Ebangedi ya Luka
23 Ka gona batho ka moka bao ba bego ba le moo, ba ema ba iša Jesu go Pilato.+ 2 Ke moka ba thoma go mmea molato+ ba re: “Re hweditše motho yo a aroša setšhaba sa gabo rena, a se ganetša go ntšhetša Kesara motšhelo+ ebile a ipitša gore ke yena Kriste le gore ke yena kgoši.”+ 3 Ke moka Pilato a mmotšiša a re: “Na ke wena Kgoši ya Bajuda?” Jesu a araba a re: “Wena ka noši o boletše.”+ 4 Ke moka Pilato a botša baperisita ba bagolo le batho bao ba bego ba le moo a re: “Motho yo ga ke mmone molato.”+ 5 Eupša ba phegelela, ba re: “Dilo tše a di rutago Judea ka moka, go tloga Galelia go fihla mo, di baka mathata.” 6 Ge Pilato a ekwa seo a botšiša a re, na motho yo ke Mogalelia? 7 Ka morago ga gore a kgonthišetše gore Jesu o be a etšwa lefelong leo le bušwago ke Heroda,+ o ile a mo romela go Heroda yoo mehleng yeo le yena a bego a le Jerusalema.
8 Ge Heroda a bona Jesu, o ile a thaba kudu ka gobane o be a feditše nako e ntši kudu a nyaka go bona Jesu ka ge a be a kwele dilo tše dintši ka yena,+ ebile o be a duma go mmona a dira mohlolo. 9 Ka gona a botšiša Jesu dipotšišo tše dintši, eupša a se mo arabe.+ 10 Le ge go le bjalo, baperisita ba bagolo le ditsebi tša molao, ba tšwela pele ba eme ba mo latofatša ba galefile. 11 Ke moka Heroda le mašole a gagwe ba mo tlontlolla+ gomme Heroda a dira metlae+ ka yena ka go mo apeša seaparo se sebotse gomme a mmušetša go Pilato. 12 Go tloga ka lona letšatši leo, Heroda le Pilato ba ile ba ba bagwera ka ge pele ga moo, ba be ba sa kwane.
13 Ke moka Pilato a bitša baperisita ba bagolo, babuši le setšhaba, 14 a re go bona: “Le tlišitše motho yo go nna le re o hlohleletša batho gore ba hlanogele mmušo. Bjale ke mo sekišitše pele ga lena, eupša ga ke hwetše mabaka a go kwagala ao le mo latofatšago ka ona.+ 15 Ge e le gabotse le Heroda ga se a a hwetša, ka gobane ke mo o mo gomišeditše go rena. Ga go na selo se sebe seo a se dirilego seo se ka dirago gore a bolawe. 16 Ka gona ke tla mo otla+ gomme ka mo lokolla.” 17* —— 18 Eupša batho ka moka ba goeletša ba re: “Tloša motho yo, ke moka o re lokollele Baraba!”+ 19 (Monna yo o be a lahletšwe kgolegong ka ge a be a dirile gore batho ba hlanogele mmušo le ka baka la molato wa polao woo a bego a na le wona.) 20 Pilato a boledišana le bona gape ka gobane o be a nyaka go lokolla Jesu.+ 21 Ke moka ba goeletša, ba re: “A a kokotelwe koteng! A a kokotelwe koteng!”+ 22 Ke moka a re go bona ka lekga la boraro: “Ka baka la eng? Ke selo sefe se sebe seo motho yo a se dirilego? Ga ke bone lebaka leo le dirago gore a swanelwe ke go bolawa. Ka gona ke tla mo otla gomme ka mo lokolla.” 23 Ge a realo, ba gakala le go feta. Ba goeletša kudu ba nyaka gore a kokotelwe koteng. Ba ile ba goeletša kudu moo+ 24 Pilato a ilego a phetha ka go ba direla seo ba bego ba se nyaka. 25 O ile a ba lokollela monna yoo ba bego ba mo nyaka yo a bego a lahletšwe kgolegong. Monna yo o be a lahletšwe kgolegong ka ge a be a dirile gore batho ba hlanogele mmušo ebile a na le molato wa polao. Ke moka Pilato a ba fa Jesu gore ba mo dire seo ba bego ba nyaka go mo dira sona.
26 Ge ba be ba etšwa le Jesu, ba ile ba emiša monna yo mongwe wa go tšwa Kirene yo a bitšwago Simone yoo a bego a etšwa dinagamagaeng. Ba ile ba mo rweša kota ya tlhokofatšo* gomme ba re a šale Jesu morago.+ 27 Go be go na le batho ba bantši bao ba bego ba mo šetše morago. Gare ga batho bao, go be go na le basadi bao ba bego ba mo llela ebile ba itshetla dihuba go bontšha gore ba kwele bohloko. 28 Jesu a retologa, a bolela le basadi bao, a re: “Barwedi ba Jerusalema, tlogelang go ntelela. Go e na le moo, iteleleng le be le llele le bana ba lena,+ 29 ka gobane go tla tla matšatši ao batho ba tlago gore: ‘Go thaba basadi bao ba sa kgonego go ba le bana, bao ba sa kago ba ba le bana le bao ba sa kago ba nyantšha!’+ 30 Ke moka batho ba tla thoma gore go dithaba: ‘Re weleng!’ Ba re le go meboto: ‘Re khupetšeng!’+ 31 Ge e ba ba dira dilo tše mohlare o sa phetše gabotse, gona go tla direga eng ge o omeletše?”
32 Banna ba bangwe ba babedi bao e bego e le dikebekwa le bona ba be ba išwa go yo bolawa gotee le Jesu.+ 33 Ge ba fihla lefelong leo le bitšwago Marapo a Hlogo,*+ ba ile ba kokotela Jesu koteng kgauswi le dikebekwa tšeo. Sekebekwa se sengwe se le ka letsogong la gagwe le letona gomme se sengwe se le ka go le letshadi.+ 34 Eupša Jesu o be a re: “Tate, ba lebalele, ka gobane ga ba tsebe seo ba se dirago.” Le gona ba ile ba dira matengwa gore ba abaganye diaparo tša gagwe.+ 35 Batho ba be ba eme ba lebeletše. Eupša babuši ba be ba šinyaletše, ba re: “O kgonne go phološa ba bangwe. Bjale ge e ba e le Kriste yo Modimo a mo kgethilego, gona le yena a a iphološe.”+ 36 Mašole le ona a be a dira metlae ka yena, a eya go yena a mo nea beine e galakago+ 37 gomme a re: “Ge e ba o le Kgoši ya Bajuda, gona iphološe.” 38 Le gona ka godimo ga gagwe go be go na le mongwalo woo o rego: “Yo ke Kgoši ya Bajuda.”+
39 Se sengwe sa dikebekwa tšeo di bego di fegilwe moo sa thoma go mo hlaba ka mantšu+ sa re: “Na ga se wena Kriste? Iphološe, le rena o re phološe!” 40 Sekebekwa sela se sengwe sa se kgalemela sa re: “Na ga o hlomphe Modimo ka ge le wena o ahlotšwe ka tsela e swanago? 41 Rena kotlo ye e a re swanela, ka gobane re hwetša moputso wa seo re se dirilego, eupša monna yo ga go na phošo yeo a e dirilego.” 42 Ke moka a re: “Jesu, o nkgopole ge o eba Kgoši.”*+ 43 Ke moka Jesu a re go yena: “Ruri ke go botša lehono gore o tla ba le nna Paradeiseng.”+
44 Bjale ka nako yeo e be e le mo e ka bago ka iri ya bo-12 mosegare,* eupša go ile gwa ba le leswiswi nageng ka moka go ba go fihla mo e ka bago ka iri ya boraro thapama,*+ 45 ka gobane seetša sa letšatši se ile sa swifala, ke moka gareteine ya lefelo le lekgethwa la tempele+ ya kgeiga ka bogare.+ 46 Ke moka Jesu a goeletša ka lentšu le le hlabošago a re: “Tate, ke bea moya wa ka diatleng tša gago.”+ Ge a se na go bolela bjalo, a hlokofala.*+ 47 Ge molaodi wa mašole a se na go bona seo, o ile a thoma go tumiša Modimo a re: “Ruri monna yo o be a lokile.”+ 48 Mašaba ao a bego a kgobokane moo gore a tle a bone ge Jesu a bolawa, a ile a bona dilo tšeo di diregilego, ke moka a boela gae a itshetla dihuba go bontšha gore a kwele bohloko. 49 Le gona batho ka moka bao ba bego ba mo tlwaetše ba be ba emetše kgojana. Basadi bao ba ilego ba sepela le yena go tloga Galelia le bona ba be ba le moo, ebile ba bone seo se diragetšego.+
50 Go be go na le monna yo mongwe yo a bitšwago Josefa. Monna yoo e be e le wa Lekgotla la bodumedi. O be a na le botho ebile a lokile.+ 51 Monna yo ga se a ka a thekga maano a bona le dilo tšeo ba bego ba di dira. O be a etšwa Arimathea, motseng wa Judea ebile a letetše Mmušo wa Modimo. 52 O ile a ya go Pilato a kgopela setopo sa Jesu. 53 Ke moka a mo fološa moo koteng+ a mo phuthela ka lešela le lebotse la linene gomme a mmoloka lebitleng leo le bego le epilwe leswikeng.+ Go be go sa ka gwa bolokwa motho moo. 54 Bjale e be e le letšatši la go Lokišetša Sabatha+ ebile nako ya gore Sabatha+ e thome e be e šetše e batametše. 55 Basadi bao ba ilego ba sepela le Jesu go tloga Galelia le bona ba ile ba ya lebitleng gore ba le bone le go bona moo setopo sa gagwe se bego se robaditšwe gona.+ 56 Ke moka ka morago ba boela morago go yo lokišetša makhura ao a nkgago bose. Ka letšatši la Sabatha+ ba ile ba khutša go ya ka molao.