Hesekiele

43 Ke moka monna yoo o ile a nkiša keiting yeo e lebeletšego ka bohlabela.+ 2 Ge ke le moo ke ile ka bona letago la Modimo wa Isiraele le etšwa ka bohlabela+ gomme lentšu la gagwe le be le kwagala bjalo ka modumo wa meetse a mantši ao a elelago.+ Lefase lona le be le phadima ka baka la letago la gagwe.+ 3 Pono yeo e swana le pono yeo ke ilego ka e bona ge ke be ke tlile go fediša motse. E be e swana le yeo ke ilego ka e bona kgauswi le noka ya Kebara.+ Ke ile ka khunama ke inamišeditše sefahlego fase.

4 Ke moka letago la Jehofa le ile la tsena ka tempeleng ka keiti yeo e lebeletšego ka bohlabela.+ 5 Moya wa ntsoša wa ntliša lapeng la ka gare gomme ka bona gore tempele yeo e be e tletše ka letago la Jehofa.+ 6 Ka kwa motho yo mongwe a bolela le nna go tšwa ka tempeleng, gomme monna yola yena o ile a tla a ema kgauswi le nna.+ 7 A re go nna:

“Morwa wa motho, mo ke moo setulo sa ka sa bogoši+ se lego gona le lefelo leo dinao tša ka di gatago gona,+ e lego moo ke tlago go dula gare ga Baisiraele go ya go ile.+ Baisiraele le dikgoši tša bona ba ka se sa šilafatša leina la ka le lekgethwa ka go rapela medimo e mengwe*+ le ka ditopo tša dikgoši tša bona. 8 Ge ba be ba bea mejako ya bona kgauswi le mejako ya ka le foreime ya bona ya lebati kgauswi le ya ka, e le gore re aroganywe feela ke leboto,+ ba ile ba šilafatša leina la ka le lekgethwa ka dilo tše di šišimišago tšeo ba di dirilego. Ke ka baka leo ke ilego ka ba fediša ke galefile.+ 9 Bjale anke ba tlogele go rapela medimo e mengwe, ba be ba beele ditopo tša dikgoši tša bona kgole le nna gomme nna ke tla dula gare ga bona go ya go ile.+

10 “Morwa motho, hlalosetša Baisiraele ka tempele,+ e le gore ba tle ba lewe ke dihlong ka baka la melato ya bona.+ Le gona ba swanetše go ithuta gore tempele e dirilwe bjang. 11 Ge e ba ba jewa ke dihlong ka baka la dilo tšeo ba di dirilego, gona o ba bontšhe polane ya tempele, tsela yeo e rulagantšwego ka yona le mejako ya yona ya go tsena le ya go tšwa.+ O ba bontšhe dipolane tša yona ka moka, o be o ba botše melao le ditaelo tša yona ka moka. O di ngwale ba go lebeletše e le gore ba tle ba kgone go di latela.+ 12 Wo ke molao wa mabapi le tempele. Lefelo ka moka leo le e dikologilego ka godimo ga thaba, ke le le kgethwakgethwa.+ Tseba gore wo ke molao wa mabapi le tempele.

13 “Tše ke ditekanyo tša aletare ge e metwa ka dimithara,+ (go seripa se sengwe le se sengwe sa mithara go be go oketšwa ka bophara bja seatla). Karolo ya ka fase ya aletare e be e le seripa sa mithara le bophara bja yona e le seripa sa mithara. Ka mahlakoreng a yona ka moka e be e na le mokgabišo wa bophara bja disenthimithara tše e ka bago tše 22.* Ye ke karolo ya ka fase ya aletare. 14 Go tloga lebatong go ya karolong ya ka fase ya aletare, e be e le mo e ka bago ka godingwana ga mithara gomme bophara bja yona e be e le mo e ka bago seripa sa mithara. Go tloga karolong ya ka fase ya aletare go ya go ya ka godimo, e be e le ka godingwana ga dimithara tše pedi gomme bophara bja yona e be e le mo e ka bago seripa sa mithara. 15 Sebešo sa aletare e be e le sa bophagamo bja dimithara tša ka godingwana ga tše pedi ebile ka godimo sebešo sa aletare go be go na le manaka a mane.+ 16 Sebešo sa aletare se be se na le mahlakore a mane ao a lekanago. Botelele bja sona e be e le dimithara tša ka godingwana ga tše tshela gomme bophara bja sona bo le ka godingwana ga dimithara tše tshela.+ 17 Mahlakore a mane a mokgabišo wo o e dikologilego, e be e le a botelele bja ka godingwana ga dimithara tše e ka bago tše šupago le bophara bja dimithara tša ka godingwana ga tše šupago. Morumo wo o e dikologilego e be e le disenthimithara tše e ka bago tše 26 gomme karolo ya ka tlase ya aletare e be e le ka godingwana ga mithara o tee, mahlakoreng ka moka.

“Ditepisi tša yona di be di lebeletše ka bohlabela.”

18 Monna* yoo a bolela le nna a re: “Morwa wa motho, Mmuši Morena Jehofa o re: ‘Tše ke ditaelo tšeo di swanetšego go latelwa ge aletare e dirwa, e le gore go tle go dirwe dibego tše di feletšego tša go fišwa godimo ga yona ebile e foketšwe ka madi.’+

19 “Mmuši Morena Jehofa o re: ‘O tšee powana go tšwa mohlapeng o e nee baperisita bao e lego Balefi, e lego ditlogolwana tša Tsadoko,+ gore e be sebego sa sebe,+ e lego bona bao ba tlago pele ga ka gore ba ntlhankele. 20 O tšee a mangwe a madi a yona o a tlotše manakeng a mane a aletare le dikhoneng tše nne go dikologa mokgabišo le morumo wa yona, e le gore o hlwekiše aletare o be o e direle sehlabelo sa go lebalelwa dibe.+ 21 Ke moka o tšee powana yeo e neelwago e le sehlabelo sa sebe, e le gore o e fišetše lefelong leo le kgethilwego la ka tempeleng, ka ntle ga sekgethwa.+ 22 Ka letšatši la bobedi o tliše phooko yeo e phetšego gabotse e le sebego sa sebe, gomme baperisita ba hlwekiše aletare sebeng go no swana le ka moo ba e hlwekišitšego ka gona sebeng ka powana.’

23 “‘Ge o fetša go e hlwekiša sebeng, o dire sehlabelo ka powana yeo e phetšego gabotse le ka nku e tona yeo e phetšego gabotse yeo e tšwago mohlapeng. 24 O di nee Jehofa gomme baperisita ba di tšhele letswai+ ba be ba di nee Jehofa e le sebego se se feletšego sa go fišwa. 25 O fetše matšatši a šupago o dira sehlabelo ka phooko letšatši le lengwe le le lengwe e le sebego sa sebe.+ O neele le powana le nku e tona go tšwa mohlapeng, e be tše di phetšego gabotse. 26 Ba direle aletare sehlabelo sa go lebalelwa dibe ka matšatši a šupago, ba e hlwekiše ba be ba e lokišetše go tlo dirišwa. 27 Ka morago ga matšatši ao, go thoma ka letšatši la seswai+ go ya pele, baperisita ba neele dibego tša lena tše di feletšego tša go fišwa le dihlabelo tša go dira khutšo le Modimo aletareng gomme le tla nthabiša,’+ o realo Mmuši Morena Jehofa.”