Bakorinthe ba Bobedi
10 Nna Paulo, yo ba bangwe ba lena ba nnyatšago ge ke na le lena,+ eupša le re ke na le sebete sa go bolela ge ke le ngwalela mangwalo,+ ke ekiša Kriste ka go bolela le lena ka boleta le ka botho.+ 2 Ke holofela gore ge ke etla moo, batho bao ba naganago gore re itshwara bjalo ka batho ba lefase ba tla be ba fetogile e le gore ke se ke ka ba kgala. 3 Le ge re phela lefaseng le, ga re lwe go swana le batho ba lefase le. 4 Gobane dibetša tšeo re di šomišago go lwa ga se tšeo di dirišwago ke batho ba lefase le,+ eupša ke tšeo re di filwego ke Modimo.+ Di na le maatla kudu, ebile di kgona le go tumola dilo tšeo di tsemilego ka medu. 5 Re ganetša dikgopolo tša maaka le dilo tšeo di dirago gore batho ba se ke ba kwa Modimo,+ ebile re laola menagano ya rena gore e kwe Kriste. 6 Re ikemišeditše go otla batho ka moka bao ba sa theetšego,+ go ba go fihlela le theetša ka mo go feletšego.
7 Le ahlola dilo go ya ka seo le se bonago. Yo a bolelago ka go se dikadike gore ke yena mohlanka wa Kriste a gopole gore le rena re bahlanka ba Kriste. 8 Morena o re nea maatla a gore re le matlafatše e sego gore re le wiše tumelong,+ bjale nka se lešwe dihlong ke taba yeo. 9 Eupša ga ke nyake gore go bonagale okare ke nyaka go le tšhoša ka mangwalo a ka. 10 Ba bangwe ba re: “Mangwalo a gagwe a bolela dilo tše bohlokwa ebile a na le maatla, eupša ge a na le rena o a nyatšega ebile ge a bolela ga a tiiše ka ganong.” 11 Batho bao ba bolelago dilo tše ba tsebe gore re tlo dira dilo tšeo re di boletšego mo mangwalong a ge re fihla moo.+ 12 Ka gobane ga re nyake go ipapiša goba go itshwantšha le batho bao ba iponago ba le bohlokwa kudu.+ Ba ikahlola go ya le ka dilo tšeo bona ba bonago di lokile, ba bontšha gore ga ba kwešiše.+
13 Re ka se ikgantšhe ka dilo tšeo re sa kago ra di dira, eupša re tlo ikgantšha ka mošomo wo Modimo a re filego wona, o re romile le go lena.+ 14 Ge re be re etla go lena, ga se ra dira mošomo o mongwe ntle le woo Modimo a re neilego wona. Ke rena batho ba mathomo bao ba ilego ba le botša ditaba tše dibotse ka Kriste.+ 15 Re ikgantšha ka dilo tšeo re di dirilego, e sego tšeo di dirilwego ke batho ba bangwe. Re holofela gore ge tumelo ya lena e oketšega, le mošomo wo re o dirilego o tla tšwela pele o gola moo le tla bego le bolela ditaba tše dibotse gona. Re tlo kgona go dira mo go oketšegilego, 16 ka gobane re nyaka go botša batho bao ba dulago dinageng tšeo di lego kgole le lena ditaba tše dibotse, e le gore re se ke ra ikgantšha ka mošomo wo ba bangwe ba šetšego ba o dirile dinageng tše dingwe. 17 “Yo a ikgantšhago, a a ikgantšhe ka Jehofa.”*+ 18 Jehofa o amogela motho yo yena a mmoleletšego,+ e sego yo a iphagamišago.+