Hesekiele

45 “‘Ge le arola naga e le bohwa,+ le neele Jehofa karolo ya naga yeo gomme e tla ba e kgethwa.+ Botelele bja yona e swanetše go ba dikhilomithara tše e ka bago tše 13 gomme bophara bja yona e swanetše go ba dikhilomithara tše e ka bago tše hlano.+ Karolo yeo ya naga e tla ba e kgethwa. 2 Moo karolong yeo ya naga go tla ba le lefelo le lekgethwa leo le nago le mahlakore a mane ao a lekanago. Lehlakore le lengwe le le lengwe e tla ba dimithara tše e ka bago tše 260,+ le gona go tla ba le lefelo leo diphoofolo di fulago go lona, leo mahlakore a lona ka moka e lego dimithara tše e ka bago tše 26.+ 3 Gona moo o mete karolo ya botelele bja dikhilomithara tše e ka bago tše 13 le bophara bja dikhilomithara tše e ka bago tše hlano, gomme gona moo lefelong leo go tla ba le tempele e lego selo se sekgethwakgethwa. 4 E tla ba karolo e kgethwa ya naga ya baperisita,+ bona bao ba hlankelago tempeleng, e lego bona bao ba batamelago Jehofa gore ba mo hlankele.+ Lefelo leo e tla ba lefelo la dintlo tša bona le lefelo le lekgethwa la tempele.

5 “‘Balefi bao ba hlankelago tempeleng ba tla newa karolo ya naga ya botelele bja dikhilomithara tše e ka bago tše 13 le bophara bja dikhilomithara tše e ka bago tše hlano.+ Le gona ba tla newa diphapoši tša go jela tše 20.+

6 “‘Le nee motse karolo ya botelele bja dikhilomithara tše e ka bago tše 13, yeo e lekanago le moneelo o mokgethwa gomme e be ya bophara bja dikhilomithara tše e ka bago tše pedi le seripa.+ E tla ba ya Baisiraele ka moka.

7 “‘Kgošana e newe naga ka mahlakoreng a mabedi a moneelo o mokgethwa le ya naga yeo e filwego motse. E tla ba kgauswi le moneelo o mokgethwa le naga yeo e filwego motse. E tla ba ka bodikela le ka bohlabela. Botelele bja yona go tloga ka bodikela go fihla ka bohlabela, bo tla lekana le karolo e abetšwego o mongwe wa meloko ya Isiraele.+ 8 Naga ye e tla ba bohwa bja kgošana yeo Isiraeleng. Dikgošana tša ka di ka se sa swara batho ba ka gampe+ ebile di tla nea Baisiraele naga go ya ka meloko ya bona.’+

9 “Mmuši Morena Jehofa o re: ‘Lena dikgošana tša Isiraele, bjale gona le feteletše!’

“‘Tlogelang dintwa le go gatelela batho gomme le dire dilo tšeo di lokilego le be le sware batho ka toka.+ Tlogelang go tšeela batho ba ka naga ya bona,’+ o realo Mmuši Morena Jehofa. 10 ‘Le šomiše dikala tšeo di šomago gabotse. Le šomiše tekanyo e nepagetšego ya dilo tšeo di omilego le dilo tšeo di elelago.*+ 11 Le se ke la fetoša tsela yeo le kalago dilo tšeo di omilego le tšeo di elelago. Tekanyo ya dilo tšeo di elelago e be dilithara tše 22 le tekanyo ya dilo tše di omilego e be dilithara tše 22. Go dirišwe tekanyo ya dilithara tše 220* ge go kalwa dilo. 12 Tekanyo yeo le e šomišago go kala e be dikgerama tše e ka bago tše 11.* Mane* ya lena e tla ba dishekele tše 60.’+

13 “‘Moneelo wo le swanetšego go o ntšha ke wo: Le ntšhe dilithara tše e ka bago tše nne go tše 220 tša korong le dilithara tše e ka bago tše nne go tše 220 tša mabele.* 14 Makhura e be tekanyo ya dilithara tše 22.* Dilithara tšeo tše 22 ge di balwa ga lesome di dira koro.* Ke moka dilithara tšela tše 22 ge di balwa gape ga lesome di dira dilithara tše 220.* 15 Mo mohlapeng wa Isiraele le ntšhe nku e tee go tše dingwe le tše dingwe tše 200 gore di tle di neelwe. Dinku tšeo e tla ba tša sebego sa mabele,+ sebego seo se feletšego sa go fišwa+ le dihlabelo tša go dira khutšo le Modimo,+ e le gore Modimo a tle a lebalele batho dibe,’+ o realo Mmuši Morena Jehofa.

16 “‘Batho ka moka nageng ba tla ntšha moneelo wo,+ ba o nea kgošana ya Isiraele. 17 Eupša kgošana yona e tla ntšha diruiwa tša go dira dibego tše di feletšego tša go fišwa+ ebile e tla ntšha sebego sa mabele+ le sebego sa dino dinakong tša menyanya,+ dinakong tša ge go tšwelela ngwedi o moswa, nakong ya disabatha+ le nakong ya menyanya ka moka ya Baisiraele.+ Ke yona e tlago go ntšha sebego sa sebe, sebego sa mabele, sebego seo se feletšego sa go fišwa le dihlabelo tša go dira khutšo le Modimo, e le gore Modimo a lebalele Baisiraele dibe.’

18 “Mmuši Morena Jehofa o re: ‘Letšatšing la mathomo la kgwedi ya mathomo, le tšee powana yeo e phetšego gabotse go tšwa mohlapeng gomme le hlwekiše sekgethwa sebeng.+ 19 Moperisita o tla tšea a mangwe a madi a sebego sa sebe a a tlotša foreimeng ya lebati la tempele+ le dikhoneng tše nne tša mokgabišo wo o dikologilego aletare le foreimeng ya lebati la keiti ya ka gare. 20 O dire dilo tšeo ka moka ka letšatši la bošupa la kgwedi yeo ge e ba motho le ge e le ofe a dira sebe ka phošo goba ka ge a sa tsebe.+ O direle tempele sehlabelo sa go lebalelwa dibe.+

21 “‘Ka letšatši la bo-14 la kgwedi ya pele, le keteke monyanya wa Paseka.+ Le je dinkgwa tšeo di sa omelwago ka matšatši a šupago.+ 22 Letšatšing leo kgošana e ntšhetše yona le batho ba naga ka moka powana ya sebego sa sebe.+ 23 Matšatšing ao a šupago a monyanya, e tla ntšhetša Jehofa dipowana tše šupago tšeo di phetšego gabotse le dinku tše tona tše šupago tšeo di phetšego gabotse, e le sebego seo se feletšego sa go fišwa.+ Le gona letšatši le lengwe le le lengwe o tla ntšha phooko e tee e le sebego sa sebe. 24 Powana e nngwe le e nngwe a e sepediše le sebego sa mabele sa dilithara tše 22 le dilithara tše e ka bago tše nne tša makhura. Nku e nngwe le e nngwe e tona e sepele le sebego sa mabele sa dilithara tše 22 le dilithara tše e ka bago tše nne* tša makhura.

25 “‘Ka letšatši la bo-15 la kgwedi ya bošupa, ka matšatši a šupa nakong ya monyanya,+ kgošana e swanetše go tliša sebego sa sebe, sebego se se feletšego sa go fišwa, sebego sa mabele le makhura, go swana le ge e ile ya dira matšatšing a mangwe.’”