Baheberu

5 Motho yo mongwe le yo mongwe yo a kgethwago go ba moperisita yo a phagamego o hlankela batho dilong tšeo di sepedišanago le ge ba hlankela Modimo,+ e le gore a neele dimpho le go dira dihlabelo ka baka la dibe tša bona.+ 2 O kgona go šokela bao ba sa tsebego le bao ba dirago diphošo, ka gobane le yena o dira diphošo 3 gomme ka baka leo o swanetše go dira dibego ka baka la dibe tša gagwe go no swana le ge a di direla batho ba bangwe.+

4 Motho ga a ikgethe gore e be moperisita eupša o kgethwa ke Modimo, go no swana le ge Modimo a ile a kgetha Arone.+ 5 Ka mo go swanago, Kriste ga se a ikgetha+ go ba moperisita yo a phagamego, eupša o kgethilwe ke Modimo yo a ilego a bolela le yena a re: “O morwa wa ka, go tloga lehono nna ke tatago.”+ 6 Le gona lengwalong le lengwe o ile a re: “O moperisita go ya go ile go swana le Melekitsedeke.”+

7 Ge Kriste a be a le mo lefaseng, o ile a rapela Modimo yo a kgonago go mo phološa lehung, a mo rapela ka pelo ka moka a lla kudu* ebile a ntšha megokgo,+ gomme Modimo o ile a kwa thapelo ya gagwe ka gobane Kriste o be a mo hlompha. 8 Le ge e be e le Morwa, o ile a ithuta go kwa nakong ya ge a be a diragalelwa ke dilo tše bohloko.+ 9 Ka morago ga gore a kwe dilong ka moka,*+ batho bao ba mo kwago ba ka phološwa gomme ba hwetša bophelo bja go ya go ile ka baka la gagwe,+ 10 ka gobane o kgethilwe ke Modimo gore e be moperisita yo a phagamego go swana le Melekitsedeke.+

11 Go na le dilo tše dintši tšeo re ka di bolelago ka yena eupša go thata go di hlalosa, ka gobane ga le nyake go kwešiša. 12 Ka ye nako nkabe le šetše le le barutiši, eupša le nyaka gore motho a le rute gape dilo tša mathomo+ tšeo le ilego la ithuta tšona lentšung la Modimo, ebile le boetše morago le nyaka maswi e sego dijo tšeo di tiilego. 13 Ka gobane motho yo mongwe le yo mongwe yo a tšwelago pele a iphepa ka maswi feela ke ngwana, ka gore ga se a tlwaelana le lentšu la Modimo leo le rutago dilo tše di lokilego.+ 14 Eupša dijo tšeo di tiilego ke tša batho bao ba tiilego tumelong, bao ba dulago ba diriša bokgoni bja bona bja go nagana, gomme ge ba dira bjalo ba itlwaetša go tseba phapano magareng ga dilo tše dibotse le dilo tše mpe.