Kutollo Yeo e Utolletšwego Johane
12 Ke moka ka bona go direga selo se segolo legodimong. Go be go na le mosadi+ yoo a bego a apere diaparo tšeo di phadimago go swana le letšatši gomme ngwedi o be o le ka fase ga dinao tša gagwe ke moka hlogong ya gagwe a rwele mphapahlogo woo o dirilwego ka dinaledi tše 12. 2 Mosadi yoo o be a imile. Ka ge a be a le kgauswi le go belega o be a goeletša ka gobane o be a šokwa.
3 Ka bona go direga selo se sengwe gape legodimong. Ke ile ka bona drakone e kgolo e khwibidu+ e na le dihlogo tše šupago le manaka a lesome, hlogo e nngwe le e nngwe e be e rwele mphapahlogo. 4 Mosela wa yona wa goga karolo e tee ya dinaledi+ tšeo di bego di arotšwe ka dikarolo tše tharo wa e lahlela lefaseng.+ Drakone ya tšwela pele e eme pele ga mosadi+ yoo a bego a le kgauswi le go belega, e le gore ge a belege e je ngwana yoo.
5 Mosadi yoo o ile a belega ngwana wa mošemane,+ yo a bego a tla buša ditšhaba ka moka ka molamo wa tšhipi.+ Ngwana yoo o ile a phamolwa a išwa go Modimo yoo a bego a dutše setulong sa gagwe sa bogoši. 6 Mosadi yoo o ile a tšhabela lešokeng, lefelong leo Modimo a bego a mo lokišeleditše lona moo a bego a tlo fiwa dijo ka matšatši a 1 260.+
7 Gwa ba le ntwa legodimong. Mikaele*+ le barongwa ba gagwe ba lwa le drakone gomme drakone le barongwa ba yona ba lwa le bona, 8 eupša drakone le barongwa ba yona ba se fenye ebile ba se sa hlwa ba sa dumelelwa go dula legodimong. 9 Ka gona drakone e kgolo+ ya lahlelwa lefaseng, yona noga ya kgale+ yeo e bitšwago Diabolo+ le Sathane,+ yeo e timetšago batho ka moka bao ba dulago lefaseng+ gomme barongwa ba yona le bona ba lahlelwa lefaseng le yona.+ 10 Ka kwa lentšu le le hlabošago legodimong le re:
“Modimo wa rena o phološitše batho+ ebile o bontšhitše maatla a gagwe. Mmušo wa gagwe+ le wa yo a mo kgethilego gore e be Kriste, yena yo a thomilego go diriša maatla a gagwe, o thomile go buša. Ka gobane yo a latofatšago banababo rena bošego le mosegare pele ga Modimo o lahletšwe lefaseng!+ 11 Ebile ba mo fentše+ ka baka la madi a Kwana+ le ka baka la molaetša woo ba ilego ba o bolela.+ Ba be ba sa kwele maphelo a bona*+ bohloko le ge ba be ba lebane le lehu. 12 Ka baka leo, thabang lena magodimo le bao le dulago go ona! Eupša lena bao le dulago lefaseng le lewatleng le ba madimabe+ ka gobane Diabolo o theogetše go lena a galefile kudu, ka ge a tseba gore o šaletšwe ke nako e nyenyane.”+
13 Bjale ge drakone e bona gore e lahletšwe lefaseng,+ e ile ya tlaiša mosadi+ yo a bego a belege ngwana wa mošemane. 14 Eupša mosadi yoo o ile a newa diphego tše pedi tša ntšhu e kgolo+ e le gore a fofele lefelong leo a bego a le lokišeleditšwe lešokeng moo a bego a tlo fiwa dijo ka nako, dinako tše pedi le seripa sa nako*+ a le kgole le noga.+
15 Ke moka noga ya hlatša meetse a go swana le noka ka morago ga mosadi yoo. Noga yeo e be e nyaka gore mosadi yoo a kgangwe ke meetse a noka ye. 16 Eupša lefase le ile la thuša mosadi yoo. Le ile la bulega la metša noka yeo e bego e hlatšitšwe ke drakone. 17 Ka gona Drakone e ile ya galefela mosadi ke moka ya ya go lwa le bana* bao ba šetšego ba mosadi yoo,+ e lego bao ba kwago molao wa Modimo le go dira mošomo woo ba o filwego wa gore ba nee bohlatse ka Jesu.+