Ebangedi ya Johane
15 “Ke nna moterebe wa nnete gomme Tate ke molemi. 2 Lekala le lengwe le le lengwe leo le lego go nna leo le sa enywego dienywa o a le ripa gomme le lengwe le le lengwe leo le enywago dienywa o a le hlwekiša* e le gore le enywe dienywa tše dintši.+ 3 Lena le šetše le hlwekile ka gobane le ile la theetša dilo tšeo ke bego ke le botša tšona.+ 4 Dulang le le selo se setee le nna gomme le nna ke tla dula ke le selo se setee le lena. Go no swana le ge lekala le ka se kgone go enywa dienywa ge le ripilwe moterebeng, le lena le ka se kgone go enywa dienywa ge e ba le sa dule le le selo se setee le nna.+ 5 Ke nna moterebe gomme lena le makala. Yo mongwe le yo mongwe yo a dulago a na le nna gomme le nna ke na le yena, o tla enywa dienywa tše dintši+ ka gobane le ka se kgone go dira selo ka ntle le nna. 6 Ge e ba motho le ge e le ofe a sa dule a na le nna, o tla swana le lekala leo le remilwego gomme la oma. Ke moka batho ba kgoboketša makala ao ba a lahlela mollong a swa. 7 Ge e ba le dula le le selo se setee le nna ebile le ekwa dilo tšeo ke di bolelago, gona selo le ge e le sefe seo le se kgopelago, le tla se fiwa.+ 8 Ge e ba le tšwela pele le enywa dienywa tše dintši ebile le bontšha gore le barutiwa ba ka, le dira gore Tate a tumišwe.+ 9 Go no swana le ge Tate a nthata le nna ke a le rata.+ Ka gona dulang le bontšha gore le batho bao ke ba ratago. 10 Ge e ba le ekwa ditaelo tša ka ke tla dula ke le rata. Tate le yena o dula a nthata ka ge ke ekwa ditaelo tša gagwe.
11 “Ke le boditše dilo tše e le gore le thabe go swana le nna gomme lethabo leo e be le legolo.+ 12 Ke le laela gore le ratane go swana le ge nna ke le ratile.+ 13 Ga go na lerato leo le fetago la gore motho a ikemišetše go hwela bagwera ba gagwe.+ 14 Le gona, ge e ba le dira dilo tšeo ke le laelago tšona, gona le tla be le bontšha gore le bagwera ba ka.+ 15 Ga ke sa le bitša bahlanka ka gobane mohlanka ga a tsebe seo mong wa gagwe a se dirago. Eupša ke re le bagwera ba ka ka gobane ke le boditše dilo ka moka tšeo ke di kwelego go Tate. 16 Ga se lena le nkgethilego eupša ke nna ke le kgethilego. Ke kgethile lena gore le tšwele pele le enywa dienywa le gore dienywa tša lena di dule di le gona, e le gore selo le ge e le sefe seo le se kgopelago go Tate ka leina la ka, a le fe sona.+
17 “Ke le laela dilo tše gore le ratane.+ 18 Ge e ba lefase le le hloile, le tsebe gore le thomile ka go hloya nna pele ga ge le ka hloya lena.+ 19 Ge nkabe le be le le karolo ya lefase, lefase le be le tla le rata. Eupša ke le kgethile lefaseng,+ ke ka baka leo lefase le le hloilego ka ge le se karolo ya lona.+ 20 Dulang le gopola seo ke le boditšego sona ge ke be ke re: Mohlanka ga a fete mong wa gagwe. Ge e ba ba ntlaišitše, le lena ba tla le tlaiša.+ Ge e ba ba kwele lentšu la ka, le la lena ba tla le kwa. 21 Eupša ba tla le tlaiša ka baka la leina la ka, ka gobane ga ba tsebe yo a nthomilego.+ 22 Ge nkabe ke se ka tla ka bolela le bona, gona nkabe ba se na sebe.+ Eupša bjale ba ka se gane sebe sa bona.+ 23 Yo a ntlhoilego o hloile le Tate.+ 24 Ge nkabe ba se ba bona mehlolo yeo ke e dirilego, yeo go se nago motho yo a e dirilego, gona nkabe ba se na sebe.+ Eupša ba mpone gomme ba ntlhoya ba ba ba hloya le Tate. 25 Se se diragetše e le gore go phethagale Mangwalo* ao le bona ba a šomišago, ao a rego: ‘Ba ntlhoile ntle le lebaka.’+ 26 Ge ke le romela mothuši yo a tšwago go Tate, e lego moya wa nnete,+ o tla tla a etšwa go Tate gomme a nea bohlatse ka nna.+ 27 Le lena le tla nea bohlatse+ ka nna, ka gobane le bile le nna go tloga ge ke thoma go ruta ditaba tše dibotse.