Baheberu

11 Tumelo ke go tshepa le go kgodišega gore selo seo se tshepišitšwego se tlo direga.+ Le gona ke bohlatse bjo bo lego molaleng bja dilo tšeo di sa bonwego. 2 Ka ge batho ba mehleng ya kgale ba be ba na le tumelo, Modimo o ile a bontšha gore o a ba amogela.

3 Go ba le tumelo go dira gore re lemoge gore dilo tšeo di lego legodimong le mo lefaseng di beilwe mo di swanetšego go ba gona go ya ka taelo ya Modimo, le gore dilo tšeo re di bonago di tšwele go dilo tšeo re sa di bonego.

4 Ka ge Abele a be a na le tumelo, o ile a direla Modimo sehlabelo se sekaone go feta sa Kaine,+ ka baka la tumelo yeo, Modimo o ile a bontšha gore o mo lebelela a lokile. O ile a bontšha seo ka go amogela sehlabelo sa gagwe.+ Le ge a hwile tumelo ya gagwe e sa bolela le rena.+

5 Ka ge Henoge+ a be a na le tumelo, o ile a tlošwa e le gore a se ke a hwa go swana le batho ba bangwe. O be a se sa hwetšagala felo, ka gobane Modimo o be a mo tlošitše.+ Pele a ka tlošwa, Modimo o ile a mmontšha bohlatse bja gore o mo thabišitše. 6 Le gona ga go kgonege gore motho a kgahliše Modimo ge e ba a se na tumelo, ka gobane motho yo a nyakago go hlankela Modimo o swanetše go dumela gore o gona le gore o putsa bao ba tlogago ba nyaka go mo hlankela.+

7 Ka ge Noa+ a be a na le tumelo, o ile a kwa Modimo* ge a be a mmotša ka dilo tšeo di bego di tlo direga tšeo di bego di sa ka tša bonwa,+ gomme o ile a aga areka+ gore a phološe lapa la gagwe. Le gona ka ge a be a na le tumelo, o ile a bontšha gore lefase le le swanetše go otlwa.+ Ke moka Modimo o ile a mo amogela ka ge a be a na le tumelo.*

8 Ka ge Aborahama+ a be a na le tumelo, o ile a kwa ge Modimo a be a mmitša gomme a tloga a ya lefelong leo Modimo a bego a tla mo nea lona e le bohwa. O ile a sepela le ge a be a sa tsebe mo a yago gona.+ 9 Ka ge a be na le tumelo o ile a dula nageng yeo e sego ya gabo+ yeo Modimo a bego a mo tshepišitše yona. O ile a dula ditenteng+ le Isaka le Jakobo, bao le bona Modimo a bego a ba tshepišitše go ba fa naga yeo.+ 10 Ka gobane o be a letetše motse wo o nago le fantešeni e tiilego, wo o hlamilwego le go agwa ke Modimo.+

11 Ka ge Sara le yena a be a na le tumelo o ile a ima le ge nako ya gore a kgone go ima e be e fetile,+ ka gobane o be a dumela gore yo a dirilego tshepišo yeo o a tshepega. 12 Ka baka leo, ka motho o tee, yena Aborahama yo go bego go bonagala eka a ka se sa kgona go ba le bana,*+ go ile gwa belegwa bana+ ba bantši kudu go swana le dinaledi tša legodimong le go swana le santa ya lewatleng.+

13  Batho ba ka moka ba ile ba hwa ba na le tumelo. Le ge dilo tšeo Modimo a bego a ba tshepišitše+ tšona di be di tlo phethagala nakong e tlago,+ eupša go bona go be go no swana le ge eka ba šetše ba di bone. Ba ile ba di thabela ba ba ba botša batho gore ba tšwa nageng e nngwe le gore ba tlo dula ka nakwana nageng yeo ba lego go yona. 14 Ka gobane bao ba bolelago bjalo ba bontšha gore ba tloga ba nyaka lefelo leo e lego la bona. 15 Eupša ge nkabe ba ile ba dulela go nagana ka lefelo leo ba tlogilego go lona,+ gona ba ka be ba ile ba hwetša sebaka sa go boela morago. 16 Eupša bjale ba duma lefelo le le kaone, e lego la legodimong. Ka gona Modimo ga a hlabje ke dihlong tša go bitšwa Modimo wa bona,+ ka gobane o ba lokišeleditše motse.+

17 Ka ge Aborahama a be a na le tumelo ge a be a lekwa,+ go be go le bjalo ka ge eka o šetše a dirile sehlabelo ka Isaka. Monna yo yoo a ilego a amogela dikholofetšo tša Modimo a thabile, o ile a leka go dira sehlabelo ka morwa wa gagwe a nnoši,+ 18 le ge Modimo a be a mmoditše a re: “Isaka ke yena e tlago go ba tatago setšhaba se segolo seo ke go tshepišitšego sona.”+ 19 O be a tshepa gore Modimo a ka kgona go tsoša morwa wa gagwe bahung, ka gona o ile a mo amogela bjalo ka ge eka o be a hwile, gomme seo se swantšhetša seo se tlago go direga nakong e tlago.+

20 Ka ge Isaka le yena a be a na le tumelo, o ile a šegofatša Jakobo+ le Esau,+ a ba botša dilo tšeo di bego di tlo direga nakong e tlago.

21 Ka ge Jakobo a be a na le tumelo, ge a be a le kgauswi le go hwa,+ o ile a šegofatša barwa ba babedi ba Josefa+ gomme a rapela Modimo a ikokotletše ka ntlha ya patla ya gagwe.+

22 Ka ge Josefa a be a na le tumelo, ge a be a le kgauswi le go hwa o ile a bolela gore Baisiraele ba be ba tla tšwa Egepeta gomme a ba botša gore ba tšee marapo a gagwe ge ba sepela.+

23 Ka ge batswadi ba Moshe ba be ba na le tumelo, ba ile ba mo khutiša ka dikgwedi tše tharo ka morago ga ge a belegwe,+ ka gobane ba be ba bone gore e be e le ngwana yo mobotsana+ gomme ba ile ba se tšhabe go tshela taelo ya kgoši.+ 24 Ka ge Moshe a be a na le tumelo, ge a godile+ o ile a gana go bitšwa morwa wa morwedi wa Farao.+ 25 O ile a kgetha go swarwa gampe le setšhaba sa Modimo go e na le go ipshina ka nakwana ka sebe, 26 ka gobane o ile a lebelela go gobošwa ka baka la Kriste go le bohlokwa go feta mahumo a Egepeta, ka gore o be a letile ka pelo ka moka gore a tle a hwetše tšhegofatšo. 27 Ka ge Moshe a be a na le tumelo, o ile a tloga Egepeta+ eupša e sego ka gobane a be a tšhaba gore kgoši e tlo galefa.+ O ile a tšwela pele a kgotleletše mathata a sa fele pelo, go le bjalo ka ge eka o bona Modimo yo go se nago motho yo a ka kgonago go mmona.+ 28 Ka ge a be a na le tumelo, o ile a dira gore batho ba keteke Paseka le go gaša madi diforeimeng tša mabati a bona e le gore morongwa wa Modimo a se ke a bolaya bana ba bona ba mathomo.+

29 Ka ge Baisiraele ba be ba na le tumelo, ba ile ba feta Lewatleng le Lekhwibidu go no swana le ge eka ba sepela nageng yeo e omilego,+ eupša ge Baegepeta ba leka go feta, ba ile ba kgangwa ke meetse ba hwa.+

30 Ka ge Baisiraele ba be ba na le tumelo, maboto a Jeriko a ile a wa ka morago ga gore ba a dikologe ka matšatši a šupa.+ 31 Ka ge Rahaba wa mogwebakammele a be a na le tumelo, ga se a hwa le batho ba go se kwe, ka gobane ge batho ba go hlola naga ba be ba tlile Jeriko o ile a ba amogela gabotse.+

32 Bjale nka bolela eng gape? Ka gobane ke tla felelwa ke nako ge nkare ke bolela ka Gideone,+ Baraka,+ Simisone,+ Jefeta,+ Dafida,+ Samuele+ le baporofeta ba bangwe. 33 Ka ge ba be ba na le tumelo ba ile ba fenya mebušo,+ ba dira se se lokilego, ba hwetša dilo tšeo Modimo a ba tshepišitšego,+ ba thiba melomo ya ditau,+ 34 ba se fišwe ke mollo o bogale,+ ba phologa go bolawa ka sabola,+ ba fiwa maatla ge ba be ba fokola,+ ya ba mašole a maatla ntweng+ ebile ba rakediša mašole ao a bego a ba hlasela.+ 35 Basadi ba bangwe ba ile ba amogela batho ba gabo bona bao ba ilego ba tsošwa bahung.+ Le ge batho bao ba tshepegago ba ile ba tlaišwa, ga se ba ka ba tlogela go tshepagalela Modimo, e le gore ba lokollwe. Ba ile ba kgotlelela e le gore ba tle ba tsošwe bahung ka tsela e kaone go feta yeo ba bangwe ba tsošitšwego ka yona. 36 Ba bangwe ba ile ba lekwa ka go kwerwa le go itiwa, go feta moo ba ile ba tlengwa ka diketane+ le go lahlelwa dikgolegong.+ 37 Ba ile ba kgatlwa ka maswika,+ ba lekwa, ba ntšhiwa diripa tše pedi ka disaga, ba bolawa ka sabola,+ ba sepela ba apere matlalo a dinku le a dipudi,+ mola ba se na selo, ba tlaišwa+ le go swarwa gampe,+ 38 gomme lefase le be le sa ba swanele. Ba ile ba tšhabela maganateng, dithabeng, ka maweng+ le ka meleteng.

39 Le ge Modimo a ile a bontšha batho ba ka moka gore o a ba amogela ka ge ba be ba na le tumelo, eupša ga se ba ka ba bona ditshepišo tša Modimo di phethagala, 40 ka gobane Modimo o be a nyaka go tlo re fa selo se sekaone kudu,+ e le gore ba se ke ba dirwa bao ba se nago sebe pele ga rena.