Bakorinthe ba Bobedi
4 Ka gona, ka ge Modimo a re bontšhitše kgaugelo ka go re fa mošomo woo ga re fele maatla. 2 Eupša re hloile dilo tša go se be le nnete le dilo tšeo di hlabišago dihlong. Ga re aroše batho ba bangwe eupša re ruta feela seo se lego ka lentšung la Modimo.+ Ge re dira bjalo re tla be re dira seo lentšu la Modimo le se bolelago, ebile re tlo ba le letswalo le lebotse pele ga Modimo le batho.+ 3 Bjale ge e ba ditaba tše dibotse tšeo re di bolelago di utegile, di utegile go batho bao ba tlago go fedišwa. 4 Batho bao ke bao ba sa dumelego go Modimo, bao modimo wa lefase le+ a foufaditšego menagano ya bona+ e le gore ba se ke ba bonegelwa ke seetša+ sa ditaba tše dibotse tša mabapi le Kriste yo a swanago le Modimo.+ 5 Ge re ruta ga re rute mabapi le rena eupša re ruta gore Jesu Kriste ke yena Morena le gore re bahlanka ba lena ka baka la Jesu. 6 Modimo ke yena a itšego: “Anke seetša se bonege leswiswing.”+ O diriša sefahlego sa Kriste gore a bonegele dipelo tša rena ka seetša+ sa tsebo ya gagwe.
7 Re filwe mošomo wo o bohlokwa+ le ge re no swana le dibjana tša letsopa+ tšeo di swarago dilo tše bohlokwa, e le gore go bonagale gore maatla a magolo ao re nago le ona ao a fetago a batho, a tšwa go Modimo e sego go rena.+ 8 Re gateletšwe ka ditsela tša go fapafapana eupša seo ga se re pitlagantšhe. Re gakanegile eupša re na le tsela ya go tšwa.+ 9 Re a tlaišwa, eupša Modimo ga se a re lahla.+ Re imelwa ke mathata eupša re kgona go kgotlelela.+ 10 Re dula re le kotsing ya gore re ka bolawa go swana le Jesu+ gomme seo se bontšha batho gore re tlaišega go swana le yena. 11 Re a phela eupša re dula re le kotsing+ ka gobane re latela Jesu gomme seo se bontšha batho gore re tlaišega go swana le yena. 12 Le ge re le kotsing ya go bolawa, mafelelong re tlo hwetša bophelo.
13 Mangwalo a re: “Ka ge ke be ke na le tumelo, ke ile ka bolela.”+ Le rena re a bolela go bontšha gore re na le tumelo. 14 Re a tseba gore yo a tsošitšego Jesu bahung le rena o tla re tsoša gomme o tla re tšea a re iša pele ga Jesu.+ 15 Dilo tše ka moka di direga ka baka la lena, e le gore batho ba bantši ba tle ba hwetše botho bjo bogolo bja Modimo gomme ba tla mo leboga le go mo tumiša.+
16 Ka gona ga re fele maatla. Le ge mebele ya rena e hlagala, motho yo re lego yena ka gare o mpshafatšwa letšatši le letšatši. 17 Le ge mathata ao re nago le ona e le a nakwana ebile e le a manyenyane, re tla hwetša moputso o mogolo kudu le wa go ya go ile.+ 18 Re swanetše go dula re nagana ka dilo tšeo re sa di bonego, e sego tšeo re di bonago.+ Ka gobane dilo tšeo re di bonago ke tša nakwana eupša tšeo re sa di bonego ke tša go ya go ile.