Petro wa Pele
1 Nna Petro, moapostola+ wa Jesu Kriste, ke ngwalela bao ba kgethilwego bao e lego badudi ba nakwana bao ba gašanego gohle Ponto, Galatia, Kapadokia,+ Asia le Bithinia. 2 Modimo tatago rena+ o ile a le kgetha e sa le pele go ya le kamoo a bego a rerile ka gona mathomong. O ile a le fa moya o mokgethwa gore le be ba bakgethwa.+ O dirile se e le gore le tle le mo kwe, le go le dira gore le dule le hlwekile ka baka la madi a Jesu Kriste.+ Ka gona ke re:
Eka Modimo a ka le bontšha botho bjo bogolo kudu a ba a le thuša gore le dule le na le khutšo.
3 A go tumišwe Modimo le Tatago Morena wa rena Jesu Kriste, ka gobane go ya ka kgaugelo ya gagwe e kgolo o ile a dira gore re tswalwe leswa.+ Re na le kholofelo+ ye e tiilego ka ge Jesu Kriste a ile a tsošwa bahung.+ 4 Modimo o le nea bohwa bjo bo ka se senyegego,+ bja se šilafatšwe ebile bja se hwelele. O le beetše bjona magodimong.+ 5 O bo beetše lena bao a le šireletšago a diriša maatla a gagwe ka ge le na le tumelo, e le gore le tle le phološwe. Go phološwa ga lena go tla bonagatšwa nakong ya bofelo. 6 Ke ka baka leo le thabilego kudu, le ge le kwešwa bohloko ke meleko e fapafapanego ka nakwana, eupša go bohlokwa gore le welwe ke meleko ye,+ 7 e le gore tumelo ya lena yeo e lekilwego,+ yeo e lego bohlokwa kudu go feta gauta yeo e senyegago le ge e lekilwe ka go fišwa mollong, e dire gore le tumišwe, le hwetše letago le be le hlomphiwe nakong ya ge Jesu Kriste a tla be a bonagatšwa.+ 8 Le ge le sa ka la bona Kriste, fela le a mo rata. Le ge le sa mmone gona bjale, fela le bontšha gore le dumela go yena. Ebile tsela yeo le thabilego ka yona ga e hlalosege, 9 ka gobane le kgodišegile gore tumelo ya lena e tla dira gore le phološwe.+
10 Baporofeta bao ba ilego ba bolela ka botho bjo bjo bogolo bjo le bo neilwego, ba ile ba botšiša le go nyakišiša ka mo go tseneletšego ka taba ye ya go phološwa.+ 11 Modimo o ile a šomiša moya wa gagwe o mokgethwa go ba botša e sa le pele gore Kriste o tlo tlaišwa,+ ke moka ka morago a fiwa maemo a godimo. Ke ka baka leo baporofeta bao ba ilego ba tšwela pele ba leka go nyakišiša gore go tlo direga eng go Kriste+ le gore dilo tšeo di tlo direga neng. 12 Modimo o ile a dira gore ba bone gore dilo tšeo ba di porofetago ba be ba sa di porofetele bona beng, eupša ba di porofetela lena. Baporofeta bao ba ile ba ngwala ka ditaba tšeo le di kwelego go batho bao ba bolelago ka ditaba tše dibotse ba thušwa ke moya o mokgethwa wo o tšwago legodimong.+ Barongwa ba tloga ba nyaka go kwešiša ditaba tše.
13 Ka gona itokišetšeng* go šoma.+ Le dire dilo ka moka ka tsela yeo e bontšhago gore le nagana gabotse.+ Dulang le na le kholofelo ya gore Modimo o tla le bontšha botho bjo bogolo ge Jesu Kriste a tla be a utollwa. 14 Ka ge le le bana ba Modimo bao ba kwago, tlogelang go laolwa ke dikganyogo tše mpe tšeo le bego le na le tšona pele le tseba Modimo. 15 Eupša ebang ba bakgethwa dilong ka moka tšeo le di dirago, bjalo ka ge yo a le biditšego e le yo mokgethwa.+ 16 Ka gobane ka Mangwalong go ngwadilwe gwa thwe: “Le beng ba bakgethwa, ka gobane le nna ke yo mokgethwa.”+
17 Ge e ba le rapela Tatago lena yo a sa kgethollego motho ge a ahlola,+ eupša a ahlolago motho yo mongwe le yo mongwe go ya ka dilo tšeo a di dirilego,+ gona itshwareng ka tsela yeo e bontšhago gore le a mo hlompha ge le sa dutše le le badudi ba nakwana ba mo lefaseng. 18 Le tseba gabotse gore ge le be le lokollwa tseleng yeo le bego le phela ka yona ya go se re selo yeo borakgolokhukhu ba lena ba le rutilego yona, ga se la lokollwa ka silifera goba ka gauta,+ e lego dilo tšeo di senyegago. 19 Eupša le lokolotšwe ka madi a bohlokwa+ a Kriste,+ ao a swanago le madi a kwana+ yeo e sa solegego ebile e le e hlwekilego. 20 Ke nnete gore Kriste o ile a kgethwa le pele lefase le ka thewa,+ eupša o ile a bonagatšwa dinakong tša mafelelo ka baka la lena.+ 21 Le dumela go Modimo ka baka la gagwe,+ yena yoo a ilego a mo tsoša bahung+ gomme a mo nea letago+ e le gore le be le tumelo go Modimo le be le mo tshepe.
22 Ka ge gona bjale le itlhwekišitše ka go kwa dithuto tša nnete, gomme seo sa dira gore le rate banababo lena ka lerato leo le se nago boikaketši,+ ka gona ratanang go tšwa pelong.+ 23 Le tswetšwe leswa+ ka peu yeo e sa hwego, e sego yeo e hwago.+ Le tswetšwe leswa ka baka la lentšu la Modimo yo a phelago le yo a lego gona go ya go ile.+ 24 Ka gobane “batho ka moka ba swana le bjang gomme letago la bona ka moka le swana le matšoba a naga. Bjang bo a pona le letšoba le a hlohlorega, 25 eupša ge e le lentšu la Jehofa* lona le tla dula le le gona go ya go ile.”+ Le gona “lentšu” leo ke ditaba tše dibotse tšeo le di boditšwego.+