Ebangedi ya Mateo
9 Ka gona, Jesu o ile a namela sekepe gomme a tshela lewatle ka sona a ya motseng wa gabo.+ 2 Batho ba bangwe ba ile ba mo tlišetša motho yo a bego a robetše bolaong a sa kgone go tsoga. Ge Jesu a bona gore banna bao ba be ba na le tumelo, a re go monna yoo a bego a sa kgone go tsoga: “O se ke wa tshwenyega ngwanaka! Dibe tša gago di lebaletšwe.”+ 3 Bjale ba bangwe ba ditsebi tša molao ba boledišana ba re: “Motho yo o roga Modimo.” 4 Ka ge Jesu a be a tseba seo ba se naganago, o ile a re: “Ke ka baka la eng le nagana dilo tše mpe ka dipelong tša lena?+ 5 Ka mohlala, go bonolo gore: ‘Dibe tša gago di lebaletšwe.’ Bjale na go na le motho yo a ka rego go monna yo: ‘Emelela o sepele,’ gomme monna yo a emelela a sepela?+ 6 Eupša, e le gore le tsebe gore Morwa wa motho o na le maatla a go lebalela dibe lefaseng . . .,” ke moka a botša monna yoo a bego a robetše bolaong ebile a sa kgone go tsoga a re: “Tsoga o tšee bolao bja gago o ye gae.”+ 7 Ke moka monna yoo a tsoga a ya gae. 8 Ge mašaba a bona seo, a ile a tšhoga kudu gomme a reta Modimo yo a neago batho maatla a go swana le ao.
9 Ka morago ga ge Jesu a tlogile moo, o ile a bona monna yo a bitšwago Mateo a dutše ofising yeo go patelwago motšhelo go yona, gomme a re go yena: “Eba morutiwa wa ka.” Ke moka Mateo a napa a emelela a mo latela.+ 10 Nakong ya ge Jesu a be a dutše tafoleng ka ntlong, go ile gwa tla batho ba bantši ba badiradibe le ba go patediša motšhelo, gomme ba dula le yena le barutiwa ba gagwe.+ 11 Eupša ge Bafarasei ba bona seo, ba re go barutiwa ba Jesu: “Ke ka baka la eng morutiši wa lena a eja le batho ba go patediša metšhelo le badiradibe?”+ 12 Ge Jesu a ekwa seo ba se bolelago a re: “Batho bao ba phetšego gabotse ga ba hloke ngaka, eupša bao ba babjago ba a e hloka.+ 13 Eyang le yo ithuta gore mantšu a a latelago a ra goreng: ‘Ke nyaka kgaugelo e sego sehlabelo.’+ Ka gobane ke tletše go bitša badiradibe, e sego baloki.”
14 Ke moka barutiwa ba Johane ba tla go Jesu ba mmotšiša gore: “Ke ka baka la eng rena le Bafarasei re dula re ikona dijo eupša barutiwa ba gago bona ba sa ikone dijo?”+ 15 Ke moka Jesu a re go bona: “Bagwera ba monyadi ga ba na lebaka la go lla ge monyadi+ a sa na le bona. Eupša go tla tla matšatši ao monyadi a tlago go tlošwa go bona,+ gomme ba tla ikona dijo. 16 Ga go yo a rokelelago segaswa* godimo ga seaparo sa ka ntle sa kgale, ka gobane lešela leo le leswa le tla nganga seaparo seo sa kgale gomme sa gagoga le go feta.+ 17 Batho ga ba bolokele beine e mpsha ka mapotlelong a kgale a mokgopa. Ge ba ka dira bjalo, mapotlelo ao a tla palega, gomme beine ya tšhologa ke moka mapotlelo ao a senyega. Eupša batho ba bolokela beine e mpsha ka mapotlelong a maswa a mokgopa a beine gomme beine e ka se tšhologe ebile mapotlelo le ona a ka se palege.”
18 Ge a dutše a ba botša dilo tše, go ile gwa tla mmuši yo mongwe yoo a ilego a fihla a mo khunamela a re: “Ka se sebaka, morwedi wa ka o swanetše go ba a hlokofetše, eupša etla o mmee diatla gomme o tla phela.”+
19 Ke moka Jesu a emelela a napa a mo latela a na le barutiwa ba gagwe. 20 Mosadi yoo a bego a tlaišitšwe ke bolwetši bja go ya matšatšing a sa fetše*+ ka mengwaga e 12 a tla ka morago ga Jesu a kgwatha morumo wa seaparo sa gagwe sa ka ntle,+ 21 ka gobane o be a duletše go ipotša gore: “Ge nka no kgwatha feela seaparo sa gagwe sa ka ntle, ke tla fola.” 22 Jesu a retologa gomme ge a mmona, a re: “O se ke wa boifa morwedi wa ka! Tumelo ya gago e go fodišitše.”+ Go tloga ka nako yeo mosadi yoo a fola.+
23 Bjale, ge Jesu a tsena ka ntlong ya mmuši gomme a bona baletši ba dinaka le batho ba bantši bao ba bego ba dirile lešata,+ 24 a re: “Etšwang ka mo ka gobane ngwanenyana yo ga se a hlokofala eupša o robetše.”+ Ge a realo, ba mo sega ka lenyatšo. 25 Ge batho bale ba bantši ba se no ntšhetšwa ka ntle, o ile a tsena a swara ngwanenyana yoo ka seatla,+ gomme ngwanenyana yoo a tsoga.+ 26 Taba yeo e ile ya tsebega tikologong yeo ka moka.
27 Ge Jesu a tloga moo, banna ba babedi ba difofu+ ba ile ba mo latela, ba goeletša ba re: “Re šokele wena Morwa wa Dafida.” 28 Ka morago ga ge Jesu a tsene ka ntlong, banna bao ba babedi ba tla go yena, gomme a ba botšiša a re: “Na le a dumela gore nka dira gore le bone?”+ Banna bao ba re: “Ee, Morena.” 29 Ke moka a kgwatha mahlo a bona,+ a re: “Ka ge le na le tumelo, anke mahlo a lena a bulege.” 30 Mahlo a banna bao a ile a bona, ke moka Jesu a ba botša tsebe-go-kwa, a re: “Le se ke la botša motho ka taba ye.”+ 31 Eupša bona ka morago ga ge ba tšwetše ka ntle, ba ile ba botša batho ba tikologong yeo ka moka ka yena.
32 Ge ba sa re ba a sepela, batho ba bangwe ba ile ba mo tlišetša monna wa semumu. Monna yoo o be a na le letemona.+ 33 Ka morago ga ge letemona le ntšhitšwe, monna yoo o ile a thoma go bolela.+ Ka gona, mašaba a ile a makala a re: “Mo Isiraele ga se gwa ka gwa direga selo sa go swana le se!”+ 34 Eupša Bafarasei ba be ba re: “Mmuši wa matemona ke yena a mo thušago gore a rake matemona.”+
35 Ke moka Jesu a tšea leeto la go ya metseng le metsaneng ka moka, a ruta disinagogeng tša bona, a bolela ditaba tše dibotse tša Mmušo wa Modimo ebile a fodiša mohuta o mongwe le o mongwe wa bolwetši.+ 36 Ge Jesu a bona mašaba a batho o ile a a kwela bohloko+ ka gobane a be a swana le dinku tšeo di gobetšego, di tletše naga ebile di se na modiši.+ 37 Ke moka a re go barutiwa ba gagwe: “Mošomo wa go buna ke wo mogolo eupša bašomi ga se ba bantši.+ 38 Ka baka leo, kgopelang Mong wa tšhemo gore a romele bašomi gore ba tle ba bune tšhemong ya gagwe.”+