Ditiro tša Baapostola
1 Wena Theofilo, pegong ya mathomo yeo ke go ngwaletšego yona, ke ngwadile ka dilo ka moka tšeo Jesu a ilego a di dira le go di ruta,+ 2 go fihlela letšatšing leo a ilego a rotošetšwa legodimong.+ O ile a ya legodimong ka morago ga gore a nee baapostola bao a ba kgethilego ditaelo a thušwa ke moya o mokgethwa.+ 3 Ka morago ga gore a tlaišege, o ile a tšwelela go bona ka ditsela tše dintši e le gore ba kgodišege gore o tsošitšwe bahung.+ O ile a fetša matšatši a 40 a na le bona a bolela ka Mmušo wa Modimo.+ 4 Bjale ge a be a na le bona, o ile a re go bona: “Le se ke la tloga Jerusalema+ eupša dulang le letetše seo Tate a se tshepišitšego,+ e lego seo ke le boditšego ka sona. 5 Ka gobane Johane o be a kolobetša batho ka meetse eupša kgauswinyane lena le tla kolobetšwa ka moya o mokgethwa.”+
6 Ge ba be ba kopane, ba ile ba mmotšiša gore: “Morena, na o tsošološa mmušo wa Isiraele gona bjale?”+ 7 A re go bona: “Ga go hlokege gore lena le tsebe gore tate o kgethile nako efe goba gore o tlo dira dilo neng.+ 8 Eupša lena le tla ba le maatla ge Modimo a le fa moya o mokgethwa+ gomme le tla ba dihlatse+ tša ka Jerusalema,+ Judea ka moka le Samaria+ le go fihla karolong ya kgolekgole ya lefase.”+ 9 Ge a fetša go bolela dilo tše, o ile a rotošetšwa legodimong ba mo lebeletše. Leru la mo kukela godimo ba se sa mmona.+ 10 Bjale ge ba sa dutše ba mo lebeletše a eya legodimong, kapejana go ile gwa tšwelela banna ba babedi bao ba aperego diaparo tše tšhweu+ ba ema kgauswi le bona, 11 ke moka ba re: “Banna ba Galilea, le reng le eme le lebeletše godimo? Jesu yo le bego le na le yena gomme a tšewa a išwa legodimong, o tlo boa ka tsela yeo e swanago le yeo le mmonego a išwa legodimong ka yona.”
12 Ke moka ba boela Jerusalema+ ba etšwa thabeng yeo e bitšwago Thaba ya Mehlware. Thaba yeo e be e se kgole le Jerusalema, e be e ka ba bokgole bjo e ka bago bja khilomithara.* 13 Ge ba fihla moo, ba ile ba ya ka phapošing ya ka godimo e lego moo ba bego ba dula gona. Gona moo go be go na le Petro, Johane, Jakobo, Andrea, Filipi, Thomase, Baratholomeo, Mateo, Jakobo morwa wa Alifeose, Simone yo a nago le mafolofolo le Judase morwa wa Jakobo.+ 14 Ka moka ga bona ba be ba rapela ka mehla ba le gotee. Maria mmago Jesu, banababo+ Jesu le basadi+ ba bangwe le bona ba be ba le gona.
15 Ka le lengwe la matšatši ao, Petro a ema gare ga banababo (e be e le batho ba e ka bago ba 120 bao ba bego ba kgobokane moo) a re: 16 “Banabešo, moya o mokgethwa o ile wa hlohleletša Dafida gore a ngwale boporofeta mabapi le Judase.+ Bjale boporofeta bjoo bo be bo swanetše gore bo phethagale. Judase ke yena a ilego a iša batho go Jesu gore ba mo sware.+ 17 E be e le yo mongwe wa rena+ ebile a kgethilwe gore a dire mošomo wo. 18 (Ka gona, yena monna yo o ile a reka tšhemo ka tšhelete yeo a e hweditšego ka tsela e sa lokago.+ O ile a betha fase ka hlogo, mmele wa gagwe wa phatloga ka bogare gomme mala a gagwe ka moka a kgothogela ka ntle.+ 19 Badudi ba Jerusalema ka moka ba ile ba tseba ka taba ye. Ka leleme la bona, tšhemo yeo e ile ya bitšwa Akeldama, yeo e rago gore, Tšhemo ya Madi.) 20 Pukung ya Dipsalme go ngwadilwe gore: ‘Anke mo a dulago gona go fetoge lešope gomme go se be le motho yo a dulago moo.’+ Le gona go ngwadilwe gore: ‘Anke maemo a gagwe a bolebeledi a tšewe ke motho yo mongwe.’+ 21 Ka gona o swanetše go tšeelwa legato ke yo mongwe wa banna bao ba bego ba na le rena nakong ka moka ya ge re be re na le Morena Jesu a dira mediro ya gagwe, 22 go tloga letšatšing leo a ilego a kolobetšwa ke Johane,+ go fihla letšatšing leo a ilego a tloga go rena.+ Go swana le rena, monna yoo e swanetše go ba hlatse yeo e bonego gore Jesu o tsošitšwe bahung.”+
23 Ka gona ba ile ba šišinya barutiwa ba babedi. Bona ke Josefa yo a bitšwago Barasaba yoo leina la gagwe le lengwe e bego e le Justose gomme morutiwa yo mongwe e be e le Mathiase. 24 Ke moka ba rapela ba re: “Jehofa,* wena yo a tsebago dipelo tša batho ka moka,+ re kgopela o re bontšhe gore go banna ba ba babedi ke ofe yo o mo kgethilego 25 gore e tle e be moapostola legatong la Judase ke moka a go hlankele, ka gobane Judase o arogile gomme a itirela tša gagwe.”+ 26 Ka gona ba ile ba dira matengwa.+ Ke moka matengwa ao a kgetha Mathiase gomme o ile a balwa le baapostola ba 11.