Baroma

2 Bjale ngwanešo, go sa šetšwe gore o mang,+ ga o na mabaka a go ikemelela ge e ba o ahlola ba bangwe ka dilo tšeo le wena o di dirago.+ Ge o ba ahlola, go no swana le ge le wena o ikahlola. 2 Eupša re a tseba gore ge Modimo a ahlola batho bao ba dirago dilo tše, o ba ahlola ka go dumelelana le nnete.

3 Bjale na o nagana gore Modimo a ka se go ahlole ge e ba o ahlola bao ba tlwaetšego go dira dilo tše bjalo, mola le wena o di dira? 4 Goba na ga o na taba le gore Modimo o na le botho kudu,+ o a kgotlelela+ ebile ga a fele pelo?+ Na ga o kgone go bona gore Modimo o go bontšha botho ka go go thuša gore o itshole?+ 5 Eupša ge e ba o ngangabala o gana go itshola, Modimo o tlo go galefela ebile o tlo go otla letšatšing la ge a tla be a ahlola batho ka toka.+ 6 O tla otla goba a šegofatša motho yo mongwe le yo mongwe go ya ka dilo tšeo a di dirilego.+ 7 O tlo dira gore batho bao ba dirago dilo tše dibotse ba phele go ya go ile, ka gobane ba nyaka gore a ba nee letago, a ba godiše ebile a ba fe go se senyege.+ 8 Eupša o tlo galefela+ batho bao ba nago le ditshele, bao ba sa kwego nnete ebile ba tlwaetše go dira dilo tše mpe. 9 Motho yo mongwe le yo mongwe yo a dirago dilo tše mpe, o tlo tlaišega, go sa šetšwe gore ke Mojuda goba ke Mogerika. 10 Eupša motho yo mongwe le yo mongwe yo a dirago dilo tše dibotse, Modimo o tlo mo fa letago, a mo godiša, a ba a dira gore a be le khutšo. O tlo thoma pele ka Mojuda+ gwa latela Mogerika.+ 11 Modimo ga a kgetholle.+

12  Batho ka moka bao ba dirilego sebe ba sa tsebe Molao wa Moshe, ba tlo hwa le ge ba sa tsebe Molao woo.+ Eupša bao ba dirago sebe ba tseba Molao wa Moshe, ba tlo ahlolwa ka Molao woo.+ 13 Modimo ga a lebelele batho ba lokile feela ka gobane ba no theetša Molao, eupša o ba lebelela ba lokile ge e ba ba dira dilo tšeo Molao o di bolelago.+ 14  Batho ba ditšhaba ga ba tsebe melao ya Modimo+ eupša ba dira dilo tšeo melao e rego batho ba di dire. Seo se no bontšha gore le ge ba sa tsebe melao, melao yeo e ka dipelong tša bona. 15 Ba a bontšha gore melao e ngwadilwe dipelong tša bona, le matswalo a bona a dumelelana le bona. Menaganong ya bona, ba kgona go itatofatša goba go ikemelela. 16 Dilo tšeo di tlo direga nakong ya ge Modimo a tla be a šomiša Kriste Jesu go ahlola batho ka baka la dilo tšeo ba di dirago ka sephiring.+ Tše ke ditaba tše dibotse tšeo ke di bolelago.

17 Ba bangwe ba lena le ipitša Bajuda+ le gona le tshepile Molao ebile le ikgantšha ka gore le batho ba Modimo. 18 Le tseba dilo tšeo Modimo a nyakago le di dira ebile le tseba dilo tše di lokilego ka gobane le rutilwe Molao.+ 19 Le kgodišegile ka gore le ka kgona go hlahla difofu le go bontšha batho bao ba lego leswiswing seetša. 20 Le nagana gore le ka kgona go phošolla mašilo la ba la ruta bana, ka gobane le kwešiša dithuto tše bohlokwa tša Modimo le nnete yeo e tšwago Molaong. 21 Eupša wena o rutago ba bangwe, goreng o sa ithute?+ O ruta batho gore ba se ke ba utswa,+ bjale ke ka baka la eng wena o utswa? 22 Wena o rutago batho gore ba se ke ba hlotlola*+ goreng o hlotlola? O re o hloile medingwana, bjale goreng o utswa ditempeleng? 23 O ikgantšha ka gore o tseba Molao, bjale ke ka baka la eng o nyatša Modimo ka go tshela Molao? 24 Ka gobane batho ba ditšhaba ba bolela gampe ka leina la Modimo* ka baka la dilo tšeo le di dirago, feela bjalo ka ge Mangwalo a boletše.+

25 Go bolla+ go na le mohola ge feela o latela Molao+ eupša ge e ba o sa latele Molao go no swana le ge o se wa bolla. 26 Ge e ba motho yo a sa bollago+ a dira dilo tše di lokilego tšeo di lego Molaong, Modimo o tlo mo lebelela a bolotše.+ 27 Wena o rutilwe ka lebollo le ka Molao eupša ga o o latele. Ka gona motho yo a sa bollago eupša a latela Molao o tla go ahlola. 28 Tsela yeo motho a bogegago ka yona ga e bolele gore ke Mojuda wa nnete.+ Le gona, lebollo la nnete ga se leo le dirwago nameng feela.+ 29 Seo motho a lego sona ka garegare,+ ke sona se bontšhago gore ke Mojuda wa nnete.+ Le gona, o boloditšwe ka moya o mokgethwa ka pelong ya gagwe, e sego ka Molao.+ Motho yoo o retwa ke Modimo e sego batho.+