Bakorinthe ba Pele

12 Banabešo, ke nyaka gore le tsebe ka dimpho tšeo Modimo a le filego tšona.+ 2 Le a tseba gore pele le e ba Bakriste le be le rapela medimo ya diswantšho,+ ebile le be le dira dilo ka moka tšeo medimo yeo e rego le di dire. 3 Ke nyaka gore le tsebe gore ga go na motho yo a hlahlwago ke moya wa Modimo yo a ka “rogakago Jesu,” ebile ga go na motho yo a ka bolelago gore: “Jesu ke Morena,” a sa hlahlwe ke moya o mokgethwa.+

4 Go na le dimpho tša go fapafapana, eupša ka moka ga tšona re di newa ke moya o swanago.+ 5 Go na le ditsela tša go fapafapana tšeo re hlankelago Morena ka tšona,+ fela re hlankela Morena o tee. 6 Moya o mokgethwa o dira gore batho ba dire dilo tše dintši tša go fapafapana, eupša go na le Modimo o tee yo a fago batho moya woo.+ 7 Dilo tšeo moya o mokgethwa o thušago batho go di dira di a bonagala, ebile Modimo o ba nea moya woo o mokgethwa gore ba hole ba bangwe.+ 8 Ka mohlala, moya o mokgethwa o ka fa motho yo mongwe bokgoni bja go bolela ka tsela e bohlale, yo mongwe wa mo fa bokgoni bja go botša batho ditaba tšeo ba sa di tsebego, 9 yo mongwe wa mo thuša gore a be le tumelo,+ yo mongwe wa mo fa bokgoni bja go fodiša malwetši,+ 10 yo mongwe wa mo nea bokgoni bja go dira mehlolo,+ yo mongwe wa mo nea bokgoni bja go porofeta, yo mongwe wa mo thuša gore a kwešiše melaetša yeo e tšwago go Modimo,+ yo mongwe wa mo thuša gore a kgone go bolela ka maleme a mangwe+ ke moka yo mongwe wa mo thuša gore a kgone go fetolela maleme ao.+ 11 Dilo tše ka moka di dirwa ke wona moya woo o mokgethwa. Motho yo mongwe le yo mongwe o newa bokgoni go ya ka gore moya wa Modimo o nyaka go mo fa eng.

12 Mmele o na le ditho tše dintši, eupša le ge o na le ditho tše dintši ke mmele o tee, ebile ditho tšeo ka moka ke tša mmele o tee.+ Mmele wa Kriste le wona o ka mokgwa woo. 13 Ka moka ga rena re kolobeditšwe ka moya o tee gore re be mmele o tee, go sa šetšwe gore re Bajuda goba Bagerika, makgoba goba batho bao ba lokologilego, ka moka ga rena re hweditše moya o tee.

14 Mmele ga o na setho setee, eupša o na le ditho tše dintši.+ 15 Ge leoto le ka re: “Ga se nna letsogo, ka gona ga se nna karolo ya mmele,” seo ga se re gore leoto le ka se sa ba karolo ya mmele. 16 Ge e ba tsebe e ka re: “Ka ge ke se leihlo, ga se nna karolo ya mmele,” seo ga se re gore tsebe e ka se sa ba karolo ya mmele. 17 Ge nkabe mmele ka moka e le leihlo, motho o be a tla kwa bjang? Le gona ge nkabe mmele ka moka e be e le tsebe, motho o be a tla dupa kang? 18 Modimo o beile setho se sengwe le se sengwe sa mmele ka moo a ratago ka gona.

19 Ge nkabe ditho tša mmele ka moka di be di swana, mmele o be o tlo ba bjang? 20 Mmele o tee o na le ditho tše dintši. 21 Leihlo le ka se re go letsogo: “Ga ke go hloke,” ebile le hlogo e ka se re go maoto: “Ga ke le hloke.” 22 Ge e le gabotse ditho tša mmele tšeo di bonagalago di fokola, di bohlokwa. 23 Ditho tša mmele tšeo re naganago gore ga di botse re di swara gabotse,+ ebile ditho tša mmele tšeo re sa nyakego batho ba di bona re di swara gabotse kudu. 24 Eupša ditho tša mmele tšeo di lego botse kudu ga di hloke gore re di sware ka tsela yeo. Modimo o beakantše mmele ka tsela ye, gore ditho tša mmele tšeo di hlokago go hlokomelwa di hlokomelwe. 25 O dirile se gore mmele o se ke wa arogana. Ditho tša mmele di swanetše go hlokomelana.+ 26 Ge e ba setho setee se ekwa bohloko, le ditho tše dingwe ka moka di kwa bohloko.+ Ge e ba setho se sengwe se retwa, ditho tše dingwe ka moka di thaba le sona.+

27 Lena le mmele wa Kriste,+ ebile yo mongwe le yo mongwe wa lena ke setho sa mmele woo.+ 28 Modimo o neile yo mongwe le yo mongwe ka phuthegong mošomo wa gagwe, ba mathomo ke baapostola,+ ba bobedi ke baporofeta,+ ba boraro ke barutiši,+ ke moka gwa latela bao ba dirago mehlolo,+ bao ba kgonago go fodiša malwetši,+ bao ba thušago ba bangwe, bao ba neago tlhahlo+ le bao ba kgonago go bolela maleme a go fapafapana.+ 29 Ga se batho ka moka bao e lego baapostola, baporofeta goba barutiši, ebile ga se batho ka moka bao ba dirago mehlolo. 30 Ga se batho ka moka bao ba kgonago go fodiša. Ga se batho ka moka bao ba kgonago go bolela maleme a mangwe+ ebile ga se batho ka moka bao ba kgonago go fetolela maleme ao.+ 31 Šomang ka thata gore le hwetše dimpho tše bohlokwa kudu+ gomme ke tla le bontšha tsela e kaone ya bophelo.+