Ebangedi ya Mateo

23 Ke moka Jesu a bolela le mašaba le barutiwa ba gagwe a re: 2 “Ditsebi tša molao le Bafarasei ba ipeile setulong sa Moshe. 3 Ka baka leo dilo ka moka tšeo ba le botšago tšona le di kwe le be le di dire, eupša le se ke la dira dilo tšeo ba di dirago, ka gobane ba a bolela eupša ga ba dire dilo tšeo ba di bolelago.+ 4 Ba kgoboketša merwalo e boima, ba e tšea gomme ba e bea magetleng a batho ba bangwe,+ eupša bona ga ba nyake le go e kgwatha ka monwana.+ 5 Ba nyaka gore dilo ka moka tšeo ba di dirago di bonwe ke batho.+ E le gore ba itšhireletše gore ba se ke ba diragalelwa ke dilo tše mpe, ba oketša bogolo bja mapokisana* ao ba a rwalago phatleng+ le letsogong, ke moka ba telefatša merumo ya diaparo tša bona.+ 6 Ba rata go dula madulong ao a beetšwego batho ba bohlokwa menyanyeng le go dula ditulong tša ka pele disinagogeng,+ 7 ebile ba rata go dumedišwa ka tlhompho mebarakeng le go bitšwa Rabi.* 8 Eupša lena le se ke la bitšwa Rabi ka gobane Morutiši wa lena ke o tee feela,+ gomme lena ka moka le bana ba motho. 9 Le gona, le se ke la bitša motho wa mo lefaseng la re tate, ka gobane Tatago lena ke o tee feela,+ yena yoo a lego legodimong. 10 Ebile le se ke la bitšwa baetapele, ka gobane Moetapele wa lena ke o tee, e lego Kriste. 11 Eupša yo mogolo go le feta ka moka mo gare ga lena e swanetše go ba mohlanka wa lena.+ 12 Mang le mang yo a ikgogomošago o tla kokobetšwa+ gomme mang le mang yo a ikokobetšago o tla godišwa.+

13 “Lena ditsebi tša molao le lena Bafarasei, le ba madimabe ebile le baikaketši! Ka gobane le tswalelela batho gore ba se ke ba tsena Mmušong wa magodimo. Lena ka bolena ga le tsene, ebile ga le dumelele bao ba nyakago go tsena gore ba tsene.+ 14* ——

15 “Lena ditsebi tša molao le lena Bafarasei, le ba madimabe ebile le baikaketši!+ Ka gobane le sepelasepela lewatleng le nageng e le gore le dire motho o tee gore a sokologele tumelong ya Sejuda, gomme ge a sokologetše tumelong ya Sejuda, le mo dira gore a swanelegele go tsena Gehenna* gabedi go feta lena.

16 “Lena bahlahli ba difofu, le ba madimabe,+ lena bao le rego: ‘Ga go na bothata ge e ba motho a ena ka tempele. Eupša ge e ba motho a ena ka gauta ya tempele, o swanetše go phetha keno yeo.’+ 17 Lena mašilo le difofu! Ge e le gabotse, se segolo ke sefe, na ke gauta goba ke tempele yeo e dirilego gore gauta e be e kgethwa? 18 Le gona le re: ‘Ga se phošo ge e ba motho a ena ka aletare. Eupša ge e ba motho a ena ka mpho yeo e lego aletareng, gona o swanetše go phetha keno yeo.’ 19 Lena difofu! Ge e le gabotse, se segolo ke sefe, na ke mpho goba ke aletare yeo e dirago gore mpho e be e kgethwa? 20 Ka baka leo, yoo a enago ka aletare, o ena le ka dilo ka moka tšeo di lego go yona, 21 le yo a enago ka tempele o ena ka yona le ka yoo a dulago go yona.+ 22 Le gona, yo a enago ka legodimo o ena ka setulo sa bogoši sa Modimo le ka yo a dutšego go sona.

23 “Lena ditsebi tša molao le lena Bafarasei, le ba madimabe ebile le baikaketši! Ka gobane le ntšha karolo ya lesome ya dimela tšeo di bitšwago minti, dili le kumine,+ eupša ga le šetše ditaba tše bohlokwa Molaong, e lego toka,+ kgaugelo+ le potego. Ke nnete gore le be le swanetše go ntšha karolo ya lesome ya dilo tše, eupša le be le sa swanela go kgaphela ka thoko ditaba tše bohlokwa Molaong.+ 24 Lena bahlahli ba difofu,+ le ntšha monang+ ka gare ga dino tša lena eupša le metša kamela!+

25 “Lena ditsebi tša molao le lena Bafarasei, le ba madimabe ebile le baikaketši! Ka gobane le swana le dibjana tšeo di hlatswitšwego ka ntle+ eupša ka gare di le ditšhila. Ka dipelong tša lena go tletše megabaru+ le go hloka boitshwaro.+ 26 Wena mofarasei wa sefofu, thoma pele ka go hlwekiša dibjana ka gare gore di kgone go hlweka le kantle.

27 “Lena ditsebi tša molao le lena Bafarasei, le ba madimabe ebile le baikaketši!+ Ka gobane le swana le mabitla ao a pentilwego ka ntle,+ ao a bonagalago a le botse ka ntle eupša ka gare a tletše marapo a bahu le mehuta ya dilo ka moka tšeo di ka šilafatšago motho. 28 Le lena le bjalo ka gobane pele ga batho le bonagala le le baloki, eupša ka dipelong tša lena le tletše boikaketši le go hloka molao.+

29 “Lena ditsebi tša molao le lena Bafarasei, le ba madimabe ebile le baikaketši!+ Ka gobane le aga mabitla a baporofeta la ba la kgabiša a baloki,+ 30 gomme la re: ‘Ge nkabe re phetše mehleng ya borakgolokhukhu ba rena, re be re ka se ba thuše go bolaya baporofeta.’ 31 Ka baka leo lena ka noši le hlatsela gore le barwa ba batho bao ba bolailego baporofeta.+ 32 Bjale feleletšang mediro yeo borakgolokhukhu ba lena ba e thomilego.

33 “Lena dinoga ke lena, bana ba marabe,*+ na le ka kgona go tšhabela go ahlolwa le go lahlelwa Gehenna?*+ 34 Ka baka le, ke tla le romela baporofeta,+ banna ba bohlale le bahlahli.+ Ba bangwe ba bona le tlo ba bolaya+ ebile la ba fega dikoteng, ba bangwe le tla ba betha+ disinagogeng tša lena gomme la ba tlaiša+ metseng ka moka, 35 e le gore le ikarabele ka madi a baloki bao ba bolailwego mo lefaseng, go thoma ka madi a Abele yo a bego a lokile+ go fihla ka madi a Sakaria morwa wa Barakia yo le mmolailego ka pele ga tempele kgauswi le aletare.+ 36 Ruri ke le botša gore dilo tše ka moka di tla diragalela moloko wo.

37 “Hee lena batho ba Jerusalema! Hee lena batho ba Jerusalema! Lena babolai ba baporofeta, lena bao le kgatlago batho bao ba rometšwego go lena ka maswika,+ ke gantši ke nyaka go kgoboketša bana ba lena go swana le kgogo ge e kgoboketša matswiana a yona ka tlase ga diphego tša yona! Eupša lena ga se la ka la nyaka.+ 38 Modimo o lahlile ntlo* ya lena.*+ 39 Ka gobane ke re go lena: Le ka se hlwe le sa mpona go tloga bjale go ya pele go fihlela le re: ‘Go šegofaditšwe yo a tlago ka leina la Jehofa!’”*+