Habakuku
2 Ke tla dula ke eme lefelong leo ke abetšwego gore ke lete ke le go lona,+
Ke tla ema lebotong leo le šireleditšego motse.
Ke tla dula ke letetše gore Modimo a mpotše seo a nyakago ke se bolela
Le go nagana seo ke tlago go se bolela ge a nkgala.
2 Ke moka Jehofa a nkaraba a re:
“Ngwala pono ye matlapeng gomme o e ngwale gabotse,+
E le gore motho yo a e balago ka go hlaboša a e bale ka go thelela.+
3 Ka gobane pono e tla phethagala ka nako ya yona,
Gomme pono yeo e batamela ka lebelo, ebile e ka se diege.
Le ge e ka diega, dula o e letetše!+
Ka gobane e tla phethagala e le ka nnete.
E tla phethagala ka nako ya maleba!
4 “Bonang motho yo a ikgogomošago,
Ga a tshepege.
Eupša moloki o tla phela ka baka la go tshepega ga gagwe.*+
5 Ke nnete gore beine e ka dira gore motho a dire tša bošilo,
Ke ka baka leo motho yo a ikgogomošago a ka se atlegego.
Ga a khore go swana le Lebitla,*
Ga a kgotsofale go swana le lehu.
O dula a ikgobokeletša ditšhaba ka moka
Le go thopa merafo ka moka.+
6 Na ba ka moka ba ka se mo kwere ba diriša dika le diema ebile ba mo gegea?+
Ba tla re:
‘Wa madimabe ke motho yo a ikhumišago ka dilo tšeo e sego tša gagwe
Le yo a ikokeletšago sekoloto.
Yena o tla ikhumiša go fihlela neng?
7 Na batho bao o ba kolotago ba ka se tle go wena ba go gapeletša gore o ba patele?
Ba tla ema gomme ba go hlasela,
Ebile ba go tšeela dilo tša gago.+
8 Batho ba bangwe ka moka ba tla tla ba go tšeela dilo tša gago,+
Ka gobane o tšeetše ditšhaba tše dintši dilo tša tšona,
Le go bolaya batho
Gotee le go senya naga,
Metse le badudi ba yona ka moka.+
9 Go madimabe motho yo a dirago dilo tše mpe gore a humiše batho ba lapa la gagwe,*
E le gore a ikagele sehlaga lefelong leo le lego godimodimo
Gore a tšhabele masetlapelo!
10 Maanomabe a gagwe a baketše ba lapa la gagwe dihlong.
Yena o dirile sebe ka go bolaya batho ba bantši.+
11 Leswika le tla goeletša le le lebotong,
Gomme kota yeo e lego marulelong e tla le araba.
12 Wa madimabe ke yo a agago motse ka go bolaya batho,
Gomme a o tiiša ka go dira dilo tše di sa lokago!
13 Na Jehofa wa madira ga se yena a dirilego gore dilo tšeo batho ba di šometšego ka thata di fišwe ka mollo,
Le go dira gore ditšhaba di itapišetše lefeela?+
14 Badudi ba lefase ka moka ba tla tseba ka bogolo bja Jehofa
Go swana le meetse ao a tletšego ka lewatleng.+
15 Wa madimabe ke yo a galefilego gomme a fa bagwera ba gagwe sa go nwa
Gore ba nwe ba tagwe,
E le gore a ba bonele.
16 O tla nyatšwa go e na le gore o hlomphiwe.
Le wena ba tla dira gore o nwe gomme ba go bonela gore ga se wa bolotšwa.
Jehofa o tla dira gore o nwe seno seo se lego ka komiking yeo e lego ka letsogong la gagwe le letona,+
Gomme wa nyatšega go e na le gore o retwe.
17 Ka ge o be o senya Libanoni le wena o tla diragalelwa ke se se swanago,
Ebile o tlo fedišwa kamoo o bego o fediša dibata tšeo di bego di tšhogile,
Ka gobane o bolaile batho
Gotee le go senya naga,
Metse le badudi ba yona ka moka.+
18 Seswantšho seo motho a se betlilego
Se na le mohola ofe?
Seswantšho sa tšhipi seo se rutago maaka se hola kang,
Gaešita le ge motho yo a se dirilego a se tshepa,
Ebile a dira medingwana yeo e se nago mohola yeo e sa kgonego go bolela?+
19 Wa madimabe ke yo a rego go kota, “Tsoga!”
Goba a botša leswika leo le sa bolelego a re, “Tsoga o re rute!”
20 Eupša Jehofa o tempeleng ya gagwe e kgethwa.+
Lena batho ba lefaseng ka moka, homolang pele ga gagwe!’”+