Ebangedi ya Mateo
15 Bafarasei le ditsebi tša molao ba tla go Jesu ba etšwa Jerusalema,+ ba re: 2 “Ke ka baka la eng barutiwa ba gago ba sa latele setšo sa batho ba mehleng ya kgale? Ka mohlala, ga ba hlape* diatla ge ba tlo ja dijo.”+
3 A ba araba a re: “Ke ka baka la eng lena le tshela molao wa Modimo ka baka la setšo sa lena?+ 4 Ka mohlala, Modimo o itše: ‘Hlompha tatago le mmago,’+ a buša a re: ‘Yo a bolelago le* tatagwe goba mmagwe ka lenyatšo a bolawe.’+ 5 Eupša le re: ‘Mang le mang yo a botšago tatagwe goba mmagwe a re: “Ke šetše ke tshepišitše Modimo gore ke tla mo nea selo le ge e le sefe seo ke nago le sona seo se ka go holago,”+ 6 ga go nyakege gore a hlomphe tatagwe le gatee.’ Le dirile gore lentšu la Modimo le be bjalo ka ge eka ga le na mohola ka baka la setšo sa lena.+ 7 Lena baikaketši, Jesaya o porofetile ka mo go swanetšego ka lena, ge a be a re:+ 8 ‘Batho ba ba ntheta ka melomo feela, eupša dipelo tša bona di kgole kudu le nna. 9 Ba nthapelela lefeela ka gobane ba ruta melao ya batho bjalo ka ge eka ba ruta dithuto tša Modimo.’”+ 10 Ge a fetša go realo a bolela le lešaba leo le bego le le kgauswi a re: “Theetšang, le be le kwešiše seo ke se bolelago:+ 11 Motho ga a šilafatšwe ke seo se tsenago molomong wa gagwe, eupša o šilafatšwa ke seo se tšwago molomong wa gagwe.”+
12 Ke moka barutiwa ba tla go yena ba re: “Na o a tseba gore Bafarasei ba ile ba kgopišega ge ba ekwa seo o se boletšego?”+ 13 Ke moka a ba araba a re: “Tate wa legodimong o tla tumola semela se sengwe le se sengwe seo se sa bjalwago ke yena. 14 Ba tlogeleng ba kgopišege. Ke bahlahli bao ba foufetšego. Ge e ba sefofu se hlahla sefofu, bobedi bja tšona di tla wela ka moleteng.”+ 15 Petro a re: “Re hlalosetše papišo yeo o boletšego ka yona.” 16 Ke moka Jesu a re: “Na le lena ga se la tšwa le kwešiša?+ 17 Na ga le lemoge gore dilo tšeo di tsenago ka molomong di fetela maleng gomme tša ntšhetšwa moo go elelelago ditšhila? 18 Eupša dilo tše di tšwago ka molomong di tšwa pelong gomme dilo tšeo ke tšona tšeo di šilafatšago motho.+ 19 Ka mohlala, pelong go tšwa dikgopolo tše mpe, e lego+ go bolaya ka tsela le ge e le efe, bohlotlolo,* go itshwara gampe ka tša thobalano,* bohodu, bohlatse bja maaka le go bolela gampe ka Modimo goba ka batho ba bangwe. 20 Tšeo ke dilo tše di šilafatšago motho, eupša go ja dijo ka diatla tše di sa hlapiwago ga go šilafatše motho.”
21 Ge Jesu a tloga moo, o ile a ya tikologong ya Tiro le Sidone.+ 22 Mosadi yo mongwe wa Mofenikia wa go tšwa tikologong yeo, a tla gomme a mo kgopela a re: “Morena, Morwa wa Dafida, nkwele bohloko. Morwedi wa ka o tlaišwa o šoro ke matemona.”+ 23 Eupša Jesu a se mo arabe. Ka gona, barutiwa ba gagwe ba tla ba mo kgopela ba re: “Gomiša mosadi yo ka gobane o duletše go lla a re šetše morago.” 24 Jesu a araba a re: “Modimo o nthometše feela go batho ba Isiraele bao ba swanago le dinku tšeo di timetšego.”+ 25 Eupša mosadi yoo a tla a mo khunamela, a re: “Morena, nthuše!” 26 Jesu a araba a re: “Ke phošo go tšea dijo tša bana wa di lahlela dimpšanyana.” 27 Mosadi yoo a re: “Morena, o bolela nnete eupša dimpšanyana tšeo di ja marathana ao a wago tafoleng ya beng ba tšona.”+ 28 Ke moka Jesu a mo araba a re: “Wena mosadi, o tloga o na le tumelo. Anke seo o se kgopetšego se go diragalele.” Ke moka morwedi wa gagwe a fola go tloga ka yona nako yeo.
29 Ge Jesu a tloga moo, o ile a ya kgauswi le Lewatle la Galelia,+ ka morago a ya thabeng gomme a dula moo. 30 Ke moka mašaba a mantši a batho a tla go yena a tliša batho bao ba hlotšago, bagolofadi, difofu, dimumu le ba bangwe bao ba bego ba babja. Mašaba ao a ba bea pele ga Jesu gomme yena a ba fodiša.+ 31 Ka gona, batho ba bantši ba ile ba makala ge ba bona dimumu di bolela, bagolofadi ba fodišitšwe, bao ba bego ba hlotša ba kgona go sepela gabotse le difofu di bona, gomme ba reta Modimo wa Isiraele.+
32 Eupša Jesu a biletša barutiwa ba gagwe go yena a re: “Ke kwela batho ba bohloko+ ka gobane e šetše e le matšatši a mararo ba na le nna gomme ga se ba ja selo. Ga ke nyake go ba phatlalatša ba swerwe ke tlala ka gobane ba ka felelwa ke maatla tseleng.”+ 33 Eupša barutiwa ba gagwe ba re go yena: “Re tlo hwetša kae dinkgwa tšeo di tlago go lekana lešaba le la batho gore le je le khore mo lefelong le le lego kgole le mo go dulago batho?”+ 34 Ke moka Jesu a re go bona: “Le na le dinkgwa tše kae?” Ba re: “Re na le dinkgwa tše šupago le dihlapi tše dinyenyane tše sego kae.” 35 Ka morago ga go laela lešaba gore le dule fase, 36 o ile a tšea dinkgwa tšeo tše šupago le dihlapi tšela gomme a rapela. Ka morago ga gore a rapele, a di ngwathaganya ke moka a thoma go di nea barutiwa ba gagwe, bona ba di nea mašaba a batho.+ 37 Batho ka moka ba ile ba ja ba khora gomme barutiwa ba kgoboketša marathana ao a bego a šetše a tlatša mebanki e megolo e šupago.+ 38 Dijo tšeo di jelwe ke banna ba 4 000 go sa balwe basadi le bana. 39 Ka morago ga gore Jesu a phatlalatše mašaba, o ile a namela sekepe a ya tikologong ya Magadana.+