Sakaria
2 Ke ile ka lebelela godimo, ka bona monna ponong yo a bego a swere thapo ya go meta.+ 2 Bjale ka mmotšiša ka re: “O ya kae?”
Yena a re: “Ke ya go meta Jerusalema, e le gore ke bone bophara le botelele bja yona.”+
3 Morongwa yo a bego a bolela le nna a tloga gomme morongwa yo mongwe a tla go mo gahlanetša. 4 Ke moka a re go yena: “Kitima o yo botša lesogana lela o re: ‘“Batho ba tlo dula Jerusalema+ go swana le ge ba dula motseng wo o sego wa ageletšwa ka maboto, ka gobane go tlo ba le batho ba bantši le diruiwa tše dintši moo.+ 5 Jehofa o re: “Nna ke tla ba leboto la yona la mollo leo le e ageleditšego+ ebile letago la ka le tla tlala Jerusalema.”’”+
6 “Hee lena! Theetšang! Tšhabang nageng ya ka leboa,”+ ke nna Jehofa ke bolelago seo.
“Ka gobane ke le phatlalaleditše mahlakoreng ka moka,”*+ ke nna Jehofa ke bolelago seo.
7 “Theetša, Tsione! Tšhabang, lena bao le dulago le morwedi wa Babilona.+ 8 Ka gobane Jehofa wa madira o re: ‘Ka morago ga go tagafatšwa, Modimo o nthometše ditšhabeng tšeo di bego di tšea dilo tša lena, a re:+ Yo a le kgwathago go no swana le ge a nkgwatha ka leihlong.*+ 9 Bjale ke emišetša ditšhaba seatla sa ka gomme makgoba a tšona a tla di thopa.’+ Ge e le lena le tla tseba gore ke romilwe ke Jehofa wa madira.
10 “Goeletša o thabe wena morwedi wa Tsione,+ ka gobane ke a tla+ gomme ke tla dula go wena,”+ se ke seo Jehofa a se bolelago. 11 “Ditšhaba tše dintši di tla hlankela nna Jehofa letšatšing leo+ gomme tšona e tla ba batho ba ka. Le gona ke tla dula le wena morwedi wa Tsione.” O tla tseba gore Jehofa wa madira o nthomile go wena. 12 Jehofa o tla tšea Juda gore e be bohwa bja gagwe nageng e kgethwa, a ba a kgetha motse wa Jerusalema gape.+ 13 Batho ka moka a ba homole pele ga Jehofa, ka gobane o tla a etšwa lefelong le lekgethwa leo a dulago go lona gore a tle a phethe seo a se rerilego ka motse wa Jerusalema.