Ebangedi ya Mateo

26 Bjale ge Jesu a feditše go bolela dilo tše ka moka, a re go barutiwa ba gagwe: 2 “Le a tseba gore matšatši a mabedi go tloga gona bjale e tlo ba e le Paseka,+ le gore Morwa wa motho o tla išwa bathong gore ba mo kokotele koteng.”+

3 Ke moka baperisita ba bagolo le banna ba bagolo ba setšhaba ba kgobokana lapeng la moperisita yo a phagamego yo a bego a bitšwa Kayafa,+ 4 gomme ba logela Jesu maanomabe ka sephiring+ a gore ba mo sware ba mmolaye. 5 Eupša ba be ba re: “A re se keng ra mo swara monyanyeng, e le gore go se ke gwa tsoga mpherefere gare ga batho.”

6 Nakong ya ge Jesu a be a le Bethania ka ntlong ya Simone yo a kilego a ba le bolwetši bja lephera,+ 7 mosadi yo a bego a swere lepotlelwana la alapasetere leo le bego le na le makhura ao a nkgago bose ao a bego a dirilwe ka nareda ya nnete ebile a tura kudu, o ile a mmatamela ke moka a thoma go mo tšhela ka makhura ao hlogong ge a be a dutše tafoleng. 8 Ge barutiwa ba bona seo, ba galefa gomme ba re: “Ke ka baka la eng mosadi yo a senya makhura ka tsela ye? 9 Ka gobane nkabe a ile a rekišwa ka tšhelete e ntši gomme ya newa badiidi.” 10 Ka ge Jesu a ile a lemoga seo, o ile a re go bona: “Ke ka baka la eng le tshwenya mosadi yo? O ntiretše selo se sebotse. 11 Le dula le na le badiidi ka mehla,+ eupša nna le ka se dule le na le nna.+ 12 Ge mosadi yo a be a ntšhela ka makhura a a go nkga bose mmeleng, o dirile se e le go ntokišetša go tlo bolokwa.+ 13 Ruri ke le botša gore kae le kae mo ditaba tše tše dibotse di tlago go bolelwa gona lefaseng ka moka, se mosadi yo a se dirilego le sona se tla bolelwa e le go mo gopola.”+

14 Ke moka yo mongwe wa baapostola ba 12, yo a bitšwago Judase Isikariote,+ o ile a ya go baperisita ba bagolo+ 15 a re: “Ge nka le thuša gore le sware Jesu le tlo mpha eng?”+ Ba ile ba mo tshepiša gore ba tlo mo fa ditšhelete tša silifera tše 30.+ 16 Ka gona go tloga ka nako yeo go ya pele a dula a nyaka sebaka se sebotse sa gore a ba thuše gore ba mo sware.

17 Ge letšatši la mathomo la go lokišeletša Monyanya wa Dinkgwa tše di sa Omelwago+ le fihla, barutiwa ba ile ba tla go Jesu ba re: “O nyaka gore re go lokišeletše go ja Paseka kae?”+ 18 A re: “Eyang motseng go Semangmang le re go yena: ‘Morutiši o re: “Nako ya ka yeo e beilwego e batametše. Ke tla keteka Paseka le barutiwa ba ka ka lapeng la gago.”’” 19 Ka gona, barutiwa ba dira kamoo Jesu a ba laetšego ka gona gomme ba lokišetša Paseka.

20 Ge e šetše e le mantšiboa,+ o be a dutše tafoleng le barutiwa ba gagwe ba 12.+ 21 Ge ba dutše ba eja, a re: “Ruri ke re go lena, yo mongwe wa lena o tla dira gore manaba a ka a ntshware.”+ 22 Ka ge taba ye e be e ba kwešitše bohloko kudu, yo mongwe le yo mongwe wa bona o ile a thoma gore go yena: “Morena, ga se nna akere?” 23 A ba araba a re: “Yo a tsenyago seatla ka sebjaneng gotee le nna ke yena a tlago go dira gore manaba a ka a ntshware.+ 24 Ke nnete gore Morwa wa motho o a tloga, bjalo ka ge go ngwadilwe ka tsela ye ka yena. Eupša yo madimabe+ ke motho yoo Morwa wa motho a tlago go swarwa ke manaba a gagwe ka baka la gagwe!+ Nkabe go bile kaone ge nkabe motho yoo a se a belegwa.”+ 25 Judase yo a bego a le kgauswi le go dira gore Jesu a swarwe ke manaba a gagwe, a araba a re: “Rabi,* ga se nna akere?” Jesu a re go yena: “Wena ka noši o boletše.”

26 Ge ba dutše ba eja, Jesu o ile a tšea senkgwa a rapela, ke moka ka morago a se ngwathaganya+ a se nea barutiwa ba gagwe, a re: “Tšeang le je. Senkgwa se se swantšhetša mmele wa ka.”+ 27 Ge a se na go tšea komiki yeo e nago le beine, o ile a rapela gomme a ba fa yona a re: “Ka moka ga lena enwang,+ 28 ka gobane beine ye e swantšhetša ‘madi+ a ka a kgwerano e mpsha,’+ ao a tlago go tšhollwa e le gore batho ba bantši+ ba tle ba lebalelwe dibe.+ 29 Eupša ke re go lena, nka se sa nwa beine ye* go fihla letšatšing leo ke tlago go nwa beine e mpsha le lena Mmušong wa Tate.”+ 30 Mafelelong, ka morago ga gore ba opele dikoša tša go tumiša Modimo, ba ile ba ya Thabeng ya Mehlware.+

31 Ke moka Jesu a re go bona: “Ka moka ga lena le tlo ntlogela bošegong bjo ka baka la dilo tšeo di tlago go ntiragalela, ka gobane mangwalo a re: ‘Ke tla hlaba modiši gomme mohlape wa dinku wa phatlalala.’+ 32 Eupša ka morago ga ge ke tsošitšwe bahung, ke tla ya Galelia+ gomme ka le emela moo.” 33 Eupša Petro a mo araba a re: “Le ge ba bangwe ka moka ba ka go tlogela ka baka la dilo tšeo di tlago go go diragalela, nna yena nka se tsoge ke go tlogetše!”*+ 34 Jesu a re go yena: “Ruri ke go botša gore bošegong bjo, pele mokoko o lla, o tlo ntatola gararo.”+ 35  Petro a re go yena: “Le ge nka gapeletšega go hwa le wena, nka se go latole le gatee.”+ Barutiwa ba bangwe ka moka le bona ba bolela se se swanago.

36 Ke moka Jesu a tla le barutiwa ba gagwe lefelong leo le bitšwago Getsemane+ gomme a re go bona: “Ke ya kua go yo rapela, bjale lena dulang mo.”+ 37 A tloga le Petro le barwa ba babedi ba Tsebedeo, ke moka a thoma go nyama le go tshwenyega kudu.+ 38 Ke moka a re go bona: “Ke nyamile kudu ebile ke kwa okare nka hwa. Lena dulang mo, le se ke la robala gomme le dule le phafogile go swana le ge nna ke phafogile.”+ 39 Eitše ge a sepetše sebakanyana, a khunama sefahlego sa gagwe se kgwathile fase a rapela a re:+ “Tate, ge e ba go kgonega, hle tloša komiki*+ ye kgauswi le nna. Efela anke go se direge seo nna ke se nyakago, eupša go direge seo wena o se nyakago.”+

40 Ke moka a boela go barutiwa ba gagwe gomme a hwetša ba robetše, ke moka a re go Petro: “Na le paletšwe ke go dula le phafogile ka iri e tee feela go swana le ge nna ke be ke phafogile?+ 41 Dulang le phafogile+ gomme le dule le rapela,+ e le gore le se wele molekong.+ Moya o mafolofolo eupša mmele ga o na maatla.”*+ 42 A boela ka lekga la bobedi a rapela a re: “Tate, ge e ba go sa kgonege gore ke se ke ka nwa seo se lego ka komiking ye, gona a go direge seo wena o se nyakago.”+ 43 A boa gape a ba hwetša ba robetše, ka gobane mahlo a bona a be a imelwa ke boroko. 44 Ka gona a ba tlogela, a boela a yo rapela gape la boraro, a bolela se se swanago. 45 Ke moka a boela go barutiwa ba gagwe a re go bona: “Ke ka baka la eng le robetše ebile le ikhuditše ka nako e bohlokwa go swana le ye! Bonang! Nako ya gore Morwa wa motho a neelwe diatleng tša badiradibe e batametše. 46 Tsogang, a re sepeleng. Bonang! Moeki wa ka o batametše.” 47 Ge a sa dutše a bolela, go ile gwa tšwelela Judase, e lego yo mongwe wa baapostola ba 12. O be a na le lešaba le legolo leo le bego le swere disabola le melamo, leo le bego le romilwe ke baperisita ba bagolo le banna ba bagolo ba setšhaba.+

48 Bjale Judase yo a bego a tlo mo rekiša o be a ba file leswao, a itše: “Yo ke tlago go mo khisa, ke yena yo le mo nyakago, le mo swareng.” 49 A ya thwii go Jesu a re: “Dumela Rabi!” Ke moka a mo khisa. 50 Eupša Jesu a re go yena: “Wešo, o tlile go dira eng mo?”+ Ke moka ba batamela, ba swara Jesu ba tloga le yena. 51 Eupša yo mongwe wa bao ba bego ba na le Jesu a swara sabola ya gagwe, a e ntšha mokotleng wa yona gomme a kgaola tsebe ya mohlanka wa moperisita yo a phagamego ka yona.+ 52 Ke moka Jesu a re go yena: “Bušetša sabola ya gago moo e bego e le gona,+ ka gobane bohle bao ba dirišago sabola ba tla bolawa ka sabola.+ 53 Goba na o nagana gore nka palelwa ke go kgopela Tate gore a nthomele barongwa ba diketekete* gore ba tle ba ntšhireletše gona bjale?+ 54 Eupša ge nka dira bjalo, gona Mangwalo ao a bolelago gore dilo tše di swanetše go direga, a tla phethagala bjang?” 55 Ka nako yeo, Jesu a re go mašaba: “Na ke lehodu moo le tlilego go nna ka melamo le disabola gore le tle le ntshware? Ke be ke ehlwa ke dutše ka tempeleng letšatši le lengwe le le lengwe ke ruta,+ eupša ga se la ka la ntshwara.+ 56 Le ge go le bjalo, dilo tše ka moka di diregile e le gore mangwalo a baporofeta a phethagale.”+ Ke moka barutiwa ba gagwe ka moka ba mo tlogela ba tšhaba.+

57  Batho bao ba bego ba swere Jesu ba ile ba mo iša go Kayafa+ moperisita yo a phagamego, moo ditsebi tša molao le banna ba bagolo ba bego ba kgobokane gona.+ 58 Eupša Petro a tšwela pele a mo latela a le kgojana go ba go fihla lapeng la moperisita yo a phagamego. Bjale ka morago ga gore a tsene moo, o ile a dula le batho bao ba hlankelago ntlong gore a bone gore mafelelong go tlo direga eng.+

59 Bjale baperisita ba bagolo le batho ka moka ba Sanhedrine* ba be ba nyaka batho bao ba ka tlago ba latofatša Jesu ka maaka e le gore ba kgone go mmolaya.+ 60 Go ile gwa tla batho ba bantši bao ba latofatšago Jesu ka maaka, eupša ga se gwa hwetšwa seo ba ka mo latofatšago ka sona.+ Ka morago go ile gwa tla ba bangwe ba babedi 61 gomme ba re: “Monna yo o itše: ‘Nka phušola tempele ya Modimo gomme ka e aga ka matšatši a mararo.’”+ 62 Ge ba realo, moperisita yo a phagamego a emelela gomme a re go Jesu: “Ke ka baka la eng o sa bolele selo? Na o a kwa gore banna ba ba go latofatša ka eng?”+ 63 Eupša Jesu a se re selo.+ Ka gona moperisita yo a phagamego a re go yena: “Re botše nnete pele ga Modimo yo a phelago. Na ke wena Kriste Morwa wa Modimo?”+ 64 Jesu a re go yena: “Wena ka noši o boletše. Eupša ke re go lena, go tloga gona bjale le tla bona Morwa wa motho+ a dutše ka letsogong le letona la Ramatlaohle+ a etla a le godimo ga maru a legodimo.”+ 65 Ke moka moperisita yo a phagamego a gagola diaparo tša gagwe tša ka ntle, a re: “O rogile Modimo! Re sa nyakela eng dihlatse tše dingwe? Le ikwetše gore motho yo o rogile Modimo. 66 Le reng ka taba ye?” Bona ba re: “O swanetše go hwa.”+ 67 Ke moka ba mo tshwela ka mare sefahlegong+ gomme ba mo itia ka difeisi.+ Ba bangwe ba mmetha ka dimpama,+ 68 ba re: “Re porofetele wena Kriste. Ke mang yo a go bethilego?”

69 Bjale Petro o be a dutše ka ntle lapeng, gomme ngwanenyana yo e bego e le mohlanka a tla go yena a re: “Le wena o be o na le Jesu wa Mogalelia!”+ 70 Eupša a latola pele ga batho bao ba bego ba le moo a re: “Ga ke tsebe gore o bolela ka eng.” 71 Ge a eya phaphošing yeo e lego kgauswi le keiti, ngwanenyana yo mongwe le yena o ile a mmona gomme a re go bao ba bego ba le moo: “Monna yo o be a na le Jesu wa Monatsaretha.”+ 72 O ile a gana gape a ba a ena a re: “Monna yoo ga ke mo tsebe!” 73 Ka moragonyana, batho bao ba bego ba eme moo ba ile ba tla go Petro gomme ba re: “Ka nnete le wena o yo mongwe wa bona, ebile ge e le gabotse, o bolela go swana le batho ba go tšwa Galelia.” 74 Ke moka a thoma go bolela a tiišitše gore ge e ba a sa bolele nnete a rogakwe. A re: “Monna yoo ga ke mo tsebe!” Ke moka mokoko wa napa wa lla ka yona nako yeo. 75 Ka gona, Petro a gopola mantšu a Jesu ge a be a re: “Pele mokoko o lla, o tlo ntatola gararo.”+ Ke moka a tšwela ka ntle gomme a lla gabohloko.