Samuele wa Pele
3 Mošemanyana Samuele o be a hlankela+ Jehofa a dula le Eli, eupša mehleng yeo lentšu la Jehofa le be le kwewa ka sewelo ebile go sa tlwaelega gore batho ba bone dipono.+
2 Ka letšatši le lengwe, Eli o be a robetše ka phapošing ya gagwe, gomme mahlo a gagwe a be a šetše a thomile go foufala, ebile a sa kgone go bona gabotse.+ 3 Lebone+ la ntlo ya Modimo le be le sešo la tingwa gomme Samuele o be a robetše ka tempeleng*+ ya Jehofa moo Areka ya Modimo e bego e le gona. 4 Ke moka Jehofa a bitša Samuele. Yena a re: “Ke nna yo.” 5 A kitimela go Eli a re: “Ke nna yo ka ge o mpiditše.” Eupša Eli a re: “Ga se ka go bitša. Boela o yo robala.” Samuele a tloga a yo robala. 6 Jehofa a mmitša gape a re: “Samuele!” Samuele ge a ekwa a bitšwa a tsoga a ya go Eli a re: “Ke nna yo ka ge o mpiditše.” Eupša Eli a re: “Ga se ka go bitša morwa wa ka. Boela o yo robala.” 7 (Ka nako yeo Samuele o be a sešo a tseba Jehofa. Le gona, o be a se a ka a hwetša molaetša wo o tšwago go Jehofa.)+ 8 Jehofa a mmitša gape la boraro a re: “Samuele!” Ge Samuele a ekwa a bitšwa, a tsoga a ya go Eli a re: “Ke nna yo ka ge o mpiditše.”
Ke moka Eli a lemoga gore ke Jehofa yo a bego a bitša mošemanyana yoo. 9 Ka gona Eli a re go Samuele: “Sepela o yo robala, e tla re ge a ka go bitša, wena o re: ‘Jehofa, bolela, ka gobane nna mohlanka wa gago ke go theeditše.’” Ke moka Samuele a tloga a yo robala.
10 Jehofa a mmitša go etša ge a ile a mmitša peleng a re: “Samuele, Samuele!” Ge Samuele a ekwa a bitšwa a re: “Hle bolela, ka gobane nna mohlanka wa gago ke go theeditše.” 11 Jehofa a re go Samuele: “Tseba gore ke tla dira selo se sengwe Isiraele. Selo seo, mang le mang ge a ekwa ka sona, ditsebe tša gagwe di tlo hlohlona.+ 12 Letšatšing leo, ke tla phethagatša dilo ka moka tšeo ke di boletšego ka Eli le ba ntlo ya gagwe, go tloga ka tša mathomo go fihla ka tša mafelelo.+ 13 O botše Eli gore ke tlo ahlolela ba ntlo ya gagwe sa ruri ka baka la molato woo a o tsebago,+ ka gobane barwa ba gagwe ba roga Modimo,+ eupša yena ga a ba kgaleme.+ 14 Ke ka baka leo ke enetšego ba ntlo ya Eli gore le ge ba ka dira dihlabelo le dibego,+ nka se tsoge ke tshedišitše molato wa bona mahlo.”
15 Samuele a robala go fihla mesong. Ke moka a bula mejako ya ntlo ya Jehofa. O be a tšhaba go botša Eli seo Modimo a mmoditšego sona. 16 Eupša Eli a bitša Samuele, a re: “Samuele morwa wa ka!” Ke moka Samuele a re: “Ke nna yo.” 17 Eli a re: “O go boditše eng? Hle, o se ke wa nkutela selo. Anke Modimo a go otle a be a oketše kotlo yeo ge e ba o ka nkutela lentšu letee mantšung ka moka ao a go boditšego ona.” 18 Samuele a mmotša ditaba ka moka gomme a se mo utele selo. Ke moka Eli a re: “Yeo ke thato ya Jehofa. Anke a dire seo a bonago se lokile.”
19 Samuele a tšwela pele a gola. Le gona Jehofa o ile a dula a na le yena,+ a ba a dira gore mantšu ka moka ao a a boletšego a phethagale. 20 Isiraele ka moka, go tloga ka Dani go fihla ka Beresheba, e ile ya lemoga gore Jehofa o be a kgethile Samuele gore e be moporofeta wa gagwe. 21 Le gona Jehofa o ile a tšwela pele a iponagatša gape kua Shilo, ka gobane gona moo Shilo, ke gona moo Jehofa a ilego a dira gore Samuele a mo tsebe, nakong ya ge Jehofa a be a mmotša molaetša wa gagwe.+