘Ga re nyake gore monna yo e be kgoši ya rena.’

15 “Ka morago ga gore a hwetše maemo a go ba kgoši, o ile a boa ke moka a bitša bahlanka ba gagwe bao a bego a ba file ditšhelete gore a bone gore ba hweditše bokae ge ba be ba dira kgwebo.+ 16 Ke moka wa mathomo a tla go yena a re: ‘Mong wa ka, tšhelete yeo o mphilego yona e oketšegile ka tše dingwe tše lesome.’+ 17 Mong wa gagwe a re go yena: ‘O šomile wena mohlanka yo botse. Ka ge o bonšhitše gore o a tshepega selong se senyenyane kudu ke tla go kgetha gore o buše metse e lesome.’+ 18 Mohlanka wa bobedi o ile a tla a re: ‘Mong wa ka, tšhelete yeo o mphilego yona e oketšegile ka tše dingwe tše hlano.’+ 19 A re go mohlanka yoo: ‘Le wena ke tla go kgetha gore o buše metse e mehlano.’ 20 Eupša mohlanka yo mongwe a tla a re: ‘Mong wa ka, tšhelete yeo o bego o mphile yona ke ye, ke be ke e phuthetše ka lešela ke e khutišitše. 21 Ke dirile bjalo ka gobane ke go tšhaba ka ge o le bogale. O tšea tšhelete yeo o sa kago wa e boloka pankeng, ebile o buna moo o sego wa bjala gona.’+ 22 Mong wa gagwe a re go yena: ‘Wena mohlanka yo mobe, ke go ahlola go ya le ka seo o se boletšego. Akere wena o be o tseba gore ke bogale, ke tšea tšhelete yeo ke sa kago ka e boloka pankeng le gore ke buna moo ke sa kago ka bjala gona?+ 23 Bjale ke ka baka la eng o se wa ka wa bea tšhelete ya ka pankeng ke moka ka re ge ke boile ka e lata e na le manamane?’

24 “Ge a fetša go realo, a re go bao ba bego ba eme moo, ‘Mo amogeng tšhelete yeo le e nee yo a nago le ditšhelete tše lesome.’+ 25 Eupša bona ba re go yena: ‘Morena, o na le ditšhelete tše lesome!’ 26 A re go bona: ‘Ruri ke re go lena, mang le mang yo a nago le se sengwe o tla fiwa dilo tše dintši, eupša mang le mang yo a se nago selo, le seo a nago le sona o tla se tšeelwa.+ 27 Go oketša moo, tlišang manaba a ka ao a rego ga a nyake ke e ba kgoši ya ona gomme le a bolaele mo pele ga ka.’”

28 Ka morago ga ge a boletše dilo tše, o ile a tšwela pele ka leeto la gagwe a rotogela Jerusalema. 29 Ge a fihlile kgauswi le Bethefage le Bethania thabeng yeo e bitšwago Thaba ya Mehlware,+ o ile a roma barutiwa ba gagwe ba babedi+ 30 a re: “Eyang motsaneng wola o lego kua pele. Ge le tsene go wona le tla hwetša tonkana yeo e sa kago ya namelwa e bofilwe. Le e bofolle le e tliše mo. 31 Eupša ge e ba motho yo mongwe a ka le botšiša a re, ‘Ke ka baka la eng le e bofolla?’ Lena le re: ‘Morena o a e hloka.’” 32 Ka gona, barutiwa bao a bego a ba romile ba ile ba tloga gomme ba hwetša tonkana yeo go ya le kamoo a bego a ba boditše ka gona.+ 33 Eupša ge ba dutše ba bofolla tonkana yeo, beng ba yona ba re: “Le bofollelang tonkana yeo?” 34 Bona ba re: “Morena o a e hloka.” 35 Ke moka ba iša tonkana yeo go Jesu, ba bea diaparo tša bona tša ka ntle godimo ga yona gomme Jesu a e namela.+

36 Ge a dutše a sepela ka yona, batho ba ile ba ala diaparo tša bona tša ka ntle tseleng.+ 37 Ge a se no fihla kgauswi le tsela yeo e theogago go tloga Thabeng ya Mehlware, barutiwa ba bantši kudu bao ba bego ba le moo ba ile ba thoma go thaba, ba ba ba thoma go tumiša Modimo ka mantšu ao a hlabošago ka baka la mehlolo ka moka yeo ba e bonego, 38 ba re: “Go šegofaditšwe Kgoši yeo e tlago ka leina la Jehofa!* Anke go be le khutšo magareng ga batho le Modimo, gomme Modimo yo a lego magodimodimong a retwe!”+ 39 Le ge go le bjalo, ba bangwe ba Bafarasei bao ba bego ba le lešabeng ba re go yena: “Morutiši, kgalemela barutiwa ba gago.”+ 40 Ge a ba araba a re: “Ruri ke le botša gore ge e ba go ka homola ba, gona maswika a be a tla goeletša.”

41 Bjale ge a fihla kgauswi le Jerusalema, o ile a lebelela motse woo gomme a o llela,+ 42 a re: “Ke duma eka nkabe wena, ee, wena ka noši letšatšing le o ile wa kwešiša dilo tšeo di dirago gore o be le khutšo, eupša gona bjale o ka se kgone go di kwešiša ka gobane di utegile gore wena o se di kwešiše.+ 43 Ka gobane go tla tla matšatši ao manaba a gago a tlago go aga legora ka dikota tšeo di nago le dintlha go go dikologa, a go dikologa gomme a go hlasela go tšwa ka mathokong ka moka.+ 44 A tla lahlela wena le bana ba gago fase,+ ebile a ka se tlogele leswika le le godimo ga le lengwe+ ka gobane nakong ya ge Modimo a tlile go le ahlola ga se la lemoga.”

45 Ke moka Jesu a tsena ka tempeleng a thoma go raka batho ka moka bao ba bego ba rekiša,+ 46 a re go bona: “Mangwalo a re: ‘Ntlo ya ka e tla ba ntlo ya thapelo,’+ eupša lena le e fetoša lewa la mahodu.”+

47 O ile a tšwela pele a ruta tempeleng letšatši le lengwe le le lengwe. Eupša baperisita ba bagolo le ditsebi tša molao le baetapele ba setšhaba, ba be ba nyaka go mmolaya.+ 48 Le ge go le bjalo, ga se ba ka ba hwetša sebaka sa go mmolaya, ka gobane batho ba be ba dula ba mo kgomaretše ebile ba mo theeditše ge a ruta.+