Genesi

5 Ye ke pego ya Adama. Letšatšing la ge Modimo a bopa Adama o mo dirile go swana le yena.+ 2 O bopile monna le mosadi.+ Ke moka letšatšing leo ba bopilwego+ ka lona a ba šegofatša gomme a ba bitša Batho.

3 Eitše ge Adama a phetše mengwaga e 130, a ba le morwa yo a swanago le yena, a mo reela leina la Sethe.+ 4 Ka morago ga gore Adama a be le morwa yoo, o ile a phela mengwaga e mengwe e 800 gomme a ba le barwa le barwedi. 5 Ka gona Adama o phetše mengwaga e 930 gomme a hlokofala.+

6 Ge Sethe a na le mengwaga e 105, o ile a ba tatago Enoshe.+ 7 Ka morago ga gore Sethe a be le morwa yoo, o ile a phela mengwaga e mengwe e 807 gomme a ba le barwa le barwedi. 8 Ka gona Sethe o phetše mengwaga e 912 gomme a hlokofala.

9 Ge Enoshe a na le mengwaga e 90, o ile a ba tatago Kenane. 10 Ka morago ga gore Enoshe a be le morwa yoo, o ile a phela mengwaga e mengwe e 815 gomme a ba le barwa le barwedi. 11 Ka gona Enoshe o phetše mengwaga e 905 gomme a hlokofala.

12 Eitše ge Kenane a na le mengwaga e 70, o ile a ba tatago Mahalalele.+ 13 Ka morago ga gore Kenane a be le morwa yoo, o ile a phela mengwaga e mengwe e 840 gomme a ba le barwa le barwedi. 14 Ka gona Kenane o phetše mengwaga e 910 gomme a hlokofala.

15 Ge Mahalalele a na le mengwaga e 65, o ile a ba tatago Jarede.+ 16 Ka morago ga gore Mahalalele a be le morwa yoo, o ile a phela mengwaga e mengwe e 830 gomme a ba le barwa le barwedi. 17 Ka gona Mahalalele o phetše mengwaga e 895 gomme a hlokofala.

18 Ge Jarede a na le mengwaga e 162, o ile a ba tatago Henoge.+ 19 Ka morago ga gore Jarede a be le morwa yoo, o ile a phela mengwaga e mengwe e 800 gomme a ba le barwa le barwedi. 20 Ka gona Jarede o phetše mengwaga e 962 gomme a hlokofala.

21 Ge Henoge a na le mengwaga e 65, o ile a ba tatago Methusela.+ 22 Ka morago ga gore Henoge a be le morwa yoo, o ile a tšwela pele a sepela le Modimo wa nnete* ka mengwaga e 300 gomme a ba le barwa le barwedi. 23 Ka gona Henoge o phetše mengwaga e 365. 24 Bophelo bja gagwe ka moka Henoge o ile a sepela le Modimo wa nnete.+ Ke moka a se sa hlwa a eba gona, ka ge Modimo a mo tšere.+

25 Ge Methusela a na le mengwaga e 187, o ile a ba tatago Lamege.+ 26 Ka morago ga gore Methusela a be le morwa yoo, o ile a phela mengwaga e mengwe e 782 gomme a ba le barwa le barwedi. 27 Ka gona Methusela o phetše mengwaga e 969 gomme a hlokofala.

28 Ge Lamege a na le mengwaga e 182, o ile a ba le morwa. 29 O ile a mo reela leina la Noa,*+ a re: “Yo ke yena yo a tlago go re homotša bohlokong bjo re bo kwago le go šoma ka thata ka baka la mobu woo Jehofa a o rogakilego.”+ 30 Ka morago ga gore Lamege a be le morwa yo a bitšwago Noa, o ile a phela mengwaga e mengwe e 595 gomme a ba le barwa le barwedi. 31 Ka gona Lamege o phetše mengwaga e 777 gomme a hlokofala.

32 Ge Noa a na le mengwaga e 500, o ile a thoma go ba le bana. Maina a bana bao e be e le Sheme,+ Hama+ le Jafete.+