Bakorinthe ba Bobedi
12 Ke swanetše go ikgantšha, ka gona ke tla bolela ka dipono+ tšeo Morena a mpontšhitšego tšona le melaetša yeo a mphilego yona+ le ge go dira bjalo go sa hole nna. 2 Ke tseba motho yo e bego e le molatedi wa Kriste, yoo mengwaga e 14 e fetilego a ilego a išwa legodimong la boraro. Ga ke tsebe gore o ile a išwa legodimong ka mmele wa gagwe goba bjang, ke Modimo feela yo a tsebago. 3 Ke tseba motho yoo, eupša ga ke tsebe ge e ba a ile legodimong ka mmele wa gagwe goba bjang, go tseba Modimo. 4 Modimo o ile a mo iša paradeiseng, gomme ge a le moo o ile a kwa mantšu ao motho a sa kgonego go a bolela goba go dumelelwa go a bolela. 5 Ke tla ikgantšha ka motho yoo, ka ikgantšha le ka mafokodi a ka eupša nka se ikgantšhe ka nna. 6 Le ge nkare ke a ikgantšha, nka se be bjalo ka motho yo a hlokago tlhaologanyo ka gobane ke tla be ke bolela nnete. Ga ke ithete, e le gore go se be le motho yo a nthetago kamoo go feteletšego, eupša a nthete ka baka la dilo tšeo a kwelego ke di bolela goba tšeo a bonego ke di dira. 7 A go se be le motho yo a nthetago kudu ka gobane Modimo a mpontšha dipono tše bohlokwa.
Ke na le mootlwa nameng,+ woo o swanago le morongwa wa Sathane. O dula o nkweša bohloko gore ke se ke ka ikgodiša kudu. 8 Ke ile ka kgopela Morena gararo gore a tloše mootlwa woo go nna. 9 Eupša o ile a re go nna: “Botho bjo ke go bontšhago bjona bo go lekane, ka gobane maatla a ka a bonagala kudu ge o fokola.”+ Ke ka baka leo ke tlago go ikgantšha ka mafokodi a ka e le gore maatla a Kriste a ntšhireletše bjalo ka tente. 10 Ke a thaba ge ke fokola, ke rogwa, ke se na selo, ke tlaišwa ebile ke na le mathata ka baka la Kriste. Ka gobane ge ke fokola, Modimo o nnea maatla.+
11 Ke fetogile motho yo a se nago tlhaologanyo ka baka la lena. Eupša ge nkabe le ile la mpolela gabotse nkabe ke sa bolele ka tsela ye. Le ge ke se selo go lena, ga se nna yo monyenyane go baapostola ba lena bao ba itirago ba lokilego.+ 12 Ke le bontšhitše gore ke moapostola ka gobane ke ile ka kgotlelela,+ ka dira mehlolo, dilo tšeo di makatšago le tšeo di sa tlwaelegago.+ 13 Lena ga le swane le diphuthego tše dingwe ka gobane ga se ka ba morwalo go lena.+ Ke kgopela gore le ntshwarele ge e ba ke dirile phošo ka go se be morwalo go lena.
14 Gona bjale, ke la boraro ke itokišeleditše go tla go lena, le gona bjale nka se be morwalo go lena ka gobane ga ke nyake dilo tša lena+ eupša ke nyaka go le bona. Ka gobane bana+ ga se ba swanela go kgobokeletša batswadi ba bona dithoto eupša ke batswadi bao ba swanetšego go kgobokeletša bana ba bona dithoto. 15 Ke tlo diriša dilo ka moka tšeo ke nago le tšona, ka ba ka neela bophelo bja ka gore ke le thuše ebile ke tlo dira seo ke thabile.+ Ge e ba ke le rata kudu ka tsela ye, na le lena ga se la swanela go nthata ka tsela yeo ke le ratago ka yona? 16 Le ge ke se ka ba morwalo go lena,+ le re ke le “forile” ka ba ka le “radia.” 17 Na ke ile ka ikhola ka lena ke diriša batho bao ke ilego ka ba roma go lena? 18 Ke ile ka kgothaletša Tito gore a tle go lena a na le ngwanabo rena yo mongwe. Na Tito o ile a leka go ikhola ka lena?+ Re be re nagana go swana ebile re gata ka mošito o tee.
19 Mohlomongwe le nagana gore nako ye ka moka re be re ikemelela go lena, eupša ga go bjalo. Re bolela nnete pele ga Modimo ka ge re le balatedi ba Kriste. Banabešo bao re ba ratago, dilo ka moka tšeo re di dirago re di direla go le matlafatša. 20 Ke tšhoga gore nka tla ka re ge ke fihla go lena, ka hwetša le itshwere ka tsela yeo ke bego ke sa nagane gore le ka itshwara ka yona, gomme le nna ka itshwara ka tsela yeo le sa naganego gore nka itshwara ka yona. Ka hwetša go e na le batho bao ba nago le ditshele, mona, dintwa, dikarogano, ba bolela gampe ka ba bangwe, ba seba, mola ba bangwe ba ikgogomoša le go dira gore go be le tlhakatlhakano. 21 Mohlomongwe ge ke boa gape, Modimo wa ka a ka dira gore ke be le dihlong ge ke na le lena, ka nyamišwa ke gore batho ba bantši ga ba itsholele dibe tšeo ba tlwaetšego go di dira, e lego go se hlweke, go itshwara gampe ka tša thobalano* le go itshwara gampe ba sa jewe ke dihlong.*