Bakorinthe ba Pele

13 Ge e ba ke kgona go bolela maleme a mantši ao a bolelwago ke batho le a barongwa eupša ke se na lerato, gona ke swana le tšhipi e llago goba simbala* yeo e dirago lešata. 2 Ge e ba ke na le mpho ya go porofeta ebile ke tseba diphiri tša Modimo, ke tseba dilo ka moka,+ ke na le tumelo e tiilego yeo e ka šuthišago le dithaba, eupša ke se na lerato, gona ga ke selo.+ 3 Le ge nka šomiša dilo tša ka ka moka gore ke thuše batho ba bangwe,+ ka neela mmele wa ka e le sehlabelo e le gore ke tle ke ikgantšhe, eupša ke se na lerato,+ nka se holege ka selo.

4 Motho yo a nago le lerato+ ga a fele pelo+ ebile o na le botho.+ Ga a na mona,+ ga a ikgantšhe, ga a ikgogomoše,+ 5 ga a dire tša go leša dihlong,+ ga a dire dilo tšeo di holago yena feela,+ ga a kgopišege ka pela+ ebile ga a sware ba bangwe ka pelo.+ 6 Ga a thabišwe ke dilo tša go se loke,+ eupša o thabišwa ke nnete. 7 Ga a fele maatla le ge dilo di sa sepele gabotse,+ o tshepa dilo tšohle,+ o holofela dilo tšohle,+ ebile o kgotlelela dilo tšohle.+

8 Lerato ga le fele. Eupša dimpho tša go porofeta, tša go bolela ka maleme a mangwe le tsebo, di tlo fedišwa. 9 Dilo tšeo re di tsebago+ le tšeo re di porofetago ga se tša felela, 10 eupša dilo tšeo di sa felelago di tlo fedišwa ge tšeo di feletšego di fihla. 11 Ge ke be ke le ngwana, ke be ke bolela bjalo ka ngwana, ke nagana bjalo ka ngwana, ke efa mabaka bjalo ka ngwana, eupša ka ge gona bjale ke godile, ke lahlile mekgwa ya bongwana. 12 Gona bjale ga re bone gabotse, go bjalo ka ge eka re itebeletše seiponeng sa tšhipi, eupša nakong e tlago re tlo kgona go bona gabotse. Gona bjale ke tseba Modimo ganyenyane, eupša ka nako yeo ke tlo mo tseba gabotse, go swana le kamoo yena a ntsebago ka gona. 13  Dika tše tharo tšeo di dulago di le gona ke tumelo, kholofelo le lerato, eupša sa bohlokwa go di feta ka moka ke lerato.+