Hesekiele

37 Moya* wa Jehofa o ile wa tla go nna gomme Jehofa yena a ntšea ka moya wa gagwe a nkiša moeding+ wo o tletšego marapo. 2 O ile a mphetiša kgauswi le marapo ao ka moka, ka bona marapo a mantši ao a bego a omile kudu+ moo moeding. 3 A mpotšiša a re: “Morwa wa motho, na marapo a a ka phela gape?” Nna ka re: “Mmuši Morena Jehofa go tseba wena.”+ 4 Yena a re go nna: “Porofeta ka marapo a o a botše o re: ‘Lena marapo a omilego, ekwang seo Jehofa a se bolelago:

5 “‘Mmuši Morena Jehofa o botša marapo a o re: “Ke tla tsenya mohemo mo go lena gomme le tla phela.+ 6 Ke tla le tsenya mešifa le nama, ka le apeša letlalo, ka le tsenya mohemo gomme la phela. Ke moo le tlago go tseba gore ke nna Jehofa.”’”

7 Ka gona ke ile ka porofeta go ya le kamoo ke bego ke laetšwe. Ge ke thoma go porofeta go ile gwa kwagala modumo wa marapo a thulana, gomme marapo ao a batamelana, le lengwe la kopana le le lengwe. 8 Ke ile ka bona mešifa le nama di etla godimo ga marapo ao gomme a apešwa letlalo. Eupša a be a se na mohemo.

9 Modimo a re go nna: “Porofetela phefo.* Morwa wa motho, porofetela phefo o e botše o re: ‘Mmuši Morena Jehofa o re: “Wena phefo, etla o etšwa ka mahlakoreng a mane gomme o budulele batho ba bao ba bolailwego e le gore ba boele ba phele.”’”

10 Ka gona, ka porofeta go ya le kamoo Modimo a bego a ntaetše ka gona. Ke moka mohemo wa tsena marapong ao, a thoma go phela a ba a ema ka dinao+ e le mašole a mantši kudu.

11 A bolela le nna a re: “Morwa wa motho, marapo a ke Baisiraele ka moka.+ Ba re: ‘Marapo a rena a omile, ebile ga re sa na kholofelo.+ Ka nnete re fedišitšwe.’ 12 Ka gona porofeta o ba botše o re: ‘Mmuši Morena Jehofa o re: “Lena batho ba ka, ke tla bula mabitla a lena+ ka le tsoša, gomme ka le tliša nageng ya Isiraele.+ 13 Le tla tseba gore ke nna Jehofa ge ke bula mabitla a lena ke le tsoša gomme ke le ntšha go ona. Lena le batho ba ka.”’+ 14 ‘Ke tla tsenya moya wa ka go lena gomme la phela,+ ka dira gore le dule nageng ya lena. Ke moo le tlago go tseba gore ke nna Jehofa ke boletšego dilo tšeo ebile ke di dirilego,’ o realo Jehofa.”

15 Jehofa a bolela le nna gape a re: 16 “Wena morwa wa motho, tšea lepara o ngwale godimo ga lona o re: ‘La Juda le Baisiraele bao ba nago le yena.’+ O tšee le lepara le lengwe o ngwale godimo ga lona o re: ‘La Josefa leo le emelago Efuraime, le Baisiraele ka moka bao ba nago le yena.’+ 17 O a dire gore a batamelane, gomme ona e tla ba lepara letee ka seatleng sa gago.+ 18 Ge batho ba geno ba go botšiša gore: ‘Na o ka se re botše gore dilo tše di ra goreng?’ 19 Wena o ba arabe o re: ‘Mmuši Morena Jehofa o re: “Ke tla tšea lepara la Josefa leo le lego ka seatleng sa Efuraime, ka tšea le meloko ya Isiraele yeo e nago le yena, ka e kopanya le lepara la Juda, gomme ka dira gore e be lepara letee+ ka seatleng sa ka.”’ 20 Mapara ao o ngwadilego go ona a be ka seatleng sa gago gore batho ba a bone.

21 “O ba botše o re: ‘Mmuši Morena Jehofa o re: “Ke tla ya ka yo tšea Baisiraele ditšhabeng tšeo ba bego ba ile go tšona, ka ba kgoboketša go tšwa ka mahlakoreng ka moka gomme ka ba tliša nageng ya bona.+ 22 Ke tla dira gore e be setšhaba setee mo nageng,+ gomme ba tla dula dithabeng tša Isiraele. Ka moka ga bona ba tla bušwa ke kgoši e tee.+ E ka se sa ba ditšhaba tše pedi, le gona ba ka se sa aroganywa ka mebušo e mebedi.+ 23 Ba ka se sa itšhilafatša ka medingwana ya bona e šišimišago, ka dilo tše di šišimišago tšeo ba di dirago le ka melato ya bona ka moka.+ Ke tla ba hlwekiša, ka ba thuša gore ba tlogele go dira dilo tše mpe tšeo ba di dirilego ka go se botege. E tla ba batho ba ka gomme nna ka ba Modimo wa bona.+

24 “‘“Mohlanka wa ka Dafida e tla ba kgoši ya bona+ gomme ka moka ga bona ba tla ba le modiši o tee.+ Ba tla latela ditaelo tša ka le go phela ka melao ya ka.+ 25 Ba tla dula nageng yeo ke e neilego mohlanka wa ka Jakobo, yeo borakgolokhukhu ba lena ba bego ba dula go yona.+ Bona le bana ba bona le bana ba bana ba bona+ ba tla dula go yona go ya go ile,+ gomme Dafida mohlanka wa ka e tla ba kgošana ya bona go ya go ile.+

26 “‘“Ke tla dira kgwerano ya khutšo le bona.+ Kgwerano yeo e tla ba ya go ya go ile. Ke tla ba lokišetša lefelo leo ba ka dulago go lona. Ka ba ka dira gore e be ba bantši+ le gona ke tla dira gore tempele ya ka e be gare ga bona go ya go ile. 27 Tente ya ka e tla ba moo ba dulago gona. Nna ke tla ba Modimo wa bona gomme bona ya ba batho ba ka.+ 28 Ge tempele ya ka e le gare ga bona go ya go ile,+ ke moo ditšhaba di tlago go tseba gore nna Jehofa ke dira gore Isiraele e be e kgethwa.”’”