Hesekiele

44 Monna yoo o ile a mpušetša morago ka tsela ya keiti ya sekgethwa yeo e lebeletšego ka bohlabela,+ gomme e be e tswaletšwe.+ 2 Ke moka Jehofa a re go nna: “Keiti ye e tla dula e tswaletšwe. Ga se ya swanela go bulwa ebile ga go na motho yo a tlago go tsena ka yona, ka gobane nna Jehofa Modimo wa Isiraele ke tsene ka yona.+ Ka gona e swanetše go dula e tswaletšwe. 3 Eupša kgošana e tla dula keiting yeo ya ja dijo pele ga Jehofa,+ ka gobane ke kgošana. E tla tsena ka tsela ya keiti yeo e lebanego le phapoši yeo go tsenwago ka yona ka tempeleng, ya ba ya tšwa ka yona tsela yeo.”+

4 Bjale monna yoo o ile a nkiša pele ga tempele ka tsela ya keiti ya ka leboa. Ke moka ka bona letago la Jehofa le tletše ka tempeleng ya Jehofa.+ Ka gona ke ile ka khunama ka inamišetša sefahlego sa ka fase.+ 5 Ke moka Jehofa a re go nna: “Morwa wa motho, ntšha mahlo dinameng, lebelela o be o theetše gabotse dilo ka moka tšeo ke go botšago tšona mabapi le melao le ditaelo tša tempele ya ka nna Jehofa. O lebeledišiše mojako wa go tsena wa tempele le mejako ka moka ya go tšwa ya sekgethwa.+ 6 O botše batho ba Isiraele bao ba sa kwego o re: ‘Mmuši Morena Jehofa o re: “Lena Baisiraele, bjale le feteletše ka go dira dilo tše di šišimišago. 7 Le tliša batho ba ditšhaba tše dingwe sekgethweng sa ka, e lego bao ba sego ba bolla pelong le nameng, gore ba tle ba šilafatše tempele ya ka. Le nnea senkgwa, makhura a diphoofolo le madi, eupša ga le botegele kgwerano ya ka ka baka la dilo ka moka tše di šišimišago tšeo le di dirago. 8 Ga se la hlokomela dilo tša ka tše kgethwa,+ eupša le kgetha batho ba bangwe gore ba dire mešomo ya sekgethweng sa ka.”’

9 “‘Mmuši Morena Jehofa o re: “Ga go na motho yo a tšwago ditšhabeng tše dingwe yo a dulago Isiraele, yo a sego a bolla pelong le nameng yo a ka tlago sekgethweng sa ka.”’

10 “‘Eupša Balefi bao ba ilego ba tlogela go mpotegela+ ge Baisiraele ba be ba tlogela go mpotegela, gomme ba rapela medingwana ya bona ya diswantšho yeo e šišimišago, ba tla otlwa ka baka la molato wa bona. 11 Ba tla šoma sekgethweng sa ka gore ba hlokomele dikeiti tša tempeleng+ le go šoma ka tempeleng. Ba tla hlaba diphoofolo tša sebego se se feletšego sa go fišwa le tša dihlabelo tšeo batho ba tlago go di neela, ebile ba tla ema pele ga setšhaba gore ba se hlankele. 12 Ka ge Balefi ba ile ba hlankela Baisiraele pele ga medingwana ya bona e šišimišago, gomme ba šitiša Baisiraele ka go dira gore ba dire sebe,+ ke ka baka leo ke emišitšego seatla sa ka ke ikana gore ke lwe le bona, gomme ba tla otlwa ka baka la molato wa bona,’ o realo Mmuši Morena Jehofa. 13 Ba ka se tle go nna gore ba ntlhankele e le baperisita goba ba batamela dilo tša ka tše kgethwa goba tše kgethwakgethwa, eupša ba tla lewa ke dihlong ka baka la dilo tše di šišimišago tšeo ba di dirilego. 14 Fela ke tla ba kgetha gore ba hlokomele mešomo ya ka tempeleng, le dilo ka moka tšeo di dirwago ka go yona.’+

15 “‘Ge e le Balefi bao e lego baperisita, bona barwa ba Tsadoko,+ bao ba ilego ba hlokomela mediro ya sekgethweng sa ka ge Baisiraele ba be ba se sa mpotegela,+ ba tla tla pele ga ka gore ba ntlhankele, ebile ba tla ema pele ga ka gore ba neele makhura a diphoofolo+ le madi,’+ o realo Mmuši Morena Jehofa. 16 ‘Ke bona bao ba tlago go tla sekgethweng sa ka, gomme ba tla tafoleng ya ka gore ba ntlhankele,+ ebile ba tla dira mešomo yeo ba swanetšego go ntirela yona.+

17 “‘Ba swanetše go apara diaparo tšeo di dirilwego ka lešela la linene ge ba tsena dikeiting tša lapa la ka gare.+ Ga se ba swanela go apara diaparo tše di dirilwego ka wulu ge ba hlankela dikeiting tša lapa la ka gare goba ka gare ga lapa. 18 Ba rwale dituku tše di dirilwego ka lešela la linene hlogong, ebile ba apare le marokgwana a lešela la linene.+ Ga se ba swanela go apara selo le ge e le sefe seo se tlago go dira gore ba tšwe kudumela. 19  Pele ba ka ya lapeng la ka ntle moo go nago le batho, ba apole diaparo tša bona tšeo ba bego ba hlankela ka tšona+ gomme ba di bee ka diphapošing tša go jela tše kgethwa.+ Ke moka ba apare diaparo tše dingwe e le gore ba se ke ba dira gore batho e be ba bakgethwa ba se ba swanela. 20 Ba se ke ba kota dihlogo tša bona letwadi+ goba ba tlogela meriri ya bona e le e metelele kudu. Meriri ya bona e swanetše go dula e fokoditšwe. 21 Baperisita ga se ba swanela go nwa beine ge ba tsena lapeng la ka gare.+ 22 Moperisita a se ke a nyala mohlologadi goba mosadi yo a hladilwego,+ eupša a ka nyala mosadi wa Moisiraele yoo a sa kago a robala le monna goba mohlologadi yo a bego a nyetšwe ke moperisita.’+

23 “‘Baperisita ba rute batho ba ka phapano magareng ga selo se sekgethwa le seo e sego se sekgethwa. Ba ba rute phapano magareng ga selo seo se šilafetšego le seo se hlwekilego.+ 24 Ke bona ba swanetšego go ahlola melato ge go sekwa,+ gomme ba ahlole ka go dumelelana le melao ya ka.+ Le gona ba swanetše go dira dilo ka go dumelelana le melao ya ka le ditaelo tša ka tša mabapi le menyanya ya ka ka moka,+ ebile ba dire gore disabatha tša ka e be tše kgethwa. 25 Baperisita ga se ba swanela go batamela setopo, ka gobane ge ba ka se batamela ba tlo šilafala. Eupša ba ka batamela setopo sa tate goba sa mma goba sa morwa goba sa morwedi goba sa morwarrago bona goba sa kgaetšedi ya bona yeo e sego ya nyalwa,+ le ge le tšona di ka dira gore ba šilafale. 26 Ka morago ga gore moperisita a hlwekišwe, o swanetše go leta matšatši a šupago. 27 Letšatšing la ge moperisita a tsena lapeng la ka gare gore a tlo hlankela lefelong le lekgethwa, a tliše sebego sa gagwe sa sebe,’+ o realo Mmuši Morena Jehofa.

28 “‘Ke nna bohwa bja bona.+ Le se ke la ba nea naga le ge e le efe Isiraeleng, ka gobane nna ke bohwa bja bona. 29 Ke bona ba tlago go ja sebego sa mabele,+ sebego sa sebe le sebego sa molato,+ ebile selo se sengwe le se sengwe seo se neetšwego Modimo mo Isiraeleng e tla ba sa bona.+ 30 Dienywa ka moka tše dibotsebotse tšeo di butšwitšego pele le moneelo o mongwe le o mongwe wo o tšwago meneelong ya lena, e tla ba tša baperisita.+ Le gona le nee baperisita dijo tšeo di dirilwego ka folouru* ya dilo tšeo le di bunnego pele.+ Se se tla dira gore malapa a lena a šegofatšwe.+ 31 Baperisita ba se ke ba ja dinonyana goba diphoofolo tšeo di hweditšwego di hwile goba di gagogantšwe ke phoofolo.’+